ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠰᠣᠶᠣᠯ ᠡᠷᠳᠡᠨᠢ
ᠦᠢᠯᠡᠴᠢᠯᠡᠭᠡ
ᠠᠵᠠ ᠬᠡᠶᠢᠮᠣᠷᠢᠲᠦ ᠠᠪᠠᠭ᠎ᠠ
ᠨᠤᠮᠴᠢ ᠪᠠᠶᠢᠰᠠ ᠭᠤᠮᠪᠤᠸᠠᠩᠵᠢᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2017/6/19
          ᠨᠤᠮᠴᠢ ᠪᠠᠶᠢᠰᠠ ᠬᠡᠮᠡᠨ ᠠᠯᠳᠠᠷᠰᠢᠭᠰᠠᠨ ᠤᠤᠯ ᠤᠨ ᠰᠢᠯᠢ ᠶᠢᠨ ᠭᠤᠤᠯ ᠴᠢᠭᠤᠯᠭᠠᠨ ᠤ ᠠᠪᠠᠭ᠋ᠠᠨᠠᠷ ᠵᠠᠭᠦᠨ ᠭᠠᠷᠤᠨ ᠬᠤᠰᠢᠭᠤᠨ ᠤ ᠵᠢᠷᠭᠤᠳᠤᠭᠠᠷ ᠦᠶ᠎ᠡ ᠶᠢᠨ ᠬᠤᠰᠢᠭᠤ ᠵᠠᠰᠠᠭ ᠪᠠᠶᠢᠰᠠ — ᠭᠤᠮᠪᠦᠸᠠᠩᠵᠢᠯ ᠪᠤᠯ ᠠᠷᠪᠠᠨ ᠨᠠᠢᠮᠠ — ᠠᠷᠪᠠᠨ ᠶᠢᠰᠤᠳᠤᠭᠡᠷ ᠵᠠᠭᠤᠨ ᠤ ᠦᠶ᠎ᠡ ᠶᠢᠨ ᠮᠤᠩᠭᠤᠯ ᠲᠡᠤᠬᠡᠴᠢ ᠶᠢᠨ ᠨᠢᠭᠡ ᠶᠤᠮ᠃ ᠭᠤᠮᠪᠤᠸᠠᠩᠵᠢᠯ ᠪᠤᠯ᠂ ᠠᠪᠠᠭ᠋ᠠᠨᠠᠷ ᠵᠡᠭᠦᠨ ᠭᠠᠷᠤᠨ ᠬᠤᠰᠢᠭᠤᠨ ᠤ ᠲᠠᠪᠤᠳᠤᠭᠠᠷ ᠦᠶ᠎ᠡ ᠶᠢᠨ ᠵᠠᠰᠠᠭ ᠪᠠᠶᠢᠰᠠ ᠲᠠᠭᠳᠠᠨᠫᠤᠨᠴᠤᠭ ᠤᠨ ᠠᠬᠠᠮᠠᠳ ᠬᠦᠪᠡᠭᠦᠨ ᠶᠤᠮ᠃ ᠲᠡᠷᠡᠪᠡᠷ ᠲᠡᠭᠷᠢ ᠲᠡᠳᠬᠦᠭᠴᠢ ᠶᠢᠨ ᠲᠠᠪᠢᠨ ᠲᠤᠯᠤᠳᠤᠭᠠᠷ ᠤᠨ ︵1792︶ ᠳᠤ ᠬᠤᠰᠢᠭᠤ ᠵᠠᠰᠠᠭ ᠪᠠᠶᠢᠰᠠ ᠶᠢᠨ ᠵᠡᠷᠭᠡ ᠵᠠᠯᠭᠠᠮᠵᠢᠯᠡᠵᠤ᠂ ᠲᠦᠷᠦ ᠭᠡᠷᠡᠯᠳᠦ ᠶᠢᠨ ᠲᠤᠯᠤᠳᠤᠭᠠᠷ ᠤᠨ ︵1827︶ ᠬᠦᠷᠳᠡᠯ᠎ᠡ ᠵᠠᠰᠠᠭ ᠪᠠᠷᠢᠵᠤ ᠪᠠᠶᠢᠵᠠᠢ᠃                 ᠭᠤᠮᠪᠦᠸᠠᠩᠵᠢᠯ ᠪᠠᠶᠢᠰᠠ ᠶᠢᠨ ᠵᠠᠰᠠᠭ ᠪᠠᠷᠢᠭᠰᠠᠨ ᠭᠤᠴᠢᠨ ᠵᠢᠷᠭᠤᠭᠠᠨ ᠵᠢᠯ ᠪᠤᠯ᠂ ᠶᠠᠭ ᠠᠪᠠᠭ᠋ᠠᠨᠠᠷ ᠵᠠᠭᠦᠨ ᠭᠠᠷᠤᠨ ᠬᠤᠰᠢᠭᠤᠨ ᠤ ᠬᠤᠰᠢᠭᠤ ᠰᠦᠮ᠎ᠡ — ᠴᠢᠩ ᠤᠯᠤᠰ ᠤᠨ ᠬᠠᠭᠠᠨᠳᠤ ᠲᠦᠷᠦ ᠠᠴᠠ ᠰᠤᠶᠤᠷᠬᠠᠭᠰᠠᠨ ᠤᠯᠠᠨ᠎ᠠ ᠠᠯᠳᠠᠷᠰᠢᠭᠰᠠᠨ ︽ᠪᠠᠶᠢᠰᠠ ᠶᠢᠨ ᠰᠦᠮ᠎ᠡ︾ ᠪᠤᠶᠤ ︽ᠪᠠᠨᠳᠢᠳᠠ ᠭᠡᠭᠡᠨ ᠬᠡᠶᠢᠳ︾ ᠤᠨ ᠬᠦᠭᠵᠢᠯ ᠪᠠᠳᠠᠷᠠᠯ ᠤᠨ ᠤᠷᠬᠢᠯ ᠪᠠᠶᠢᠵᠠᠢ᠃ ᠵᠠᠩᠯᠤᠩ ᠠᠷᠢᠶ᠎ᠠ ᠪᠠᠨᠳᠢᠳᠠ ᠠᠭᠸᠠᠩᠯᠤᠪᠰᠠᠩᠳᠠᠮᠪᠢᠵᠠᠯᠽᠠᠨ ᠤ ᠰᠦᠩᠪᠦᠮ  ᠳᠤ ᠬᠤᠷᠢᠶᠠᠭᠳᠠᠭᠰᠠᠨ ᠯᠤᠪᠰᠠᠩᠫᠠᠷᠠᠩᠯᠠᠶᠢᠨᠠᠮᠵᠢᠯ ᠬᠡᠭᠴᠢ ᠬᠤᠸᠠᠷᠠᠭ ᠤᠨ ᠲᠦᠪᠡᠳ ᠬᠡᠯᠡᠨ᠎ᠡ ᠵᠤᠬᠢᠶᠠᠭᠰᠠᠨ ︽ᠲᠡᠭᠡᠲᠦ ᠬᠡᠳᠦᠯᠭᠡᠭᠴᠢ ᠴᠤᠭ ᠲᠡᠭᠦᠯᠳᠡᠷ ᠪᠯᠠᠮ᠎ᠠ ᠵᠠᠩᠯᠤᠩ ᠠᠷᠢᠶ᠎ᠠ ᠪᠠᠨᠳᠢᠳᠠ ᠷᠢᠮᠪᠦᠴᠠᠢ ᠠᠭᠸᠠᠩᠯᠤᠪᠰᠠᠩᠳᠠᠮᠪᠢᠵᠠᠯᠽᠠᠨ ᠪᠠᠯᠰᠠᠩᠪᠤ ᠶᠢᠨ ᠨᠠᠮᠳᠠᠷ ᠮᠡᠷᠭᠡᠳ ᠤᠨ ᠬᠦᠰᠡᠯ ᠢ ᠪᠤᠯᠢᠶᠠᠬᠤ ᠡᠷᠳᠡᠨᠢ ᠶᠢᠨ ᠤᠨᠵᠢᠯᠭ᠎ᠠ ᠬᠡᠮᠡᠬᠦ ᠤᠷᠤᠰᠢᠪᠠᠢ︾ ① ᠭᠤᠮᠪᠦᠸᠠᠩᠵᠢᠯ ᠪᠤᠯ᠂ ᠵᠠᠩᠯᠤᠩ ᠪᠠᠨᠳᠢᠳᠠ ᠠᠭᠸᠠᠩᠯᠤᠪᠰᠠᠩᠳᠠᠮᠪᠢᠵᠠᠯᠽᠠᠨ ᠲᠠᠢ ᠨᠢᠭᠡᠨ ᠦᠶ᠎ᠡ ᠶᠢᠨ ᠬᠦᠮᠦᠨ ᠪᠠᠶᠢᠵᠤ ᠂ ᠱᠠᠰᠢᠵᠨ ᠨᠤᠮ ᠤᠨ ᠦᠢᠯᠡᠰ ᠲᠤ ᠰᠡᠳᠬᠢᠯ ᠠᠯᠭᠠᠰᠠᠯ ᠦᠭᠡᠢ ᠬᠠᠮᠵᠢᠯᠴᠠᠨ ᠵᠢᠳᠭᠦᠵᠤ ᠪᠠᠶᠢᠯ᠎ᠠ ᠭᠡᠵᠤ ᠲᠡᠮᠳᠡᠭᠯᠡᠭᠰᠡᠨ ᠪᠠᠶᠢᠳᠠᠭ᠃ ᠮᠦᠨᠴᠤ ᠭᠤᠮᠪᠦᠸᠠᠩᠵᠢᠯ ᠪᠠᠶᠢᠰᠠ ᠲᠡᠭᠦᠨ ᠤ ᠡᠪᠦᠭᠡ ᠪᠠᠯᠵᠤᠷᠳᠤᠷᠵᠢ ᠪᠤᠯᠤᠨ ᠡᠴᠢᠭᠡ ᠲᠠᠭᠳᠠᠨᠫᠤᠨᠴᠠᠭ ᠨᠠᠷ ᠤᠨ ᠰᠠᠨᠠᠭ᠎ᠠ ᠵᠤᠷᠢᠯᠳᠠ ᠶᠢ ᠬᠦᠰᠡᠷᠳᠡᠭᠦᠯᠦᠯ ᠦᠭᠡᠢ ᠠᠭᠸᠠᠩᠯᠤᠪᠰᠠᠩᠳᠠᠮᠪᠢᠵᠠᠯᠽᠠᠨ ᠢ ᠪᠢᠰᠢᠷᠡᠨ ᠰᠢᠳᠤᠵᠤ᠂ ᠬᠤᠷᠠᠯ ᠨᠤᠮ᠂ ᠰᠠᠩ ᠵᠢᠰᠠ ᠶᠢ ᠪᠦᠷᠢᠯᠳᠤᠭᠦᠯᠦᠨ ᠰᠦᠮ᠎ᠡ ᠲᠤᠭᠠᠩ ᠢ ᠦᠷᠭᠡᠳᠬᠡᠨ ᠪᠠᠶᠢᠭᠤᠯᠵᠤ ᠪᠠᠶᠢᠭᠰᠠᠨ ᠨᠢ ᠢᠯᠡᠬᠡᠨ ᠬᠠᠷᠠᠭᠳᠠᠨ᠎ᠠ᠃ ᠤᠳᠤ ᠶᠢᠨ ᠪᠠᠶᠢᠰᠠ ᠶᠢᠨ ᠰᠦᠮ᠎ᠡ ᠶᠢᠨ ︽ᠵᠤᠤ ᠶᠢᠨ ᠰᠦᠮ᠎ᠡ︾ ︵ᠪᠤᠶᠠᠨ ᠰᠠᠶᠢᠨ ᠬᠡᠶᠢᠳ︶ ︽ᠮᠢᠩᠭᠠᠨ ᠪᠤᠷᠬᠠᠨ ᠤ ᠰᠦᠮ᠎ᠡ︾ ︵ᠪᠤᠶᠠᠨ ᠢ ᠬᠤᠷᠢᠶᠠᠭᠴᠢ ᠰᠦᠮ᠎ᠡ︶ ᠵᠡᠷᠭᠡ ᠰᠦᠮ᠎ᠡ ᠲᠤᠭᠠᠩ ᠤᠳ ᠨᠢ ᠴᠦᠮ ᠲᠡᠷᠡ ᠦᠶ᠎ᠡ ᠳᠤ ᠪᠠᠶᠢᠭᠤᠯᠤᠭᠳᠠᠵᠠᠢ᠃                 ᠭᠤᠮᠪᠦᠸᠠᠩᠵᠢᠯ ᠪᠠᠶᠢᠰᠠ ᠪᠠᠷ᠂ ᠵᠦᠪᠬᠡᠨ ᠰᠦᠮ᠎ᠡ ᠲᠤᠭᠠᠩ ᠪᠠᠶᠢᠭᠤᠯᠵᠤ ᠪᠤᠰᠬᠠᠬᠤ ᠦᠢᠯᠡᠰ ᠲᠤ ᠯᠠ ᠮᠡᠷᠡᠶᠢᠨ ᠵᠢᠳᠬᠦᠭᠰᠡᠨ ᠪᠢᠰᠢ᠂ ᠠᠷᠪᠠᠨ ᠲᠦᠷᠪᠡᠲᠦᠭᠡᠷ ᠷᠠᠪᠵᠤᠩ ᠤᠨ ᠠᠷᠪᠠᠨ ᠨᠢᠭᠡᠳᠤᠭᠡᠷ ᠭᠠᠯ ᠦᠬᠡᠷ ᠵᠢᠯ ︵1817 ᠤᠨ ᠤᠨ ᠤᠯᠠᠭᠴᠢᠨ ᠦᠬᠡᠷ ᠵᠢᠯ︶ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠲᠦᠷᠪᠡᠲᠦᠭᠡᠷ ᠰᠠᠷ᠎ᠠ ᠶᠢᠨ ᠰᠢᠨ᠎ᠠ ᠶᠢᠨ ᠰᠠᠶᠢᠨ ᠡᠳᠦᠷ᠂ ᠵᠠᠩᠯᠤᠩ ᠠᠷᠢᠶ᠎ᠠ ᠪᠠᠨᠳᠢᠳᠠ ᠠᠭᠸᠠᠩᠯᠤᠪᠰᠠᠩᠳᠠᠮᠪᠢᠵᠠᠯᠽᠠᠨ ᠤ ᠠᠶᠢᠯᠠᠳᠬᠠᠯ ᠢᠶᠠᠷ ︽ᠮᠤᠩᠭᠤᠯ ᠤᠷᠤᠨ᠎ᠠ ᠱᠠᠰᠢᠨ ᠲᠦᠷᠦ ᠲᠤᠭᠳᠠᠭᠰᠠᠨ ᠶᠤᠰᠤᠨ ᠤ ᠰᠠᠶᠢᠳᠤᠷ ᠦᠭᠦᠯᠡᠭᠰᠡᠨ ᠲᠤᠩᠭᠠᠯᠠᠭ ᠤᠬᠠᠭᠠᠨᠳᠤ ᠵᠠᠯᠠᠭᠤᠰ ᠤᠨ ᠬᠤᠭᠤᠯᠠᠢ ᠶᠢᠨ ᠴᠢᠮᠡᠭ ᠲᠤᠨᠤᠮᠠᠯ ᠭᠡᠷᠡᠯᠳᠤ ᠠᠯᠳᠠᠨ ᠡᠷᠢᠬᠡ︾ ︵ᠡᠷᠳᠡᠮᠳᠡᠳ ᠪᠠᠰᠠ ᠨᠠ ᠲᠠ ᠶᠢᠨ ︽ᠠᠯᠳᠠᠨ ᠡᠷᠢᠬᠡ︾ ᠭᠡᠵᠤ ᠨᠡᠷᠡᠯᠡᠳᠡᠭ︶ ᠬᠡᠮᠡᠬᠦ ᠨᠢᠭᠡᠨ ᠢᠵᠢ ᠱᠠᠰᠢᠨ ᠲᠡᠤᠬᠡ ᠶᠢᠨ ᠵᠤᠬᠢᠶᠠᠯ ᠠᠴᠠ ᠲᠤᠭᠤᠷᠪᠢᠭᠰᠠᠨ ᠠᠴᠠ ︽ᠨᠤᠮᠴᠢ ᠪᠠᠶᠢᠰᠠ︾ ᠬᠡᠮᠡᠨ ᠠᠯᠳᠠᠷᠰᠢᠵᠠᠢ᠃       ᠭᠤᠮᠪᠦᠸᠠᠩᠵᠢᠯ ᠪᠠᠶᠢᠰᠠ ᠶᠢᠨ ︽ᠠᠯᠳᠠᠨ ᠡᠷᠢᠬᠡ︾ ᠬᠡᠮᠡᠬᠦ ᠵᠤᠬᠢᠶᠠᠯ ᠠᠩᠬ᠎ᠠ ᠵᠤᠬᠢᠶᠠᠭᠳᠠᠭᠰᠠᠨ ᠦᠶ᠎ᠡ ᠠᠴᠠ ᠪᠠᠨ ᠭᠠᠷ ᠪᠢᠴᠢᠮᠡᠯ ᠢᠶᠠᠷ ᠮᠤᠩᠭᠤᠯ ᠤᠷᠤᠨ ᠠᠴᠠ ᠪᠠᠷᠠᠭᠤᠨ ᠡᠸᠦ᠋ᠷᠦᠫᠡ ᠬᠦᠷᠳᠡᠯ᠎ᠡ ᠤᠯᠠᠮᠵᠢᠯᠠᠭᠳᠠᠵᠤ᠂ 1991 ᠤᠨ ᠳᠤ᠂ ᠦᠪᠦᠷ ᠮᠤᠩᠭᠤᠯ ᠤᠨ ᠨᠠᠶᠢᠭᠡᠮ ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠬᠦᠷᠢᠶᠡᠯᠡᠩ ᠤᠨ ᠴᠤᠶᠢᠵᠢ ᠠᠪᠤᠭᠠᠢ ᠲᠤᠯᠭᠠᠨ ᠬᠠᠷᠢᠴᠠᠭᠤᠯᠵᠤ ᠲᠠᠶᠢᠯᠪᠤᠷᠢᠯᠠᠨ ᠬᠡᠪᠯᠡᠭᠦᠯᠦᠭᠡᠳ ᠤᠩᠰᠢᠭᠴᠢ ᠰᠤᠳᠤᠯᠤᠭᠴᠢᠳ ᠤᠨ ᠬᠦᠷᠳᠡᠭᠡᠯ ᠪᠤᠯᠤᠭᠰᠠᠨ ᠶᠤᠮ᠃                 ᠨᠤᠮᠴᠢ ᠪᠠᠶᠢᠰᠠ ᠭᠤᠮᠪᠦᠸᠠᠩᠵᠢᠯ ᠮᠤᠩᠭᠤᠯ᠂ ᠮᠠᠨᠵᠤ᠂ ᠲᠦᠪᠡᠳ᠂ ᠬᠢᠳᠠᠳ ᠦᠰᠦᠭ ᠪᠢᠴᠢᠭ ᠮᠡᠳᠡᠳᠡᠭ ᠲᠡᠤᠬᠡᠴᠢ ᠬᠦᠮᠦᠨ ᠪᠠᠶᠢᠭᠰᠠᠨ ᠭᠡᠳᠡᠭ ᠢ ᠲᠡᠭᠦᠨ ᠤ ︽ᠠᠯᠳᠠᠨ ᠡᠷᠢᠬᠡ︾ ᠶᠢ ᠵᠤᠬᠢᠶᠠᠬᠤ ᠳᠠᠭᠠᠨ ᠠᠰᠢᠭᠯᠠᠭᠰᠠᠨ ᠰᠤᠷᠪᠤᠯᠵᠢ ᠪᠢᠴᠢᠭ ᠤᠨ ᠬᠡᠷᠡᠭᠯᠡᠳᠡᠭᠦᠨ ᠪᠠ ᠲᠡᠭᠦᠨ ᠤ ᠤᠷᠴᠢᠭᠤᠯᠤᠭᠰᠠᠨ ᠵᠤᠬᠢᠶᠠᠯ ᠠᠴᠠ ᠨᠢ ᠮᠡᠳᠡᠵᠤ ᠪᠤᠯᠤᠨ᠎ᠠ᠃ ᠨᠡᠩ ᠴᠤ ᠲᠡᠭᠦᠨ ᠤ ᠦᠷᠭᠡᠨ ᠮᠡᠳᠡᠯᠭᠡ ᠲᠠᠢ ᠲᠡᠤᠬᠡᠴᠢ᠂ ᠦᠨᠳᠦᠷ ᠲᠦᠪᠰᠢᠨ ᠲᠠᠢ ᠢᠷᠠᠭᠤ ᠨᠠᠶᠢᠷᠠᠭᠴᠢ ᠪᠠᠶᠢᠭᠰᠠᠨ ᠨᠢ ︽ᠠᠯᠳᠠᠨ ᠡᠷᠢᠬᠡ︾ ᠶᠢᠨ ᠲᠠᠬᠢᠯ ᠵᠠᠯᠪᠢᠷᠢᠯ ᠰᠢᠯᠤᠭ᠌ ᠤᠳ ᠠᠴᠠ ᠭᠠᠳᠠᠷᠯᠠᠭᠳᠠᠨ᠎ᠠ᠃ ᠴᠤᠶᠢᠵᠢ ᠠᠪᠤᠭᠠᠢ ᠶᠢᠨ ᠮᠡᠳᠡᠭᠡᠯᠡᠭᠰᠡᠨ ᠢᠶᠠᠷ ᠭᠤᠮᠪᠦᠸᠠᠩᠵᠢᠯ ᠤᠨ ︽ᠠᠯᠳᠠᠨ ᠡᠷᠢᠬᠡ︾ ᠶᠢᠨ ᠭᠠᠷ ᠪᠢᠴᠢᠮᠡᠯ ᠲᠡᠪᠲᠡᠷ  ᠤᠳ ᠨᠢ ᠤᠳᠤ ᠮᠤᠩᠭᠤᠯ ᠤᠨ ᠭᠠᠨᠳᠠᠨ ᠬᠡᠶᠢᠳ ᠤᠨ ᠨᠤᠮ ᠤᠨ ᠰᠠᠩ᠂ ᠦᠪᠦᠷ ᠮᠤᠩᠭᠤᠯ ᠤᠨ ᠨᠠᠶᠢᠭᠡᠮ ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠬᠦᠷᠢᠶᠡᠯᠡᠩ ᠤᠨ ᠨᠤᠮ ᠤᠨ ᠰᠠᠩ ᠳᠤ ᠪᠦᠷᠢᠨ ᠪᠦᠳᠦᠨ ᠬᠠᠭᠤᠯᠪᠦᠷᠢ ᠲᠡᠪᠳᠡᠷ ᠢᠶᠠᠷ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠶᠢᠬᠤ ᠠᠴᠠ ᠭᠠᠳᠠᠨ᠎ᠠ᠂ ᠳ᠋ᠧᠮᠠᠷᠺ ᠤᠯᠤᠰ ᠤᠨ ᠺᠦ᠋ᠪᠧᠬᠠᠭ᠍ᠸᠠ ᠬᠤᠳᠠᠨ ᠤ ᠬᠠᠭᠠᠨ ᠤ ᠤᠷᠳᠤᠨ ᠤ ᠨᠤᠮ ᠤᠨ ᠰᠠᠩ ᠳᠤ ᠠᠳᠠᠯᠢ ᠪᠤᠰᠤ ᠶᠢᠨ ᠭᠤᠷᠪᠠᠨ ᠬᠠᠭᠤᠯᠪᠤᠷᠢ ︵ᠬᠠᠭᠤᠳᠠᠰᠤ ᠲᠤᠳᠠᠭᠤ︶ ᠪᠠᠶᠢᠳᠠᠭ ᠪᠠ ᠦᠪᠦᠷ ᠮᠤᠩᠭᠤᠯ ᠤᠨ ᠨᠤᠮ ᠤᠨ ᠰᠠᠩ ᠳᠤ ᠪᠠᠰᠠ ᠨᠢᠭᠡᠨ ᠬᠤᠪᠢ ᠬᠠᠭᠤᠳᠠᠰᠤ ᠲᠤᠳᠠᠭᠤ ᠬᠠᠭᠤᠯᠪᠤᠷᠢ ᠲᠡᠪᠲᠡᠷ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠶᠢᠳᠠᠭ ᠠᠵᠠᠢ᠃                 ︽ᠲᠤᠮᠳᠠᠳᠤ ᠤᠯᠤᠰ ᠤᠨ ᠡᠷᠳᠡᠨ ᠤ ᠮᠤᠩᠭᠤᠯ ᠨᠤᠮ ᠪᠢᠴᠢᠭ ᠤᠨ ᠶᠡᠷᠦᠩᠬᠡᠢ ᠭᠠᠷᠴᠠᠭ︾ ᠲᠤ ᠲᠡᠮᠳᠡᠭᠯᠡᠭᠳᠡᠭᠰᠡᠨ ︽ᠠᠯᠳᠠᠨ ᠡᠷᠢᠬᠡ︾ ᠶᠢᠨ ᠬᠠᠳᠠᠭᠠᠯᠠᠮᠵᠢ ᠶᠢ ᠬᠢᠨᠠᠬᠤᠯ᠎ᠠ᠂ ᠤᠳᠤ ᠦᠪᠦᠷ ᠮᠤᠩᠭᠤᠯ ᠤᠨ ᠨᠡᠶᠢᠭᠡᠮ  ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠬᠦᠷᠢᠶᠡᠯᠡᠩ ᠤᠨ ᠨᠤᠮ ᠪᠢᠴᠢᠭ ᠮᠡᠳᠡᠭᠡ ᠵᠠᠩᠭᠢ ᠶᠢᠨ ᠲᠦᠪ ᠲᠤ ᠨᠢᠭᠡᠨ ᠬᠤᠪᠢ ︽ᠮᠤᠩᠭᠤᠯ ᠤᠷᠤᠨ᠎ᠠ ᠱᠠᠰᠢᠨ ᠲᠦᠷᠦ ᠲᠤᠭᠳᠠᠭᠰᠠᠨ ᠶᠤᠰᠤᠨ ᠢ ᠰᠠᠶᠢᠳᠤᠷ ᠦᠭᠦᠯᠡᠭᠰᠡᠨ ᠲᠤᠩᠭᠠᠯᠠᠭ ᠤᠬᠠᠭᠠᠨᠳᠤ ᠵᠠᠯᠠᠭᠤᠰ ᠤᠨ ᠬᠤᠭᠤᠯᠠᠢ ᠶᠢᠨ ᠴᠢᠮᠡᠭ ᠲᠤᠨᠤᠮᠡᠯ ᠬᠡᠷᠡᠯᠳᠤ ᠠᠯᠳᠠᠨ ᠡᠷᠢᠬᠡ ᠬᠡᠮᠡᠭᠳᠡᠬᠦ︾ ᠨᠠ ᠲᠠ ᠶᠢᠨ ᠪᠢᠴᠢᠭᠰᠡᠨ᠂ ᠴᠢᠩ ᠤᠯᠤᠰ ᠤᠨ ᠲᠤᠮᠳᠠᠴᠢ ᠦᠶ᠎ᠡ ᠶᠢᠨ ᠦᠰᠦᠨ ᠪᠢᠷ ᠤᠨ ᠪᠢᠴᠢᠮᠡᠯ ᠤᠳᠠᠰᠤᠨ ᠦᠳᠡᠮᠡᠯ 3 ᠲᠡᠪᠳᠡᠷ᠂ 23×11.4cm ︵ᠡᠨᠡ ᠲᠡᠪᠳᠡᠷ ᠤᠨ ᠬᠡᠮᠵᠢᠶ᠎ᠡ ᠨᠢ ᠴᠤᠶᠢᠵᠢ ᠪᠠᠭᠰᠢ ᠶᠢᠨ ᠬᠡᠮᠵᠢᠯᠳᠡ ᠲᠠᠢ ᠵᠢᠭᠠᠬᠠᠨ ᠵᠦᠷᠢᠶ᠎ᠡ  ᠲᠠᠢ ᠪᠠᠶᠢᠨ᠎ᠠ︶ ᠪᠠᠶᠢᠳᠠᠭ ᠪᠦᠭᠡᠳ ᠲᠡᠭᠦᠨ ᠢ 1959 ᠤᠨ ᠳᠤ ᠤᠷᠠᠳ ᠤᠨ ᠮᠡᠷᠭᠡᠨ ᠰᠦᠮ᠎ᠡ ᠠᠴᠠ ᠤᠯᠵᠤ ᠠᠪᠴᠢᠷᠠᠭᠰᠠᠨ ᠪᠠᠶᠢᠵᠠᠢ᠃ ᠲᠤᠰ ︽ᠠᠯᠳᠠᠨ ᠡᠷᠢᠬᠡ︾ ᠶᠢᠨ ᠴᠠᠬᠢᠯᠭᠠᠨ ᠪᠠᠭᠤᠯᠭᠠᠪᠤᠷᠢ ᠨᠢ ᠲᠤᠮᠳᠡᠳᠤ ᠤᠯᠤᠰ ᠤᠨ ᠨᠤᠮ ᠤᠨ ᠰᠠᠩ᠂ ᠦᠪᠦᠷ ᠮᠤᠩᠭᠤᠯ ᠤᠨ ᠬᠦᠯᠦᠨ ᠪᠤᠶᠢᠷ ᠬᠤᠳᠠ ᠶᠢᠨ ᠰᠢᠨ᠎ᠠ ᠪᠠᠷᠭᠤ ᠵᠠᠭᠦᠨ ᠬᠤᠰᠢᠭᠤᠨ ᠤ ᠨᠤᠮ  ᠤᠨ ᠰᠠᠩ᠂ ᠰᠢᠯᠢ ᠶᠢᠨ ᠭᠤᠤᠯ ᠠᠶᠢᠮᠠᠭ ᠤᠨ ᠵᠠᠭᠦᠨ ᠦᠵᠦᠮᠦᠴᠢᠨ ᠬᠤᠰᠢᠭᠤᠨ ᠤ ᠨᠤᠮ ᠤᠨ ᠰᠠᠩ᠂ ᠦᠪᠦᠷ ᠮᠤᠩᠭᠤᠯ ᠤᠨ ᠦᠨᠳᠦᠰᠤᠳᠡᠨ ᠤ ᠪᠠᠭᠰᠢ ᠶᠢᠨ ᠲᠡᠭᠡᠲᠦ ᠰᠤᠷᠭᠠᠭᠤᠯᠢ ᠶᠢᠨ ᠨᠤᠮ ᠤᠨ ᠰᠠᠩ ᠨᠤᠭᠤᠳ ᠬᠠᠳᠠᠭᠠᠯᠠᠵᠤ ᠪᠠᠶᠢᠨ᠎ᠠ᠃             ᠦᠪᠦᠷ ᠮᠤᠩᠭᠤᠯ ᠤᠨ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠨᠤᠮ ᠤᠨ ᠰᠠᠩ ᠳᠤ ᠮᠥᠨ ᠠᠳᠠᠯᠢ ᠭᠠᠷᠴᠠᠭ  ᠲᠠᠢ ᠪᠦᠷᠢᠨ ᠪᠤᠰᠤ ᠬᠠᠭᠤᠯᠤᠮᠠᠯ 2 ᠲᠡᠪᠳᠡᠷ ︵33×20.7cm᠂ 22×20.5cm︶ ᠪᠤᠢ᠃ ⑥       ᠦᠪᠦᠷ ᠮᠤᠩᠭᠤᠯ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠤᠨ ᠨᠤᠮ ᠤᠨ ᠰᠠᠩ ᠳᠤ᠂ ᠳ᠋ᠧᠮᠠᠷᠺ ᠤᠨ ᠺᠦ᠋ᠪᠧᠬᠠᠭ᠍ᠸᠠ ᠤ ᠬᠠᠭᠠᠨ ᠤ ᠨᠤᠮ ᠤᠨ ᠰᠠᠩ ᠳᠤ ᠬᠠᠳᠠᠭᠠᠯᠠᠵᠤ ᠪᠤᠢ ︽ᠠᠯᠳᠠᠨ ᠡᠷᠢᠬᠡ︾ ᠶᠢᠨ ᠲᠦᠷᠪᠡᠨ ᠬᠤᠪᠢ ᠪᠢᠴᠢᠯ ᠹᠢᠯᠢᠮ ᠨᠤᠭᠤᠳ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠶᠢᠨ᠎ᠠ᠃ ⑦   ᠭᠤᠮᠪᠦᠸᠠᠩᠵᠢᠯ ᠤᠨ ︽ᠠᠯᠳᠠᠨ ᠡᠷᠢᠬᠡ︾ ᠪᠤᠯ ᠤᠷᠠᠨ ᠰᠠᠶᠢᠬᠠᠨ ᠬᠡᠯᠡᠯᠭᠡ  ᠪᠠᠷ ᠪᠢᠴᠢᠭᠰᠡᠨ ᠨᠢᠭᠡᠨ ᠢᠵᠢ ᠮᠤᠩᠭᠤᠯ ᠱᠠᠰᠢᠨ ᠲᠡᠤᠬᠡ ᠶᠢᠨ ᠬᠤᠪᠤᠷᠬᠠᠨ ᠵᠤᠬᠢᠶᠠᠯ ᠶᠤᠮ᠃ ᠵᠤᠬᠢᠶᠠᠭᠴᠢ ᠠᠴᠠ ᠨᠤᠮ ᠤᠨ ᠢᠶᠠᠨ ᠺᠦ᠋ᠯᠪᠦᠨ ᠳᠤ ︽ᠤᠤᠷ ᠮᠤᠩᠭᠤᠯ ᠤᠷᠤᠨ ᠵᠦᠭ ᠲᠤᠷ ᠬᠠᠭᠠᠨ ᠲᠦᠷᠦ ᠰᠠᠶᠢᠳᠤᠷ ᠲᠤᠭᠳᠠᠭᠰᠠᠨ  ᠯᠤᠭ᠎ᠠ ᠬᠠᠭᠠᠳ ᠤᠨ ᠴᠠᠳᠢᠭ᠂ ᠢᠯᠭᠤᠭᠰᠠᠨ ᠱᠠᠰᠢᠨ ᠡᠷᠳᠡᠨᠢ ᠴᠢᠬᠤᠯᠠ ᠤᠷᠤᠰᠢᠭᠰᠠᠨ ᠯᠤᠭ᠎ᠠ ᠱᠠᠰᠢᠨ ᠪᠠᠷᠢᠭᠴᠢᠳ  ᠤᠨ ᠵᠤᠬᠢᠶᠠᠯ ᠰᠠᠯᠳᠠᠰ ᠮᠤᠩᠭᠤᠯ ᠦᠰᠦᠭ ᠤᠨ ᠲᠤᠳᠤᠷᠬᠠᠢ ᠲᠡᠯᠭᠡᠷᠡᠩᠭᠦᠢ ᠲᠡᠤᠬᠡ ᠨᠢᠭᠡᠨ ᠢ ᠬᠦᠰᠡᠵᠤ᠂ ᠭᠤᠷᠪᠠᠨ ᠴᠠᠭ ᠤᠨ ᠰᠠᠶᠢᠪᠠᠷ ᠠᠵᠢᠶᠠᠷᠠᠭᠰᠠᠳ ᠤᠨ ᠮᠥᠨ ᠴᠢᠨᠠᠷ᠂ ᠡᠨᠡ ᠵᠦᠭ ᠤᠨ ᠠᠮᠢᠳᠠᠨ ᠤ ᠭᠠᠭᠴᠠ ᠬᠦ ᠠᠪᠤᠷᠠᠯ ᠢᠳᠡᠭᠡᠯ ᠂ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠢ ᠭᠡᠶᠢᠭᠦᠯᠦᠭᠴᠢ ᠠᠷᠬᠢᠶ᠎ᠠ ᠪᠠᠨᠳᠢᠳᠠ ᠬᠠᠮᠪᠦ ᠬᠡᠮᠡᠨ ᠭᠠᠶᠢᠬᠠᠮᠰᠢᠭᠲᠤ ᠠᠯᠳᠠᠷ ᠤᠨ ᠪᠠᠵᠠᠳ  ᠢᠶᠠᠨ ᠬᠠᠯᠬ᠎ᠠ ᠶᠢᠨ ᠲᠦᠷᠪᠡᠨ ᠠᠶᠢᠮᠠᠭ ᠪᠠ ᠦᠪᠦᠷ ᠲᠦᠴᠢ ᠶᠢᠰᠦ ᠲᠡᠷᠢᠭᠦᠳᠡᠨ ᠵᠦᠭ ᠪᠦᠬᠦᠨ᠎ᠠ ᠲᠠᠬᠢᠨ ᠪᠦᠭᠡᠳ ᠰᠠᠶᠢᠳᠤᠷ ᠨᠠᠶᠢᠭᠤᠯᠵᠢᠭᠤᠯᠤᠨ ᠸᠴᠢᠷ ᠳ᠋ᠾᠠᠷ᠎ᠠ ᠪᠤᠭᠳᠠ ᠭᠡᠭᠡᠨ ᠲᠠᠨ᠎ᠠ ᠵᠤᠬᠢᠶᠠᠨ ᠦᠷᠦᠰᠢᠶᠡᠬᠦᠢ ᠶᠢ ᠠᠶᠢᠯᠠᠳᠬᠠᠨ ᠦᠴᠢᠭᠰᠡᠨ ᠳᠤᠷ ᠲᠡᠭᠡᠳᠦ ᠲᠠᠭᠠᠯᠠᠯ ᠳᠤᠷ ᠠᠨᠬᠤᠭᠤᠯᠤᠭᠰᠠᠨ ᠮᠡᠳᠤ ᠪᠤᠯᠪᠠᠴᠤ᠂ ᠦᠶᠡᠰ ᠡᠭᠦᠨ᠎ᠡ ᠰᠠᠶᠢᠨ ᠨᠤᠮᠯᠠᠯ  ᠤᠨ ᠡᠷᠬᠢᠮ ᠴᠠᠳᠢᠭ ᠨᠤᠮᠯᠠᠬᠤ ᠴᠠᠭ ᠪᠤᠰᠤ ᠶᠢ ᠲᠠᠭᠠᠯᠠᠭᠰᠠᠨ ᠪᠤᠶᠤ᠃ ᠶᠠᠭᠤᠨ ᠬᠠᠷᠢᠨ ᠭᠡᠳᠡᠷᠬᠦ ᠲᠠᠩᠬᠠᠢ ᠲᠡᠨᠡᠭ ᠱᠠᠪᠢ ᠨᠠᠮᠠᠢᠢ ᠪᠢᠴᠢᠳᠤᠬᠡᠢ ᠬᠡᠮᠡᠨ ᠪᠤᠱᠤᠭ ᠠᠶᠢᠯᠠᠳᠤᠭᠰᠠᠨ ᠢ ᠬᠠᠷᠢᠭᠤᠯᠤᠨ ᠶᠠᠳᠠᠭᠠᠳ᠂ ᠪᠦᠳᠦᠭᠡᠯ ᠤᠨ ᠲᠠᠬᠢᠯ ᠪᠤᠯᠭᠠᠨ ᠬᠦᠯᠢᠶᠡᠵᠤ ᠲᠤᠭᠤᠷᠪᠢᠬᠤ ᠨᠢᠭᠡᠨ ᠪᠤᠯᠤᠭᠠᠳ᠂ ᠮᠤᠩᠭᠤᠯ ᠬᠠᠳ ᠤᠨ ᠨᠤᠮ ᠪᠢᠴᠢᠭ᠂ ᠮᠠᠨᠵᠤ ᠮᠤᠩᠭᠤᠯ ᠠᠯᠢᠨ ᠤᠯᠳᠠᠭᠰᠠᠨ ᠪᠠ ᠪᠤᠭᠳᠠ ᠯᠠᠮᠠ ᠨᠠᠷ ᠤᠨ ᠴᠠᠳᠢᠭ ᠲᠦᠪᠡᠳ ᠮᠤᠩᠭᠤᠯ ᠰᠤᠳᠤᠷ ᠰᠡᠯᠳᠡᠰ ᠠᠴᠠ ᠮᠡᠳᠡᠬᠦ ᠴᠢᠨᠡᠭᠡᠪᠡᠷ ᠲᠡᠭᠦᠵᠤ ᠬᠤᠶᠢᠯᠠᠭᠤᠯᠤᠨ ᠪᠢᠴᠢᠭᠰᠡᠨ ︽ᠮᠤᠩᠭᠤᠯ ᠤᠷᠤᠨ᠎ᠠ ᠱᠠᠰᠢᠨ ᠲᠦᠷᠦ ᠲᠤᠭᠳᠠᠭᠰᠠᠨ ᠶᠤᠰᠤᠨ ᠢ ᠰᠠᠶᠢᠳᠤᠷ ᠦᠭᠦᠯᠡᠭᠰᠡᠨ ᠲᠤᠩᠭᠠᠯᠠᠭ ᠤᠬᠠᠭᠠᠨᠳᠤ ᠵᠠᠯᠠᠭᠤᠰ ᠤᠨ ᠬᠤᠭᠤᠯᠠᠢ ᠶᠢᠨ ᠴᠢᠮᠡᠭ᠂ ᠲᠤᠨᠤᠮᠡᠯ ᠬᠡᠷᠡᠯᠳᠦ ᠠᠯᠳᠠᠨ ᠡᠷᠢᠬᠡ︾ ᠬᠡᠮᠡᠭᠳᠡᠬᠦ ᠡᠭᠦᠨ ᠢ ᠦᠢᠯᠡᠳᠦᠭᠴᠢ ᠠᠨᠤ ᠮᠥᠨ ᠬᠦ ᠸᠴᠢᠷ ᠳ᠋ᠾᠠᠷ᠎ᠠ ᠪᠠᠨᠳᠢᠳᠠ ᠪᠤᠭᠳᠠ ᠡᠷᠳᠡᠨᠢ ᠶᠢᠨ ᠭᠡᠭᠡᠨ ᠤ ᠱᠠᠪᠢ ᠪᠦᠭᠡᠳ ᠦᠭᠯᠢᠭᠡ ᠶᠢᠨ ᠡᠵᠡᠨ ᠤ ᠠᠳᠠᠭ ᠭᠤᠸᠠᠩ ᠨᠢᠩ ᠸᠠᠩ ᠪᠦᠬᠡ ᠡᠵᠡᠨ ᠤ ᠬᠤᠷᠢᠨ ᠵᠢᠷᠭᠤᠳᠤᠭᠠᠷ ᠦᠶ᠎ᠡ ᠶᠢᠨ ᠠᠴᠢ᠂ ᠬᠡᠷᠡᠭᠳᠦ ᠨᠤᠮ ᠤᠨ ᠵᠠᠬ᠎ᠠ ᠲᠡᠳᠦᠢ ᠠᠴᠠ ᠡᠰᠡ ᠰᠤᠷᠤᠯᠴᠠᠭᠠᠳ᠂ ᠬᠡᠷᠡᠭ ᠦᠭᠡᠢ ᠤᠯᠠᠨ ᠦᠭᠡ ᠲᠡᠷᠢᠭᠦᠳᠡᠨ ᠢᠶᠠᠷ ᠴᠠᠭ ᠢ ᠨᠦᠭᠴᠢᠭᠡᠭᠰᠡᠨ᠂ ᠵᠠᠭᠦᠨ ᠠᠪᠠᠭ᠋ᠠᠨᠠᠷ ᠤᠨ ᠠᠷᠬᠢᠶ᠎ᠠ ᠡᠪᠦᠭᠡᠨ ᠨᠠ ᠲᠠ ᠨᠠᠷᠠᠳᠤ ᠪᠠᠷ ᠠᠷᠪᠠᠨ ᠲᠦᠷᠪᠠᠳᠦᠭᠡᠷ ᠰᠠᠶᠢᠳᠤᠷ ᠭᠠᠷᠤᠭᠰᠠᠨ ᠤ ᠠᠷᠪᠠᠨ ᠨᠢᠭᠡᠳᠦᠭᠡᠷ ᠭᠠᠯ ᠦᠬᠡᠷ ᠵᠢᠯ ᠤᠨ ᠰᠠᠺᠡ ᠰᠠᠷ᠎ᠠ ᠶᠢᠨ ᠰᠠᠶᠢᠨ ᠡᠳᠦᠷ ᠪᠢᠴᠢᠪᠡ︾ ⑧ ᠬᠡᠮᠡᠨ ᠲᠤᠰ ᠲᠡᠤᠬᠡ ᠶᠢ ᠪᠠᠨᠳᠢᠳᠠ ᠭᠡᠭᠡᠨ ᠤ ᠠᠶᠢᠯᠠᠳᠦᠯ ᠳᠤ ᠲᠤᠯᠳᠤᠶᠢᠳᠴᠦ᠂ ᠮᠠᠨᠵᠤ᠂ ᠮᠤᠩᠭᠤᠯ᠂ ᠲᠦᠪᠡᠳ ᠬᠡᠳᠦᠨ ᠬᠡᠯᠡᠨ ᠤ ᠲᠡᠤᠬᠡ ᠰᠤᠳᠤᠷ ᠤᠳ ᠠᠴᠠ ᠲᠡᠭᠦᠵᠤ ᠨᠠᠶᠢᠷᠠᠭᠤᠯᠤᠭᠰᠠᠨ ᠢᠶᠠᠨ ᠲᠤᠷᠠᠳᠤᠭᠰᠠᠨ ᠪᠦᠭᠡᠳ ᠦᠪᠡᠷ ᠢ ᠪᠠᠨ ᠪᠦᠬᠡ ᠪᠡᠯᠭᠦᠳᠠᠢ ᠶᠢᠨ ᠬᠤᠷᠢᠨ ᠵᠢᠷᠭᠤᠳᠤᠭᠠᠷ ᠦᠶ᠎ᠡ ᠶᠢᠨ ᠠᠴᠢ᠂ ᠵᠡᠭᠦᠨ ᠠᠪᠠᠭ᠋ᠠᠨᠠᠷ ᠬᠤᠰᠢᠭᠤᠨ ᠤ ᠠᠷᠬᠢᠶ᠎ᠠ ᠡᠪᠦᠭᠡᠨ ᠨᠠ ᠲᠠ ᠨᠠᠷᠠᠳᠤ ᠬᠡᠵᠤ ᠲᠤᠳᠤᠷᠬᠠᠶᠢᠯᠠᠭᠠᠳ᠂ ᠵᠤᠬᠢᠶᠠᠯ ᠢᠶᠠᠨ ᠪᠢᠴᠢᠵᠤ ᠲᠡᠭᠦᠰᠭᠡᠭᠰᠡᠨ ᠤᠨ ᠰᠠᠷ᠎ᠠ ᠶᠢ ᠲᠤᠰᠢᠶᠠᠵᠠᠢ᠃       ᠭᠤᠮᠪᠦᠸᠠᠩᠵᠢᠯ ᠢᠶᠠᠷ ᠠᠳᠡ᠂ ᠦᠪᠡᠷ ᠤᠨ ᠨᠡᠷ᠎ᠡ ᠪᠠᠨ ︽ᠨᠠ ᠲᠠ︾ ᠬᠡᠮᠡᠨ ᠭᠤᠮᠪᠦ ᠭᠡᠰᠡᠨ ᠦᠭᠡ ᠶᠢ ᠰᠠᠨᠰᠺᠠᠷᠲ  ᠢᠶᠠᠷ ᠬᠦᠷᠪᠡᠭᠦᠯᠦᠨ ᠪᠢᠴᠢᠵᠤ᠂ ᠡᠷᠳᠡᠨ ᠤ ᠮᠡᠷᠭᠡᠳ ᠤᠨ ᠬᠢᠴᠢᠶᠡᠩᠭᠦᠢ ᠲᠠᠷᠤᠦ ᠵᠠᠩᠰᠢᠯ ᠢᠶᠠᠷ ᠨᠡᠷ᠎ᠡ ᠪᠠᠨ ᠲᠠᠯᠳᠠᠯᠠᠨ ᠪᠢᠴᠢᠭᠰᠡᠨ ᠪᠠᠶᠢᠵᠤᠬᠤᠢ᠃       ᠮᠤᠩᠭᠤᠯ ᠤᠯᠤᠰ ᠤᠨ ᠳ᠋ᠤᠺᠲ᠋ᠤᠷ᠂ ᠳ᠋᠊᠂ ᠴᠠᠷᠢᠩᠰᠤᠳᠨᠠᠮ ︽ᠠᠯᠳᠠᠨ ᠡᠷᠢᠬᠡ︾  ᠶᠢ ︽ᠴᠤᠬᠤᠮ ᠱᠠᠰᠢᠨ ᠤ ᠲᠡᠤᠬᠡ ᠪᠢᠴᠢᠯᠭᠡ ᠶᠢᠨ ᠵᠢᠩᠬᠢᠨᠢ ᠵᠢᠰᠢᠶ᠎ᠡ ᠭᠡᠵᠤ ᠦᠵᠡᠮᠡᠷ︾ ︽ᠬᠡᠯᠡ ᠨᠠᠶᠢᠷᠠᠭᠤᠯᠭ᠎ᠠ ᠨᠢ ᠮᠠᠰᠢ ᠡᠩ ᠤᠨ ᠠᠭᠠᠳ ᠤᠷᠠᠨ ᠢᠷᠠᠭᠤ ᠤᠴᠢᠷ ᠠᠴᠠ ᠦᠶ᠎ᠡ ᠦᠶ᠎ᠡ ᠤᠷᠠᠨ ᠵᠤᠬᠢᠶᠠᠯ ᠤᠩᠰᠢᠵᠤ ᠪᠠᠶᠢᠭ᠎ᠠ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠨ᠎ᠠ︾᠂ ︽ᠤᠯᠠᠮᠵᠢᠯᠡᠯᠳᠤ ᠲᠤᠮᠤᠭ ᠤᠨ ᠵᠠᠷᠢᠮ ᠨᠢᠭᠡᠨ ᠡᠷᠳᠡᠨ ᠤ ᠤᠶᠢᠯᠭᠠᠯᠳᠠ ᠨᠤᠭᠤᠳ ᠢ ᠪᠤᠷᠬᠠᠨ  ᠤ ᠱᠠᠰᠢᠨ ᠤ ᠲᠤᠮᠤᠭ ᠵᠠᠩ ᠦᠢᠯᠡ ᠲᠠᠢ ᠬᠤᠯᠪᠤᠨ ᠦᠭᠦᠯᠡᠭᠰᠡᠨ ᠨᠢ ᠰᠤᠨᠢᠨ ᠰᠤᠳᠤᠨ ᠰᠠᠨᠠᠭᠳᠠᠵᠤ ᠪᠠᠶᠢᠨ᠎ᠠ︾ ᠁ ᠬᠡᠬᠦ ᠮᠡᠳᠦ ᠪᠠᠷ ᠦᠨᠡᠯᠡᠭᠰᠡᠨ ᠪᠠᠶᠢᠳᠠᠭ ᠪᠢᠯᠡ᠃ ⑨       ᠭᠤᠮᠪᠦᠸᠠᠩᠵᠢᠯ ᠤᠨ ︽ᠠᠯᠳᠠᠨ ᠡᠷᠢᠬᠡ︾ ᠨᠢ ︽ᠠᠩᠬ᠎ᠠ ᠮᠤᠩᠭᠤᠯ ᠬᠠᠳ ᠤᠨ ᠠᠪᠴᠤ ᠡᠵᠡᠯᠡᠭᠰᠡᠨ ᠲᠦᠷᠦ ᠶᠢᠨ ᠤᠭ ᠪᠠ ᠬᠤᠶᠠᠳᠤᠭᠠᠷ ᠱᠠᠰᠢᠨ ᠤ ᠡᠬᠢ ᠶᠢ ᠤᠯᠤᠭᠰᠠᠨ ᠬᠢᠭᠡᠳ ᠭᠤᠳᠠᠭᠠᠷ ᠨᠠᠩᠭᠢᠶᠠᠳ ᠤᠨ ᠲᠦᠷᠦ ᠶᠢ ᠡᠵᠡᠯᠡᠵᠤ ᠬᠠᠳ ᠤᠨ ᠦᠢᠯᠡᠰ ᠲᠡᠯᠭᠡᠷᠡᠭᠰᠡᠨ ᠤᠴᠢᠷ᠂ ᠲᠦᠲᠡᠭᠡᠷ ᠲᠠᠢ ᠮᠢᠩ ᠤᠨ ᠲᠦᠷᠦ ᠶᠢᠨ ᠵᠠᠯᠭᠠᠮᠵᠢ ᠯᠤᠭ᠎ᠠ ᠮᠠᠨᠵᠤ ᠬᠠᠭᠠᠳ ᠶᠡᠭᠡ ᠲᠦᠷᠦ ᠶᠢ ᠡᠵᠡᠯᠡᠨ ᠮᠠᠨᠵᠦ᠂ ᠮᠤᠩᠭᠤᠯ ᠲᠦᠷᠦ ᠨᠢᠭᠡᠨ᠎ᠡ ᠨᠡᠶᠢᠯᠡᠵᠤ ᠮᠤᠩᠭᠤᠯ ᠬᠠᠳ ᠢ ᠬᠦᠨᠳᠤᠯᠡᠬᠦ ᠵᠢᠷᠤᠮ ᠲᠤᠭᠳᠠᠭᠰᠠᠨ ᠤᠴᠢᠷ᠂ ᠲᠠᠪᠤᠳᠤᠭᠠᠷ ᠮᠤᠩᠭᠤᠯ ᠬᠠᠭᠠᠳ ᠱᠠᠰᠢᠨ ᠢ ᠪᠠᠷᠢᠭᠴᠢᠳ ᠢ ᠵᠡᠷᠭᠡ ᠪᠠᠷ ᠵᠠᠯᠠᠵᠤ ᠦᠰᠦᠭ ᠵᠤᠬᠢᠶᠠᠨ ᠨᠤᠮ ᠤᠷᠴᠢᠭᠤᠯᠤᠭᠰᠠᠨ ᠲᠡᠷᠢᠭᠦᠳᠡᠨ ᠁︾ ⑩ ᠢ ᠦᠭᠦᠯᠡᠭᠰᠡᠨ ᠪᠠᠶᠢᠳᠠᠭ ᠪᠤᠯᠬᠤᠷ ᠦᠨᠦ ᠶᠢᠨ ᠲᠡᠤᠬᠡ ᠰᠤᠳᠤᠯᠤᠭᠴᠢ ᠡᠷᠳᠡᠮᠳᠡᠳ ᠲᠡᠭᠦᠨ ᠢ ᠱᠠᠰᠢᠨ ᠲᠡᠤᠬᠡ ᠶᠢᠨ ᠵᠤᠬᠢᠶᠠᠯ ᠬᠡᠵᠤ ᠦᠵᠡᠳᠡᠭ᠃                  ᠭᠤᠮᠪᠦᠸᠠᠩᠵᠢᠯ ᠢᠶᠠᠷ ᠮᠤᠩᠭᠤᠯ ᠤᠷᠤᠨ ᠳᠤ ᠪᠤᠷᠬᠠᠨ ᠤ ᠱᠠᠰᠢᠨ ᠡᠭᠦᠰᠦᠨ ᠲᠡᠯᠭᠡᠷᠡᠭᠰᠡᠨ ᠢ ᠦᠭᠦᠯᠡᠬᠦ ᠳᠡᠭᠡᠨ ᠠᠯᠢ ᠡᠷᠳᠡ ᠤᠨ ᠲᠤᠭᠠᠯᠠᠯ ᠤᠨ ᠡᠮᠤᠨ᠎ᠠ ᠲᠤᠮᠳᠠ ᠠᠽᠢᠶ᠎ᠠ ᠶᠢᠨ ᠤᠷᠤᠨ ᠳᠤ ᠨᠢᠭᠡᠨ ᠦᠶ᠎ᠡ ᠬᠦᠴᠦᠷᠬᠡᠭ ᠪᠠᠶᠢᠭᠰᠠᠨ ᠡᠾᠦᠩᠨᠦ ᠭᠦᠷᠦᠨ ᠲᠠᠢ ᠬᠤᠯᠪᠤᠭᠳᠠᠭᠤᠯᠤᠨ ᠦᠭᠦᠯᠡᠭᠰᠡᠨ ᠪᠦᠭᠡᠳ ᠲᠠᠶᠢᠴᠢᠩ ᠤᠯᠤᠰ ᠤᠨ ᠬᠠᠭᠠᠳ ᠪᠠ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠤ ᠲᠡᠭᠡᠳᠦ ᠬᠤᠸᠠᠷᠠᠭ ᠨᠠᠷ ᠤᠨ ᠬᠠᠷᠢᠯᠴᠠᠭᠠᠨ ᠤ ᠲᠤᠬᠠᠢ ᠪᠢᠴᠢᠬᠦ ᠳᠡᠭᠡᠨ ᠲᠦᠪᠡᠳ᠂ ᠮᠤᠩᠭᠤᠯ ᠨᠠᠮᠳᠠᠷ ᠴᠠᠳᠢᠭ ᠢ ᠪᠦᠷᠢᠨ ᠲᠡᠭᠦᠯᠳᠡᠷ ᠠᠰᠢᠭᠯᠠᠭᠰᠡᠨ ᠨᠢ ᠲᠠᠶᠢᠴᠢᠩ ᠤᠯᠤᠰ ᠤᠨ ᠰᠡᠭᠦᠯᠴᠢ  ᠶᠢᠨ ᠦᠶ᠎ᠡ ᠪᠠᠷ ᠪᠢᠴᠢᠭᠳᠡᠭᠰᠡᠨ ᠮᠤᠩᠭᠤᠯ ᠲᠡᠤᠬᠡ ᠶᠢᠨ ᠰᠤᠷᠪᠤᠯᠵᠢ ᠪᠢᠴᠢᠭ ᠤᠳ ᠲᠤ ᠮᠠᠰᠢ ᠴᠢᠬᠤᠯᠠ ᠮᠠᠲ᠋ᠧᠷᠢᠶᠠᠯ ᠨᠦᠬᠦᠪᠦᠷᠢᠯᠡᠭᠰᠡᠨ ᠢᠶᠠᠷ ᠢᠶᠠᠨ ᠪᠤᠰᠤᠳ ᠠᠴᠠ ᠤᠨᠴᠠᠭᠠᠶᠢᠷᠠᠨ᠎ᠠ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ︽ᠠᠯᠳᠠᠨ ᠡᠷᠢᠬᠡ︾ ᠳᠤ ᠮᠤᠩᠭᠤᠯ ᠬᠠᠭᠠᠳ ᠤᠨ ᠪᠤᠷᠬᠠᠨ ᠱᠠᠰᠢᠨ ᠤ ᠨᠤᠮ ᠵᠤᠬᠢᠶᠠᠯ ᠢ ᠤᠷᠴᠢᠭᠤᠯᠬᠤ᠂ ᠪᠢᠴᠢᠬᠦ ᠪᠡ ᠬᠡᠪᠯᠡᠬᠦ ᠠᠰᠠᠭᠤᠳᠠᠯ ᠢ ᠨᠡᠯᠢᠶᠡᠳ ᠬᠦᠨᠳᠦᠳᠬᠡᠨ ᠦᠵᠡᠵᠦ ᠠᠭᠰᠠᠨ ᠲᠤᠬᠠᠢ ᠪᠠ ᠯᠢᠭᠳᠡᠨ ᠬᠠᠭᠠᠨ ᠤ ᠦᠶ᠎ᠡ ᠳᠤ ︽ᠭᠠᠨᠵᠤᠤᠷ︾ ᠢ ᠪᠦᠷᠢᠳᠬᠡᠨ ᠤᠷᠴᠢᠭᠤᠯᠵᠤ ᠲᠡᠭᠦᠰᠬᠡᠭᠰᠡᠡᠨ ᠲᠤᠬᠠᠢ ᠪᠤᠰᠤᠳ ᠨᠤᠮ ᠰᠤᠳᠤᠷ ᠲᠤ ᠡᠰᠡ ᠬᠠᠷᠠᠭᠳᠠᠬᠤ ᠰᠤᠨᠢᠷᠬᠠᠯᠳᠠᠢ ᠵᠦᠢᠯᠡᠰ ᠢ ᠮᠡᠳᠡᠭᠡᠯᠡᠵᠤ ᠪᠠᠶᠢᠳᠠᠭ ᠶᠤᠮ᠃                 ᠨᠤᠮᠴᠢ ᠪᠠᠶᠢᠰᠠ ᠭᠤᠮᠪᠦᠸᠠᠩᠵᠢᠯ ᠪᠠᠰᠠ ᠲᠦᠪᠡᠳ ᠬᠡᠯᠡᠨ ᠠᠴᠠ ᠨᠤᠮ ᠵᠤᠬᠢᠶᠠᠯ ᠤᠷᠴᠢᠭᠤᠯᠵᠤ ᠪᠠᠶᠢᠭᠰᠠᠨ ᠪᠠᠶᠢᠵᠠᠢ᠃ ᠸᠠᠭᠢᠨᠳᠠᠷ᠎ᠠ ᠰᠤᠮᠠᠳᠢ ᠱᠠᠱᠢᠨ᠎ᠠ ᠰᠶ᠎ᠠ ᠳ᠋ᠾᠤᠸᠠᠽᠠ ︵ᠠᠭᠸᠠᠩᠯᠤᠪᠰᠠᠩᠳᠠᠮᠪᠢᠵᠠᠯᠽᠠᠨ︶ ᠶᠢᠨ ︽ᠤᠷᠤᠨ ᠤ ᠲᠡᠭᠡᠲᠦ ᠪᠤᠶᠠᠨ ᠢ ᠴᠤᠭᠯᠠᠷᠠᠭᠤᠯᠤᠭᠴᠢ ᠬᠡᠶᠢᠳ ᠤᠨ ᠰᠢᠳᠤᠭᠡᠨ ᠬᠢᠬᠡᠳ ᠰᠢᠳᠦᠭᠴᠢ ᠰᠠᠯᠳᠠ ᠳᠤᠷ ᠡᠷᠭᠦᠯ ᠬᠦᠨᠳᠦᠯᠡᠯ ᠦᠢᠯᠡᠳᠦᠭᠰᠡᠨ ᠵᠡᠷᠭᠡ ᠶᠢ ᠲᠤᠬᠠᠶᠢᠯᠠᠨ ᠦᠭᠦᠯᠡᠭᠰᠡᠨ ᠭᠠᠶᠢᠬᠠᠮᠰᠢᠭᠳᠤ ᠤᠷᠤᠨ᠎ᠠ ᠵᠤᠬᠢᠶᠠᠨ ᠦᠢᠯᠡᠳᠦᠭᠴᠢ ᠲᠡᠭᠷᠢ ᠶᠢᠨ ᠬᠦᠬᠦᠷᠬᠡ ᠬᠡᠮᠡᠭᠳᠡᠬᠦ ᠤᠷᠤᠰᠢᠪᠠ︾ ⑩ ᠬᠡᠬᠦ ᠲᠦᠪᠡᠳ ᠵᠤᠬᠢᠶᠠᠯ ᠢ ᠭᠤᠮᠪᠦᠸᠠᠩᠵᠢᠯ᠂ ᠵᠤᠬᠢᠶᠠᠭᠴᠢ  ᠶᠢᠨ ᠲᠤᠷᠠᠳᠤᠯᠭ᠎ᠠ ᠪᠠᠷ ᠤᠷᠴᠢᠭᠤᠯᠤᠭᠰᠠᠨ ᠪᠠᠶᠢᠵᠠᠢ᠃ ᠲᠡᠭᠦᠨ ᠤ ᠭᠠᠷᠭᠠᠯᠭ᠎ᠠ ᠳᠤ᠄ ︽ᠤᠷᠤᠨ ᠤ ᠲᠡᠭᠡᠳᠦ ᠪᠤᠶᠠᠨ ᠪᠦᠬᠦᠨ ᠢ ᠴᠤᠭᠯᠠᠷᠠᠭᠤᠯᠤᠭᠴᠢ ᠬᠡᠶᠢᠳ ᠬᠢᠭᠡᠳ ᠰᠢᠳᠤᠭᠡᠨ ᠯᠦᠭᠡ ᠰᠠᠯᠳᠠ ᠳᠤᠷ ᠡᠷᠭᠦᠯ ᠬᠦᠨᠳᠦᠯᠡᠯ ᠦᠢᠯᠡᠳᠦᠭᠰᠡᠨ ᠵᠡᠷᠭᠡ ᠶᠢ ᠲᠤᠬᠠᠶᠢᠯᠠᠨ ᠦᠭᠦᠯᠡᠭᠰᠡᠨ᠃ ᠭᠠᠶᠢᠬᠠᠮᠰᠢᠭᠳᠤ ᠤᠷᠤᠨ᠎ᠠ ᠵᠤᠬᠢᠶᠠᠨ ᠦᠢᠯᠡᠳᠦᠭᠴᠢ ᠲᠡᠭᠷᠢ ᠶᠢᠨ ᠬᠦᠬᠦᠷᠭᠡ ᠬᠡᠮᠡᠭᠳᠡᠬᠦ ᠡᠭᠦᠨ ᠢ ᠴᠤ ᠪᠠᠨᠳᠢᠳᠠ ᠸᠠᠭᠢᠨᠳᠠᠷ᠎ᠠ ᠰᠤᠮᠠᠳᠢ ᠱᠠᠱᠢᠨ᠎ᠠ ᠰᠶ᠎ᠠ ᠳ᠋ᠾᠤᠸᠠᠽᠠ ᠪᠠᠷ ᠴᠢᠩ ᠤᠯᠤᠰ ᠤᠨ ᠰᠠᠶᠢᠰᠢᠶᠠᠯᠳᠤ ᠢᠷᠦᠭᠡᠯᠳᠤ ᠬᠠᠭᠠᠨ ᠤ ᠬᠤᠷᠢᠨ ᠲᠠᠪᠤᠳᠤᠭᠠᠷ ᠤᠨ ︵1820︶ ᠤ ᠴᠠᠶᠢᠳᠠᠷ ᠤᠳᠤᠨ ᠡᠵᠡᠯᠡᠭᠰᠡᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠠ ᠶᠢᠨ ᠰᠠᠶᠢᠨ ᠡᠳᠦᠷ ᠡᠬᠢᠯᠡᠭᠡᠳ ᠪᠠᠶᠢᠭᠤᠯᠤᠭᠰᠠᠨ ᠲᠤᠭᠠᠨ ᠤ ᠪᠢᠴᠢᠭ ᠲᠡᠷᠢᠭᠦᠳᠡᠨ ᠢ ᠲᠠᠷᠠᠭᠠᠯᠠᠨ ᠲᠠᠯᠪᠢᠵᠤ᠂ ᠦᠢᠯᠡ ᠶᠢᠨ ᠰᠠᠭᠦᠯ ᠭᠦᠢᠴᠡᠳᠬᠦᠢ ᠶᠢ ᠲᠤᠬᠢᠶᠠᠯᠳᠤᠭᠤᠯᠤᠨ ᠯᠠᠪᠷᠤᠩ ᠦᠯᠵᠠᠶᠢᠳᠤ ᠲᠢᠶᠠᠨ ᠤ ᠪᠢᠮᠠᠨ ᠬᠠᠷᠰᠢ ᠶᠢᠨ ᠲᠤᠳᠤᠭᠠᠳᠤ ᠤᠷᠳᠤᠨ ᠮᠠᠰᠢ ᠠᠮᠤᠷᠯᠢᠭᠰᠠᠨ ᠲᠡᠭᠦᠰ ᠵᠢᠷᠭᠠᠯᠠᠩ ᠤᠨ ᠪᠠᠶᠠᠰᠬᠤᠯᠠᠩᠳᠤ ᠴᠡᠴᠡᠷᠯᠢᠭ ᠲᠤᠷ ᠲᠡᠭᠦᠰᠬᠡᠵᠤ ᠪᠢᠴᠢᠭᠰᠡᠨ ᠁ ᠡᠬᠦᠨ ᠢ ᠬᠤᠳᠠᠯᠠ ᠢᠯᠭᠤᠭᠰᠠᠳ ᠤᠨ ᠮᠥᠨ ᠴᠢᠨᠠᠷ᠂ ᠠᠷᠢᠶ᠎ᠠ ᠪᠠᠨᠳᠢᠳᠠ ᠭᠡᠭᠡᠨ ᠲᠠᠨ ᠢᠶᠠᠷ ᠵᠤᠬᠢᠶᠠᠨ ᠠᠶᠢᠯᠠᠳᠤᠭᠰᠠᠨ ᠢᠶᠠᠨ ᠮᠤᠩᠭᠤᠯᠴᠢᠯᠠᠨ ᠪᠢᠴᠢᠳᠤᠬᠡᠢ ᠬᠡᠮᠡᠭᠰᠡᠨ ᠵᠠᠷᠯᠢᠭ ᠢ ᠤᠷᠤᠢ ᠲᠠᠭᠠᠨ ᠬᠦᠯᠢᠶᠠᠵᠤ᠂ ᠮᠤᠩᠬᠠᠭ ᠤᠶᠤᠨ ᠳᠤᠷ ᠭᠠᠷᠤᠭᠰᠠᠭᠠᠷ ᠬᠦ ᠦᠭᠡᠰ ᠤᠨ ᠨᠠᠶᠢᠷ ᠢ ᠲᠠᠭᠠᠵᠤ ᠪᠢᠴᠢᠭᠡᠴᠢ ᠰᠠᠶᠢᠨ ᠪᠤᠶᠠᠨ ᠪᠤᠯᠳᠤᠭᠠᠢ︾ ᠭᠡᠵᠡᠢ᠃ ᠴᠢᠩ ᠤᠯᠤᠰ ᠤᠨ ᠰᠠᠶᠢᠰᠢᠶᠠᠯᠳᠤ ᠢᠷᠦᠭᠡᠯᠳᠦ ᠶᠢᠨ ᠬᠤᠷᠢᠨ ᠲᠠᠪᠤᠳᠤᠭᠠᠷ ᠤᠨ ᠤ ᠮᠤᠳᠤᠨ  ᠪᠠᠷ ᠤᠨ 22 ᠬᠠᠭᠤᠳᠠᠰᠤ ᠲᠠᠢ 8.3×47cm ᠰᠤᠳᠤᠷ᠂ ᠦᠪᠦᠷ ᠮᠤᠩᠭᠤᠯ ᠤᠨ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠨᠤᠮ ᠤᠨ ᠰᠠᠩ᠂ 1 — 18 ᠬᠠᠭᠤᠳᠠᠰᠤ ᠶᠢᠨ ᠮᠥᠨ ᠰᠤᠳᠤᠷ᠂ ᠦᠪᠦᠷ ᠮᠤᠩᠭᠤᠯ ᠤᠨ ᠨᠡᠶᠢᠭᠡᠮ  ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠬᠦᠷᠢᠶᠡᠯᠡᠭ ᠤᠨ ᠨᠤᠮ ᠪᠢᠴᠢᠭ ᠮᠡᠳᠡᠭᠡ ᠵᠠᠩᠬᠢ ᠶᠢᠨ ᠲᠦᠪ ᠲᠤ ᠲᠤᠰ ᠲᠤᠰ ᠬᠠᠳᠠᠭᠠᠯᠠᠭᠳᠠᠵᠤ ᠪᠤᠢ᠃
  
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠠᠪᠠᠭ᠎ᠠ ᠬᠤᠰᠢᠭᠤ ᠪᠤᠳᠠᠰ ᠤᠨ ᠪᠤᠰᠤ ᠰᠤᠶᠤᠯ ᠤᠨ ᠥᠪ ᠢ ᠣᠯᠠᠮᠵᠢᠯᠠᠨ ᠵᠠᠯᠭᠠᠮᠵᠢᠯᠠᠬᠤ ᠰᠤᠶᠤᠯ ᠤᠨ ᠢᠲᠡᠭᠡᠯ ᠢᠶᠠᠨ ᠁
ᠲᠦᠮᠡᠨᠪᠠᠶᠠᠷ ᠤᠨ ᠤᠷᠴᠢᠭᠤᠯᠭ᠎ᠠ ᠶᠢᠨ ᠪᠦᠳᠦᠭᠡᠯ ᠱᠠᠩᠨᠠᠯ ᠲᠤᠰᠴᠠᠢ
︽ᠬᠦᠬᠡ ᠲᠦᠯᠬᠢᠭᠦᠷ︾ ᠨᠤᠮ ᠤᠨ ᠬᠤᠯᠪᠤᠭᠠᠨ ᠤ ᠨᠣᠮ ᠣᠩᠰᠢᠭᠰᠠᠨ ᠮᠡᠳᠡᠯᠭᠡ ᠶᠢᠨ ᠤᠷᠤᠯᠳᠤᠭᠠᠨ ᠠᠮᠵᠢᠯᠲᠠ ᠁
ᠬᠠᠶᠢᠷ᠎ᠠ ᠬᠠᠷᠢᠭᠤᠴᠠᠯᠭ᠎ᠠ ᠶᠢ ᠲᠡᠭᠡᠳᠦᠯᠡᠵᠦ ᠰᠢᠯᠢᠳᠡᠭ ᠵᠢᠭᠠᠨ ᠵᠢᠯᠤᠭᠤᠳᠤᠭᠴᠢ ᠪᠣᠯᠬᠤ ᠪᠠᠷ ᠰᠢᠭᠤᠷᠬᠠᠶᠢᠯᠠᠨ᠎ᠠ
ᠰᠢᠯᠢ ᠶᠢᠨ ᠭᠤᠣᠯ ᠠᠶᠢᠮᠠᠭ ᠠᠴᠠ ᠲᠤᠮᠤ ᠬᠡᠯᠪᠡᠷᠢ ᠶᠢᠨ ᠡᠷᠲᠡᠨ ᠤ ᠤᠩᠭᠤᠨ ᠤ ᠰᠦᠷᠦᠭᠵᠢᠯ ᠵᠢᠴᠢ ᠴᠢᠯᠠᠭᠤᠨ ᠁
ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠠᠴᠠ ᠭᠤᠤᠯᠴᠢᠯᠠᠨ ᠡᠷᠬᠢᠯᠡᠪᠡ ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠠᠯᠪᠠᠨ ᠲᠢᠩᠬᠢᠮ ᠠᠴᠠ ᠲᠠᠭᠠᠭᠠᠴᠢᠯᠠᠨ ᠡᠷᠬᠢᠯᠡᠪᠡ ᠃ ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠮᠡᠷᠭᠡᠵᠢᠯ ᠬᠠᠩᠭᠠᠪᠠ᠃ ᠰᠢᠤᠳᠠᠨ ᠳ᠋ᠤᠭᠠᠷ: 010098    蒙ICP备05000248号