ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠰᠣᠶᠣᠯ ᠡᠷᠳᠡᠨᠢ
ᠦᠢᠯᠡᠴᠢᠯᠡᠭᠡ
ᠠᠵᠠ ᠬᠡᠶᠢᠮᠣᠷᠢᠲᠦ ᠠᠪᠠᠭ᠎ᠠ
ᠨᠧᠴᠢᠨ ᠵᠠᠯᠠᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2017/6/10
          ᠮᠤᠩᠭᠤᠯ ᠦᠨᠳᠦᠰᠦᠳᠡᠨ ᠤ ᠤᠷᠴᠢᠨ ᠦᠶ᠎ᠡ ᠶᠢᠨ ᠰᠤᠷᠭᠠᠨ ᠬᠦᠮᠦᠵᠢᠯ ᠤᠨ ᠵᠢᠳᠬᠦᠯᠳᠡᠳ ᠤᠨ ᠨᠢᠭᠡ ᠪᠤᠯᠬᠤ ᠨᠧᠴᠢᠨ ᠠᠪᠤᠭᠠᠢ ᠪᠤᠯ ᠠᠪᠠᠭ᠋ᠠᠨᠠᠷ ᠵᠠᠭᠦᠨ ᠭᠠᠷᠤᠨ ᠬᠤᠰᠢᠭᠤᠨ ᠤ ᠬᠦᠮᠦᠨ ᠶᠤᠮ᠃ ᠲᠡᠷᠡ ᠪᠠᠷ ᠪᠠᠳᠠᠷᠠᠭᠤᠯᠳᠤ ᠲᠦᠷᠦ ᠶᠢᠨ ᠭᠤᠴᠢᠨ ᠭᠤᠷᠪᠠᠳᠤᠭᠠᠷ ᠤᠨ ᠤ ᠤᠯᠠᠭᠴᠢᠨ ᠬᠤᠨᠢᠨ ᠵᠢᠯ ︵1907︶ ᠴᠡᠪᠡᠭᠳᠦ ᠵᠠᠬᠢᠷᠤᠭᠴᠢ ᠶᠢᠨ ᠳᠤ ᠲᠦᠷᠦᠵᠤ᠂ ᠪᠠᠭ᠎ᠠ ᠨᠠᠰᠤᠨ ᠠᠴᠠ ᠪᠠᠨ ᠭᠡᠷ ᠤᠨ ᠰᠤᠷᠭᠠᠭᠤᠯᠢ ᠲᠠᠭᠠᠵᠤ ᠱᠠᠸᠠᠷᠢ ᠵᠠᠬᠢᠷᠤᠭᠴᠢ  ᠳᠤ ᠱᠠᠪᠢᠯᠠᠪᠠ᠃ ᠨᠧᠴᠢᠨ᠂ ᠮᠤᠩᠭᠤᠯ ᠪᠢᠴᠢᠭ ᠢ ᠤᠨᠴᠠᠭᠠᠢ ᠰᠠᠶᠢᠨ ᠰᠤᠷᠴᠦ᠂ ᠰᠠᠶᠢᠬᠠᠨ ᠪᠢᠴᠢᠳᠡᠭ ᠪᠠᠶᠢᠭᠰᠠᠨ ᠠᠴᠠ ᠬᠤᠰᠢᠭᠤ ᠶᠠᠮᠤᠨ ᠤ ᠰᠤᠷᠬᠤ ᠪᠢᠴᠢᠭᠡᠴᠢ᠂ ᠵᠢᠩᠬᠢᠨᠢ ᠪᠢᠴᠢᠭᠡᠴᠢ ᠶᠢᠨ ᠠᠯᠪᠠ ᠶᠢ ᠤᠯᠠᠨ ᠵᠢᠯ ᠬᠠᠭᠠᠵᠤ᠂ ᠲᠡᠭᠦᠨ ᠢ ᠦᠰᠦᠨ ᠪᠢᠷ ᠤᠨ ᠪᠢᠴᠢᠯᠭᠡ ᠨᠢ ᠭᠤᠶᠢᠳᠠ ᠰᠠᠶᠢᠬᠠᠨ ᠭᠡᠯᠪᠡᠷᠢ ᠲᠠᠢ ᠮᠦᠷᠳᠡᠭᠡᠨ ᠲᠠᠰᠢᠶ᠎ᠠ ᠪᠤᠷᠤᠭᠤ ᠪᠢᠴᠢᠳᠡᠭ ᠦᠭᠡᠢ᠂ ᠪᠢᠴᠢᠭ ᠤᠨ ᠨᠤᠤᠷᠠᠭ ᠢ ᠤᠨᠴᠠ ᠰᠠᠶᠢᠬᠠᠨ ᠵᠤᠬᠢᠶᠠᠨ ᠨᠠᠶᠢᠷᠠᠭᠤᠯᠳᠠᠭ ᠢᠶᠠᠷ ᠢᠶᠠᠨ ᠲᠡᠭᠡᠲᠦ ᠵᠡᠷᠬᠡ ᠶᠢᠨ ᠪᠢᠴᠢᠭᠡᠴᠢ ᠬᠡᠮᠡᠨ ᠴᠤᠤ ᠮᠠᠨᠳᠤᠵᠤ᠂ ᠬᠤᠵᠢᠮ ᠨᠢ ᠲᠡᠷᠡ ᠬᠤᠰᠢᠭᠤ ᠵᠠᠯᠠᠨ᠂ ᠮᠠᠶᠢᠷᠠᠨ ᠤ ᠲᠤᠰᠢᠶᠠᠯ ᠳᠤ ᠲᠡᠪᠰᠢᠭᠰᠡᠨ ᠪᠦᠭᠡᠳ ᠰᠢᠯᠢ ᠶᠢᠨ ᠭᠤᠤᠯ ᠴᠢᠭᠤᠯᠭᠠᠨ ᠲᠠᠶᠠᠭᠠᠷ ᠲᠤ ︽ᠨᠧᠴᠢᠨ ᠵᠠᠯᠠᠨ︾ ᠬᠡᠵᠤ ᠠᠯᠳᠠᠷᠰᠢᠵᠠᠢ᠃ ① ᠨᠧᠴᠢᠨ ᠠᠪᠦᠭᠠᠢ᠂ ᠵᠠᠯᠠᠭᠤ ᠽᠠᠨᠳᠠᠨ ᠨᠠᠰᠣᠨ ᠠᠴᠠ ᠪᠠᠨ ᠦᠪᠡᠷ ᠤᠨ ᠠᠮᠢᠳᠤᠷᠠᠯ ᠪᠤᠯᠤᠨ ᠬᠤᠪᠢ ᠵᠠᠶᠠᠭ᠎ᠠ  ᠪᠠᠨ ᠮᠤᠩᠭᠤᠯ ᠦᠨᠳᠤᠰᠦᠳᠡᠨ ᠤ ᠰᠤᠶᠤᠯ ᠪᠤᠯᠪᠠᠰᠤᠷᠠᠯ ᠤᠨ ᠦᠢᠯᠡᠰ ᠲᠤ ᠬᠤᠯᠪᠤᠵᠤ᠂ ᠨᠠᠰᠤᠨ ᠲᠤᠷᠰᠢ ᠵᠢᠳᠬᠦᠵᠤ ᠶᠠᠪᠤᠵᠠᠢ᠃          ᠨᠧᠴᠢᠨ᠂ 1943 — 1945 ᠤᠨ ᠳᠤ ᠠᠪᠠᠭ᠋ᠠᠨᠠᠷ ᠵᠡᠭᠦᠨ ᠭᠠᠷᠤᠨ ᠬᠤᠰᠢᠭᠤᠨ ᠤ ᠦᠬᠢᠳ ᠤᠨ ᠰᠤᠷᠭᠠᠭᠤᠯᠢ ᠶᠢᠨ ᠵᠠᠬᠢᠷᠤᠯ ᠪᠠᠶᠢᠵᠤ᠂ 1946 ᠤᠨ ᠳᠤ ᠲᠤᠰ ᠬᠤᠰᠢᠭᠤᠨ ᠤ ᠠᠷᠠᠳᠴᠢᠯᠠᠭᠰᠠᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠠᠩᠬᠠᠳᠤᠭᠴᠢ ᠬᠤᠰᠢᠭᠤ ᠲᠠᠷᠤᠭ᠎ᠠ ᠪᠠᠷ ᠰᠤᠩᠭᠤᠭᠳᠠᠪᠠ᠃ 1947 ᠤᠨ ᠳᠤ ᠤᠯᠠᠭᠠᠨᠬᠤᠳᠠ ᠬᠤᠳᠠ  ᠳᠠᠬᠢ ᠦᠪᠦᠷ ᠮᠤᠩᠭᠤᠯ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠳᠤ ᠠᠵᠢᠯᠯᠠᠵᠤ᠂ 1948 ᠤᠨ ᠳᠤ ᠰᠢᠯᠢ ᠶᠢᠨ ᠭᠤᠤᠯ ᠠᠶᠢᠮᠠᠭ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠳᠤ ᠠᠵᠢᠯᠯᠠᠪᠠ᠃ 1949 ᠤᠨ ᠳᠤ ᠠᠪᠠᠭ᠎ᠠ ᠬᠤᠰᠢᠭᠤᠨ ᠤ ᠮᠢᠩᠳᠦᠪ ᠰᠦᠮ᠎ᠡ ᠳᠤ ᠨᠡᠭᠦᠳᠡᠯ ᠤᠨ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠪᠠᠶᠢᠭᠤᠯᠵᠤ ᠪᠠᠭᠰᠢᠯᠠᠪᠠ᠃ 1950 ᠤᠨ ᠳᠤ ᠰᠢᠯᠢ ᠶᠢᠨ ᠭᠤᠤᠯ  ᠶᠢᠨ ᠪᠦᠷᠢᠨ ᠪᠦᠷᠢᠨ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠳᠤ ᠪᠠᠭᠰᠢᠯᠠᠪᠠ᠃ 1955 — 1958 ᠤᠨ ᠳᠤ ᠰᠢᠯᠢ ᠶᠢᠨ ᠭᠤᠤᠯ ᠠᠶᠢᠮᠠᠭ ᠤᠨ ᠰᠤᠨᠢᠨ ᠤ ᠬᠤᠷᠢᠶᠠᠨ ᠳᠤ ᠨᠠᠶᠢᠷᠠᠭᠤᠯᠤᠭᠴᠢ ᠪᠠᠷ ᠠᠵᠢᠯᠯᠠᠪᠠ᠃ 1958 — 1959 ᠤᠨ᠂ ᠰᠦᠨᠢᠳ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠮᠤᠩᠭᠤᠯ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠳᠤ ᠪᠠᠭᠰᠢᠯᠠᠪᠠ ᠃ 1960 — 1966 ᠤᠨ ᠠᠪᠠᠭ᠎ᠠ ᠬᠤᠰᠢᠭᠤᠨ ᠤ ᠰᠢᠭᠤᠳ ᠬᠠᠷᠢᠶ᠎ᠠ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠳᠤ ᠲᠠᠷᠤᠭᠠᠯᠠᠪᠠ ᠃ ᠨᠧᠴᠢᠨ᠂ 1957 ᠤᠨ ᠳᠤ ᠰᠢᠯᠢ ᠶᠢᠨ ᠭᠤᠤᠯ ᠠᠶᠢᠮᠠᠭ ᠤᠨ ᠤᠯᠤᠰ ᠲᠦᠷᠦ ᠶᠢᠨ ᠵᠦᠪᠯᠡᠯᠭᠡᠨ ᠤ ᠬᠡᠰᠢᠬᠦᠨ  ᠢᠶᠠᠷ ᠰᠤᠩᠭᠤᠭᠳᠠᠪᠠ᠃ ᠲᠡᠷᠡ ᠪᠠᠷ ︽ᠰᠤᠶᠤᠯ ᠤᠨ ᠬᠤᠪᠢᠰᠬᠠᠯ︾ ︵1966 — 1977︶ ᠤᠨ ᠲᠤᠮᠳᠠ ᠬᠦᠨᠳᠦ ᠨᠤᠴᠢᠳᠠᠢ ᠬᠤᠤᠷᠯᠠᠯ ᠠᠮᠰᠠᠵᠤ᠂ 1977 ᠤᠨ ᠳᠤ ᠲᠡᠯᠡᠨ ᠨᠠᠰᠣᠳᠠᠢ ᠳᠠᠭᠠᠨ ᠶᠢᠷᠳᠢᠨᠴᠦ ᠠᠴᠠ ᠠᠩᠭᠢᠵᠢᠷᠠᠪᠠ᠃          ᠨᠧᠴᠢᠨ᠂ ᠬᠠᠭᠤᠷᠮᠠᠭ ᠮᠤᠩᠭᠤᠯ ᠬᠢᠵᠠᠭᠠᠷ ᠤᠨ ᠦᠪᠡᠷᠳᠡᠬᠡᠨ ᠵᠠᠰᠠᠬᠤ ᠬᠤᠯᠪᠤᠭᠠᠳᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠦᠶ᠎ᠡ ᠳᠤ᠂ ᠴᠢᠭᠤᠯᠤᠯᠳᠤ ᠬᠠᠭᠠᠯᠭ᠎ᠠ ᠬᠤᠳᠠᠨ᠎ᠠ ᠬᠦᠷᠴᠦ ᠤᠳᠬ᠎ᠠ ᠰᠤᠶᠤᠯ ᠤᠨ ᠶᠠᠮᠤᠨ ᠪᠤᠶᠤ ︽ᠲᠡᠷᠢᠬᠦᠨ ᠨᠤᠶᠠᠨ ᠤ ᠤᠷᠳᠤᠨ ᠤ ᠲᠠᠷᠤᠮᠠᠯ ᠤᠨ ᠭᠠᠵᠠᠷ︾ ᠲᠤ ᠨᠠᠶᠢᠷᠠᠭᠤᠯᠤᠭᠴᠢ ᠪᠠᠷ ᠠᠵᠢᠯᠯᠠᠵᠤ᠂ ︽ᠶᠤᠸᠠᠨ ᠤᠯᠤᠰ ᠤᠨ ᠬᠦᠬᠡ ᠰᠤᠳᠤᠷ︾᠂ ︽ᠷᠠᠰᠢᠫᠤᠩᠰᠤᠭ ᠤᠨ ᠠᠯᠳᠠᠨ ᠲᠤᠪᠴᠢ︾᠂ ︽ᠮᠠᠷᠺᠦ — ᠫᠤᠯᠤ ᠶᠢᠨ ᠠᠶᠠᠯᠠᠯ ᠤᠨ ᠲᠡᠮᠳᠡᠭᠯᠡᠯ︾ ᠪᠤᠯᠤᠨ ︽ᠰᠤᠷᠬᠤ ᠪᠢᠴᠢᠭ︾ ᠁ ᠵᠡᠷᠭᠡ ᠨᠤᠮ ᠪᠢᠴᠢᠭ ᠢ ᠬᠢᠨᠠᠨ ᠨᠠᠶᠢᠷᠠᠭᠤᠯᠬᠤ ᠠᠵᠢᠯ ᠳᠤ ᠤᠷᠤᠯᠴᠠᠨ ᠨᠡᠯᠢᠶᠡᠳ ᠵᠢᠯ ᠰᠠᠭᠤᠵᠠᠢ᠃ ᠲᠡᠷᠡ ᠪᠠᠰᠠ ᠰᠢᠯᠢ ᠶᠢᠨ ᠭᠤᠤᠯ ᠴᠢᠭᠤᠯᠭᠠᠨ ᠤ ᠪᠦᠬᠡᠴᠤᠳ ᠪᠠ ᠤᠷᠠᠯᠢᠭᠴᠢᠳ ᠤᠨ ᠪᠦᠯᠬᠦᠮ ᠢ ᠲᠠᠭᠠᠭᠤᠯᠤᠨ ᠶᠠᠫᠤᠨ᠂ ᠰᠤᠯᠤᠩᠭᠤᠰ ᠵᠡᠷᠭᠡ ᠤᠯᠤᠰ ᠢᠶᠠᠷ ᠲᠤᠭᠤᠷᠢᠨ ᠦᠵᠡᠵᠦ ᠠᠶᠢᠯᠴᠢᠯᠠᠪᠠ᠃ ᠨᠧᠴᠢᠨ ᠤ ᠵᠤᠬᠢᠶᠠᠭᠰᠠᠨ ︽ᠮᠤᠩᠭᠤᠯ ᠪᠢᠴᠢᠭ ᠶᠢᠨ ᠦᠰᠦᠭ ᠨᠠᠶᠢᠷᠠᠭᠤᠯᠬᠤ ᠢᠯᠡᠳᠬᠡᠯ︾ ︵蒙古字 母连接表︶ ᠬᠡᠮᠡᠬᠦ ᠮᠤᠩᠭᠤᠯ ᠬᠡᠯᠡ ᠪᠢᠴᠢᠭ ᠤᠨ ᠵᠦᠪ ᠪᠢᠴᠢᠯᠭᠡ ᠤᠨ ᠦᠨᠳᠦᠰᠦᠨ ᠲᠦᠷᠢᠮ ᠢ ᠮᠡᠳᠡᠭᠦᠯᠬᠦ ᠪᠠᠷ ᠵᠤᠷᠢᠯᠭ᠎ᠠ ᠪᠤᠯᠭᠠᠭᠰᠠᠨ ᠵᠤᠬᠢᠶᠠᠯ ᠨᠢ ᠬᠠᠭᠤᠷᠮᠠᠭ ᠮᠤᠩᠭᠤᠯ ᠬᠢᠵᠠᠭᠠᠷ ᠤᠨ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠬᠤᠯᠪᠤᠭᠠᠳᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠦᠶ᠎ᠡ ᠳᠤ ᠴᠢᠯᠠᠭᠤᠨ ᠪᠠᠷ ᠢᠶᠠᠷ ᠬᠡᠪᠯᠡᠭᠳᠡᠨ ᠦᠬᠢᠳ ᠬᠦᠪᠡᠭᠦᠳ ᠤᠨ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠶᠢᠨ ᠰᠤᠷᠬᠤ ᠪᠢᠴᠢᠭ ᠪᠤᠯᠵᠤ ᠪᠠᠶᠢᠭᠰᠠᠨ ᠪᠦᠭᠡᠳ ᠰᠢᠯᠢ ᠶᠢᠨ ᠭᠤᠤᠯ ᠴᠢᠭᠤᠯᠭᠠᠨ ` ᠤ ᠤᠯᠠᠨ ᠬᠤᠰᠢᠭᠤᠳ ᠢᠶᠠᠷ ᠭᠠᠷ ᠪᠢᠴᠢᠮᠡᠯ ᠢᠶᠠᠷ ᠦᠷᠭᠡᠨ ᠲᠠᠷᠬᠠᠵᠤ ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠮᠤᠩᠭᠤᠯ ᠪᠢᠴᠢᠭ ᠰᠤᠷᠤᠭᠰᠡᠳ ᠢ ᠰᠡᠩᠬᠡᠷᠡᠭᠦᠯᠵᠤ ᠪᠠᠶᠢᠵᠠᠢ᠃ ᠴᠢᠯᠤᠭᠡᠯᠡᠳᠡᠭᠰᠡᠨ ᠠᠴᠠ ᠬᠤᠶᠢᠰᠢ ᠲᠤᠰ ᠲᠡᠪᠳᠡᠷ ᠢ ᠦᠨᠳᠦᠷ ᠦᠨᠡᠯᠡᠭᠳᠡᠵᠤ 1956 ᠤᠨ ᠳᠤ ︽ᠮᠤᠩᠭᠤᠯ ᠬᠡᠯᠡᠨ ᠤ ᠲᠤᠷᠠᠰᠬᠠᠯᠳᠤ ᠪᠢᠴᠢᠭ︾ ᠬᠡᠮᠡᠨ ᠨᠤᠮ ᠳᠤ ᠰᠤᠩᠭᠤᠭᠳᠠᠨ ᠤᠷᠤᠵᠤ ᠲᠠᠬᠢᠨ ᠬᠤᠷᠭᠤᠯᠵᠢᠨ ᠪᠠᠷ  ᠢᠶᠠᠷ ᠬᠡᠪᠯᠡᠭᠳᠡᠵᠤ ᠦᠩᠭᠡᠷᠡᠭᠰᠡᠨ ᠪᠦᠬᠡᠳ ᠤᠳᠤ ᠦᠪᠦᠷ ᠮᠤᠩᠭᠤᠯ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠨᠤᠮ ᠤᠨ ᠰᠠᠩ᠂ ᠦᠪᠦᠷ ᠮᠤᠩᠭᠤᠯ ᠤᠨ ᠨᠡᠶᠢᠭᠡᠮ ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠬᠦᠷᠢᠶᠡᠯᠡᠩ ᠤᠨ ᠨᠤᠮ ᠤᠨ ᠰᠠᠩ ᠤᠳ ᠲᠤ ᠰᠤᠳᠤᠯᠤᠯ ᠰᠢᠨᠵᠢᠯᠡᠯ ᠤᠨ ᠲᠤᠷᠠᠰᠬᠠᠯᠳᠤ ᠰᠤᠷᠪᠤᠯᠵᠢ ᠪᠢᠴᠢᠭ ᠢᠶᠠᠷ ᠬᠠᠳᠠᠭᠠᠯᠠᠭᠳᠠᠵᠤ ᠪᠤᠢ ᠃ ②           ᠨᠧᠴᠢᠨ ᠭᠤᠸᠠᠢ ᠨᠤᠳᠤᠭ ᠤᠨ ᠤᠯᠠᠨ ᠰᠠᠶᠢᠨ ᠮᠠᠯᠴᠢᠳ ᠢ ᠰᠤᠷᠪᠤᠯᠵᠢᠯᠠᠨ ᠲᠡᠳᠡᠨ ᠤ ᠲᠤᠷᠰᠢᠯᠭ᠎ᠠ ᠶᠢ ᠴᠤᠭᠯᠠᠭᠤᠯᠤᠨ ᠪᠤᠯᠪᠠᠰᠤᠷᠠᠭᠤᠯᠵᠤ ᠪᠠᠶᠢᠭᠠᠳ 1939 ᠤᠨ ᠳᠤ ᠵᠤᠬᠢᠶᠠᠨ ᠨᠠᠶᠢᠷᠠᠭᠤᠯᠤᠭᠰᠠᠨ ︽ᠠᠳᠤᠭᠤᠯᠠᠬᠤ ᠬᠦᠷᠦᠩᠭᠡ ᠶᠢᠨ ᠶᠡᠷᠦ ᠶᠢᠨ ᠮᠡᠳᠡᠯᠬᠡ︾ ᠬᠡᠰᠡᠨ ᠵᠤᠬᠢᠶᠠᠯ ᠨᠢ ᠮᠠᠰᠢ ᠰᠤᠨᠢᠷᠬᠠᠯᠳᠠᠢ ᠪᠠᠶᠢᠳᠠᠭ ᠶᠤᠮ᠃ ᠲᠡᠭᠦᠨ ᠳᠤ ᠲᠠᠪᠦᠨ ᠲᠦᠷᠦᠯ ᠤᠨ ᠮᠠᠯ ᠤᠨ ᠨᠠᠰᠤ ᠰᠢᠳᠤ᠂ ᠶᠠᠰᠤ ᠴᠢᠨᠠᠷ᠂ ᠡᠳ᠋ᠯᠡᠵᠤ᠂ ᠮᠠᠯᠵᠢᠬᠤ ᠦᠰᠭᠡᠵᠤ ᠦᠷᠡᠵᠢᠭᠦᠯᠬᠦ ᠪᠤᠯᠤᠨ ᠠᠰᠢᠭ ᠰᠢᠮ᠎ᠡ ᠶᠢ ᠨᠢ ᠬᠡᠷᠬᠢᠨ ᠠᠪᠬᠤ ᠳᠤ ᠬᠦᠷᠳᠡᠯ᠎ᠡ ᠠᠯᠢ ᠰᠠᠶᠢᠨ ᠠᠷᠭ᠎ᠠ ᠲᠤᠷᠰᠢᠯᠭ᠎ᠠ ᠶᠢ ᠵᠢᠭᠠᠭᠰᠠᠨ ᠪᠠᠶᠢᠳᠠᠭ᠃ ᠵᠢᠱᠢᠶᠡᠯᠡᠪᠡᠯ᠂ ᠨᠢᠭᠡᠨ ᠡᠮ᠎ᠡ ᠬᠤᠨᠢ ᠶᠢ ᠨᠠᠢᠮᠡ ᠤᠳᠠᠭ᠎ᠠ ᠦᠬᠢᠨ ᠬᠤᠷᠠᠭ᠎ᠠ ᠲᠦᠯᠯᠡᠭᠦᠯᠵᠤ ᠲᠠᠪᠢᠨ ᠬᠤᠶᠠᠷ ᠬᠤᠨᠢ ᠪᠤᠯᠭᠠᠨ ᠦᠷᠡᠵᠢᠭᠦᠯᠦᠭᠰᠡᠨ ᠨᠢᠭᠡᠨ ᠰᠤᠨᠢᠬᠠᠨ ᠬᠦᠰᠦᠨᠦᠭᠳᠦ ᠲᠠᠢ ᠪᠦᠭᠡᠳ ᠲᠡᠭᠦᠨ ᠤ ᠦᠵᠡᠭᠰᠡᠳ ᠪᠦᠬᠦᠨ ᠮᠠᠯ ᠦᠰᠬᠡᠬᠦ ᠵᠤᠷᠢᠭᠵᠢᠯ ᠤᠷᠤᠳᠠᠭ ᠠᠵᠠᠢ᠃ ᠡᠨᠡ ᠵᠤᠬᠢᠶᠠᠯ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠠᠷᠤᠭᠰᠠᠨ ᠮᠠᠶᠢᠷᠠᠨ ᠫᠡᠸ᠋ᠩᠰᠢᠩᠭᠡ ᠶᠢᠨ ᠪᠢᠴᠢᠭᠰᠡᠨ ᠤᠷᠤᠰᠢᠯ ᠲᠠᠢ ᠭᠠᠷ ᠪᠢᠴᠢᠮᠡᠯ ᠢᠶᠠᠷ ᠲᠠᠮᠵᠢᠨ ᠲᠠᠷᠬᠠᠵᠤ ᠪᠠᠶᠢᠪᠠ᠃ ᠡᠨᠡ ᠪᠢᠴᠢᠮᠡᠯ ᠢ ᠭᠤ᠂ ᠵᠠᠮᠶᠠᠩ ᠭᠤᠸᠠᠢ᠂ ︽ᠰᠤᠶᠤᠯ ᠤᠨ ᠬᠤᠪᠢᠰᠬᠠᠯ︾ ᠤᠨ ᠡᠮᠤᠨᠡᠬᠡᠨ ᠪᠤᠯᠳᠠᠯ᠎ᠠ ᠨᠢᠭᠡ ᠬᠤᠪᠢ ᠶᠢ ᠬᠢᠮᠠᠭᠠᠳᠠᠨ ᠬᠠᠳᠠᠭᠠᠯᠠᠵᠤ ᠪᠠᠶᠢᠵᠠᠢ᠃ ᠨᠧᠴᠢᠨ ᠠᠪᠦᠭᠠᠢ᠂ ᠵᠤᠬᠢᠶᠠᠯ ᠤᠷᠠᠯᠢᠭ ᠲᠤ ᠪᠠᠭ᠋ᠠᠳᠠᠢ ᠶᠢᠨ ᠤᠴᠢᠷ ᠂ ᠭᠤᠷᠪᠠᠨ ᠤᠳᠠᠰᠤᠳᠤ ᠬᠦᠭᠵᠢᠮ ᠢ ᠮᠠᠰᠢ ᠰᠠᠶᠢᠬᠠᠨ ᠴᠢᠪᠬᠠᠳᠠᠳᠠᠭ ᠪᠦᠬᠡᠳ ᠬᠤᠷᠢᠮ ᠤᠨ ᠦᠭᠡ᠂ ᠢᠷᠦᠭᠡᠯ ᠮᠠᠭᠳᠠᠭᠠᠯ᠂ ᠮᠤᠷᠢᠨ ᠴᠤᠯᠠ᠂ ᠪᠦᠬᠡ ᠶᠢᠨ ᠮᠡᠳᠡᠭᠦᠯᠦᠯᠳᠡ ᠵᠡᠷᠭᠡ ᠤᠷᠠᠨ ᠢᠷᠠᠭᠤ ᠰᠢᠯᠦᠭ ᠨᠠᠶᠢᠷᠠᠭ ᠲᠠᠢ ᠪᠠᠭ᠋ᠠᠷᠬᠠᠮ᠎ᠠ ᠰᠠᠶᠢᠬᠠᠨ ᠵᠤᠬᠢᠶᠠᠯ ᠪᠦᠳᠦᠭᠡᠯ ᠤᠯᠠᠨ ᠢ ᠪᠢᠴᠢᠭᠰᠡᠨ ᠭᠡᠳᠡᠭ᠃ ᠲᠡᠳᠡᠭᠡᠷ ᠵᠤᠬᠢᠶᠠᠯ ᠤᠳ ᠨᠢ ᠤᠳᠤ ᠤᠯᠳᠠᠬᠤ ᠦᠭᠡᠢ ᠪᠤᠯᠤᠭᠰᠠᠨ ᠨᠢ ᠲᠠᠩᠴᠢ ᠬᠠᠷᠠᠮᠰᠠᠯᠳᠠᠢ᠃          1944 ᠤᠨ ᠳᠤ᠂ ᠲᠠᠷᠬᠠᠨ ᠰᠢᠷᠡᠭᠡᠳᠦ ᠲᠠᠢ ᠬᠦᠤᠰᠢ ᠶᠢᠨ ᠬᠤᠪᠢᠯᠭᠠᠨ — ᠠᠭᠸᠠᠩᠳᠦ᠋ᠪᠳᠡᠨᠴᠦ᠋ᠯᠳᠦᠮ  ᠤᠨ ᠵᠠᠯᠠᠯᠭ᠎ᠠ ᠶᠢᠨ ᠨᠠᠶᠢᠷ ᠲᠡᠭᠡᠷ᠎ᠡ ᠬᠡᠯᠡᠭᠰᠡᠨ ᠢᠷᠤᠭᠡᠯ ᠠᠴᠠ ᠬᠡᠳᠦᠨ ᠪᠠᠳᠠᠭ ᠢ ᠰᠡᠶᠢᠷᠡᠭᠦᠯᠪᠡᠯ᠄          ︽ᠡᠷᠳᠡᠨ ᠤ ᠢᠳᠡᠭᠡᠨ ᠦᠭᠯᠢᠬᠡᠳᠦ ᠬᠤᠳᠠᠯᠠ ᠶᠢ ᠪᠠᠶᠠᠰᠬᠠᠭᠴᠢ ᠤᠷᠤᠨ ᠢ          ᠡᠳᠦᠭᠡᠬᠢ ᠮᠤᠩᠭᠤᠯ ᠤᠨ ᠤᠷᠤᠨ᠎ᠠ ᠨᠡᠭᠦᠯᠭᠡᠨ ᠢᠷᠡᠭᠰᠡᠨ ᠮᠡᠳᠦ ᠪᠠᠷ           ᠡᠨᠡ ᠬᠦ ︽ᠦᠨᠡᠨ ᠢᠶᠠᠷ ᠠᠪᠤᠷᠠᠭᠴᠢ ᠬᠡᠶᠢᠳ︾ ᠤᠨ ᠰᠠᠶᠢᠨ ᠬᠤᠪᠢᠳᠠᠨ          ᠡᠷᠬᠢᠮ ᠠᠶᠠᠭ᠎ᠠ ᠲᠠᠬᠢᠮᠯᠢᠭ᠌ ᠤᠨ ᠠᠷᠢᠭᠤᠨ ᠲᠦᠷᠢ ᠪᠠᠷ ᠴᠡᠩᠭᠡᠵᠤ          ᠪᠡᠯᠡᠷ ᠬᠠᠷᠠᠩᠭᠤᠢ ᠮᠠᠨ ᠤ ᠡᠨᠡ ᠪᠠ ᠬᠤᠶᠢᠳᠦ ᠶᠢ ᠬᠡᠶᠢᠬᠦᠯᠦᠷ᠎ᠠ           ᠪᠠᠳᠤᠳᠠᠢ ᠮᠠᠨ ᠤ ᠬᠤᠰᠢᠭᠤᠨ ᠤ ᠦᠷᠡᠵᠢᠵᠡᠪ ᠤᠨ ᠲᠦᠷᠦᠯ ᠳᠤᠷ ᠲᠠᠭᠠᠯᠠᠨ          ᠪᠠᠶᠠᠰᠬᠤᠯᠠᠩᠳᠤ ᠰᠠᠷᠠᠨ ᠤ ᠬᠦᠮᠦᠳᠡ ᠶᠢᠨ ᠲᠤᠭᠤᠷᠴᠤᠭ ᠠᠴᠠ ᠡᠰᠢᠯᠡᠨ ᠮᠡᠨᠳᠦᠯᠡᠭᠰᠡᠨ          ᠪᠠᠭᠰᠢ ᠬᠦᠤᠰᠢ ᠶᠢᠨ ᠢᠯᠭᠤᠭᠰᠠᠨ ᠲᠦᠷᠢ ᠶᠢ ᠰᠢᠷᠡᠭᠡᠨ᠎ᠡ ᠵᠠᠯᠠᠵᠤᠬᠤᠢ︾ ᠬᠡᠵᠤ ᠰᠢᠯᠦᠭᠯᠡᠭᠰᠡᠨ ᠪᠠᠶᠢᠳᠠᠭ ᠪᠦᠭᠡᠳ ᠪᠠᠰᠠ ᠨᠠᠶᠢᠷ ᠤᠨ ᠪᠦᠬᠡ ᠶᠢᠨ ᠮᠡᠳᠡᠭᠦᠯᠦᠯᠳᠡ ᠳᠤ᠄          ︽ᠨᠠᠷᠠᠨ ᠮᠡᠳᠦ ᠬᠡᠶᠢᠭᠦᠯᠦᠭᠰᠡᠨ ᠶᠡᠭᠡ ᠨᠢᠬᠦᠯᠡᠰᠢᠬᠦᠢ ᠪᠠᠷ ᠡᠨᠡᠷᠢᠵᠤ          ᠨᠠᠰᠤᠳᠠ ᠰᠠᠬᠢᠨ ᠠᠪᠤᠷᠠᠭᠴᠢ ᠪᠤᠭᠳᠠ ᠲᠠᠭᠡᠳᠦᠰ ᠡᠬᠢᠯᠡᠨ          ᠨᠠᠷᠮᠠᠢ ᠤᠯᠤᠰ ᠤᠨ ᠬᠠᠭᠠᠨ ᠲᠦᠷᠦ ᠶᠢᠨ ᠭᠤᠷᠪᠠᠨ ᠲᠤᠪᠴᠢᠶ᠎ᠠ ᠶᠢ          ᠨᠠᠶᠢᠷᠠᠮᠳᠠᠭᠤ ᠡᠶ᠎ᠡ ᠪᠠᠷ ᠵᠠᠰᠠᠨ ᠲᠡᠳᠬᠦᠭᠴᠢ ᠨᠤᠶᠠᠳ ᠲᠦᠰᠢᠮᠡᠳ          ᠨᠠᠢᠮᠠᠨ ᠦᠯᠵᠠᠶᠢᠳᠦ ᠴᠢᠯᠤᠭᠡ ᠤᠴᠠᠷᠠᠯ ᠲᠡᠭᠦᠰ ᠲᠦᠭᠡᠮᠡᠯ          ᠨᠠᠶᠢᠷ ᠬᠤᠷᠢᠮ ᠢ ᠲᠦᠪ ᠶᠤᠰᠤ ᠪᠠᠷ ᠦᠷᠨᠢᠭᠦᠯᠦᠨ ᠡᠭᠦᠰᠬᠡᠬᠦᠢ ᠳᠤ          ᠨᠠᠭᠠᠳᠤᠮ ᠤᠨ ᠮᠦᠷᠦ᠋ᠢᠴᠡᠯ ᠤᠨ ᠨᠢᠭᠡᠨ ᠵᠠᠭᠤᠨ ᠬᠤᠷᠢᠨ ᠨᠠᠢᠮᠠᠨ          ᠨᠠᠮᠪᠠᠳᠤ ᠪᠦᠬᠡ ᠲᠠᠯᠪᠢᠵᠤ ᠪᠠᠷᠢᠯᠳᠤᠭᠤᠯᠬᠤ ᠶᠢ ᠠᠶᠢᠯᠠᠳᠬᠠᠵᠤ ᠮᠡᠳᠡᠭᠦᠯᠦᠶ᠎ᠡ︾ ᠬᠡᠵᠦ ᠪᠢᠴᠢᠭᠰᠡᠨ ᠪᠠᠶᠢᠳᠠᠭ᠃           ᠨᠧᠴᠢᠨ ᠠᠪᠤᠭᠠᠢ ᠶᠢᠨ ᠦᠳᠡᠯᠦᠭᠡ ᠨᠠᠰᠤᠨ ᠤ ᠦᠶ᠎ᠡ ᠶᠢᠨ ᠪᠦᠳᠦᠭᠡᠯ ᠪᠤᠯᠬᠤ 1973 ᠤᠨ ᠳᠤ ᠪᠢᠴᠢᠭᠰᠡᠨ ︽ᠵᠦᠪ ᠪᠢᠴᠢᠯᠭᠡ ᠶᠢᠨ ᠲᠦᠷᠢᠮ ᠳᠤ ᠬᠤᠯᠪᠤᠭᠳᠠᠬᠤ ᠲᠦᠷᠪᠡᠨ ᠵᠦᠢᠯ ᠤᠨ ᠵᠠᠷᠴᠢᠮ︾ ᠬᠡᠰᠡᠨ ᠵᠤᠬᠢᠶᠠᠯ ᠢ ᠨᠢ ᠲᠡᠭᠦᠨ ᠲᠠᠢ ᠠᠷᠪᠠᠭᠠᠳ ᠵᠢᠯ ᠬᠠᠮᠳᠦ ᠠᠵᠢᠯᠯᠠᠭᠰᠠᠨ ᠡᠷᠳᠡᠨᠢᠰᠤᠪᠤᠳ ᠪᠠᠭᠰᠢ ᠨᠠᠨᠳᠢᠩᠨᠠᠨ ᠬᠠᠳᠠᠭᠠᠯᠠᠵᠤ ᠪᠠᠶᠢᠭᠰᠠᠨ  ᠢᠶᠠᠨ 1988 ᠤᠨ ᠳᠤ ᠠᠪᠠᠭ᠎ᠠ ᠬᠤᠰᠢᠭᠤᠨ ᠤ ︽ᠠᠯᠳᠠᠨ ᠲᠤᠯᠢ︾ ᠰᠡᠳᠬᠦᠯ ᠳᠤ ᠨᠡᠶᠢᠳᠡᠯᠡᠬᠦᠯᠵᠤ ᠨᠧᠴᠢᠨ ᠪᠠᠭᠰᠢ ᠶᠢ ᠲᠤᠷᠠᠳᠬᠠᠬᠤ ᠶᠢᠨ ᠲᠠᠭᠠᠤ ᠦᠷᠭᠡᠨ ᠤᠯᠠᠨ ᠮᠤᠩᠭᠤᠯ ᠬᠡᠯᠡ ᠪᠢᠴᠢᠭ ᠤᠨ ᠪᠠᠭᠰᠢ ᠠᠵᠢᠯᠳᠠᠨ ᠳᠤ ᠯᠠᠪᠯᠠᠯᠳᠠ ᠬᠦᠷᠳᠡᠭᠡᠯ ᠪᠤᠯᠭᠠᠭᠰᠠᠨ ᠪᠠᠶᠢᠪᠠ᠃          ᠠᠳᠡ ᠲᠤᠰ ᠵᠤᠬᠢᠶᠠᠯ ᠢ ᠪᠦᠬᠦ ᠤᠳᠬ᠎ᠠ ᠪᠠᠷ ᠨᠢ ᠰᠡᠶᠢᠷᠡᠭᠦᠯᠦᠶ᠎ᠡ᠃          ᠬᠡᠯᠡᠨ ᠤ ᠵᠦᠢ ᠶᠢᠨ ᠲᠤᠳᠤᠷ᠎ᠠ ᠵᠦᠪ ᠪᠢᠴᠢᠯᠭᠡ ᠶᠢᠨ ᠲᠦᠷᠢᠮ ᠳᠤ ᠬᠤᠯᠪᠤᠭᠳᠠᠬᠤ ᠲᠦᠷᠪᠡᠨ ᠵᠦᠢᠯ ᠤᠨ ᠵᠠᠷᠴᠢᠮ          ︵ᠨᠢᠭᠡ︶ ᠤᠯᠠᠮᠵᠢᠯᠠᠯ ᠤᠨ ᠵᠦᠢ ᠪᠠᠷᠢᠮᠳᠠᠯᠠᠬᠤ ᠵᠠᠷᠴᠢᠮ ᠤᠨ ᠦᠭᠡ ᠬᠡᠵᠦ ᠪᠠᠶᠢᠳᠠᠭ᠃ ᠲᠡᠷᠡ ᠨᠢ ᠤᠤᠯ  ᠠᠴᠠ ᠪᠠᠨ ᠤᠩᠰᠢᠬᠤ ᠠᠪᠢᠶ᠎ᠠ ᠲᠠᠢ ᠪᠠᠨ ᠨᠡᠶᠢᠴᠡᠬᠦ ᠦᠭᠡᠢ ᠳᠤᠰᠬᠠᠢ ᠲᠦᠷᠰᠦᠳᠦ ᠦᠰᠦᠭ ᠦᠭᠡᠰ ᠢᠶᠠᠷ ᠪᠢᠴᠢᠳᠡᠭ ᠦᠭᠡᠰ ᠢ ᠬᠡᠯᠡᠨ᠎ᠡ᠃ ᠵᠢᠱᠢᠶ᠎ᠡ ᠨᠢ᠂ ᠲᠡᠭᠷᠢ᠂ ᠨᠠᠢᠮᠠᠨ᠂ ᠭᠬᠢᠪ ︵ᠭᠬᠢᠪ ᠬᠠᠳᠠᠭ︶᠂ ᠭᠬᠢᠷ ᠲᠤᠭᠤᠰᠤ᠂ ᠭᠱᠠᠨ ᠵᠠᠭᠤᠷ᠎ᠠ᠂ ᠪᠠᠷᠰ᠂ ᠢᠷᠪᠢᠰ ᠬᠤᠶᠠᠳᠣᠭᠠᠷ᠂ ᠣᠮᠡᠷᠳᠠᠬᠤ ︵ᠮᠠᠷᠳᠠᠬᠤ︶ ᠁ ᠭᠡᠬᠦ ᠮᠡᠳᠣ᠃          ︵ᠬᠤᠶᠠᠷ︶ ᠲᠦᠷᠰᠣ ᠪᠠᠷ ᠢᠯᠭᠠᠬᠤ ᠵᠠᠷᠴᠢᠮ ᠤᠨ ᠦᠭᠡᠰ ᠭᠡᠵᠤ ᠪᠠᠶᠢᠳᠠᠭ᠃ ᠲᠡᠷᠡ ᠨᠢ ᠣᠩᠰᠢᠬᠤ ᠠᠶᠠᠯᠭᠤ ᠨᠢ ᠠᠳᠠᠯᠢᠪᠳᠣᠷ ᠪᠣᠯᠪᠠᠴᠣ ᠪᠢᠴᠢᠯᠭᠡ ᠠᠭᠤᠯᠭ᠎ᠠ ᠨᠢ ᠳᠣᠰᠪᠦᠷᠢ ᠣᠨᠳᠣᠣ ᠦᠭᠡᠰ ᠢ ᠬᠡᠯᠡᠨ᠎ᠠ᠃ ᠵᠢᠱᠢᠶ᠎ᠠ  ᠨᠢ᠄ ᠡᠪᠦᠷ — ᠡᠩᠭᠡᠷ ᠵᠠᠭᠠᠮ᠎ᠠ ᠶᠢᠨ ᠳᠣᠳᠣᠷ ᠳᠠᠯ᠎ᠠ᠃ ᠦᠪᠦᠷ — ᠠᠭᠤᠯᠠ ᠶᠢᠨ ᠦᠪᠦᠷ᠂ ᠦᠪᠡᠷ — ᠳᠣᠰ ᠪᠡᠶ᠎ᠡ ᠶᠢᠨ᠂ ᠮᠦᠷ — ᠵᠠᠮ ᠮᠦᠷ ᠤᠨ᠂ ᠮᠦᠷᠦ — ᠳᠠᠯᠥ ᠮᠦᠷᠦ ᠶᠢᠨ᠂ ᠳᠣᠮᠳᠠᠭᠤᠷ — ᠬᠤᠳᠠ ᠳᠣᠮᠳᠠᠭᠤᠷ ᠳᠠᠯ᠎ᠠ ᠳᠣᠮᠳᠠᠭᠤᠷ ᠭᠡᠬᠦ ᠮᠠᠳᠣ᠃ ᠳᠣᠨᠳᠠᠭᠤᠷ — ᠰᠠᠪᠠ ᠳᠣᠨᠳᠠᠭᠤᠷ ᠭᠡᠬᠦ ᠮᠡᠳᠣ᠃ ᠪᠦᠷ — ᠴᠦᠮ ᠪᠦᠭᠦᠳᠡᠭᠡᠷ᠂ ᠪᠦᠷᠢ — ᠳᠠᠭᠠᠪᠣᠷᠢ ᠦᠰᠦᠭ ᠤᠨ᠂ ᠳᠦᠭᠦᠷᠡᠩ — ᠳᠦᠭᠦᠷᠡᠩ ᠬᠦᠨᠳᠠᠢ ᠶᠢᠨ᠂ ᠳᠦᠭᠦᠷᠴᠦ ᠳᠦᠭᠦᠷᠦᠨ — ᠪᠢᠯᠬᠠᠵᠣ᠂ ᠡᠴᠦᠰᠯᠠᠬᠦ ᠮᠠᠳᠣ ᠶᠢᠨ᠂ ᠣᠷᠢᠳᠣ — ᠦᠩᠭᠡᠷᠡᠭᠰᠡᠨ ᠡᠷᠳᠡᠨ ᠤ᠂ ᠣᠷᠢᠳᠠ — ᠡᠮᠦᠨᠡᠬᠢ ᠶᠢᠨ᠂ ᠣᠷᠢᠳ ᠬᠤᠵᠢᠳ — ᠣᠳᠠᠭ᠎ᠠ ᠳᠠᠷᠠᠭ᠎ᠠ ᠭᠡᠬᠦ ᠪᠣᠶᠣ ᠣᠷᠢᠳᠴᠢᠯᠠᠬᠤ ᠭᠡᠬᠦ ᠮᠡᠳᠣ  ᠶᠢᠨ᠃ ᠬᠠᠶᠢᠷ᠎ᠠ — ᠬᠠᠶᠢᠷᠠᠯᠠᠬᠤ ᠬᠠᠯᠠᠮᠵᠢᠯᠠᠬᠤ ᠶᠢᠨ᠃ ᠬᠠᠶᠢᠷ — ᠬᠠᠶᠢᠷ ᠴᠢᠯᠠᠭᠤ ᠭᠡᠬᠦ ᠮᠡᠳᠣ ᠶᠢᠨ᠃ ᠳᠣᠣᠷ᠎ᠠ — ᠳᠡᠭᠡᠷ᠎ᠡ ᠳᠣᠣᠷ᠎ᠠ ᠶᠢᠨ᠂ ᠳᠣᠣᠷ — ᠰᠦᠯᠵᠢᠮᠡᠯ ᠶᠠᠭᠤᠮ᠎ᠠ ᠶᠢᠨ ᠳᠣᠣᠷ ᠢ ᠬᠡᠯᠡᠨ᠎ᠡ᠃ ᠡᠭᠦᠨ  ᠠᠴᠠ ᠭᠠᠳᠠᠨ᠎ᠠ ᠣᠷᠭᠤᠭᠰᠠᠨ ᠮᠣᠳᠣ᠃ ᠣᠷᠭᠤᠭᠰᠠᠨ ᠬᠦᠮᠥᠨ ᠭᠡᠬᠦ ᠮᠡᠳᠣ ᠪᠣᠶᠣ ᠪᠣᠭᠤᠨᠢ ᠣᠬᠤᠷ ᠤᠨ ᠣᠷᠳᠣ᠂ ᠡᠮᠦᠨ᠎ᠡ ᠵᠦᠭ ᠤᠨ ᠣᠷᠳᠣ ᠭᠡᠬᠦ ᠮᠡᠳᠣ ᠶᠢᠨ ᠦᠭᠦᠯᠡᠪᠦᠷᠢ ᠶᠢᠨ ᠠᠭᠤᠯᠭ᠎ᠠ ᠪᠠᠷ ᠢᠶᠠᠨ ᠵᠦᠪ ᠳᠠᠭᠤᠳᠠᠯᠭ᠎ᠠ ᠨᠢ ᠢᠯᠡᠷᠡᠳᠡᠭ ᠦᠭᠡᠰ ᠴᠦ ᠪᠣᠢ᠃           ︵ᠭᠤᠷᠪᠠ︶ ᠦᠭᠡᠰ ᠤᠨ ᠵᠦᠢ ᠶᠢ ᠪᠠᠷᠢᠮᠳᠠᠯᠠᠬᠤ ᠵᠡᠷᠴᠢᠮ ᠤᠨ ᠦᠭᠡᠰ ᠭᠡᠵᠤ ᠪᠠᠶᠢᠳᠠᠭ᠂ ᠲᠡᠷᠡ ᠨᠢ᠄ ᠬᠤᠪᠢᠯᠬᠤ ᠵᠢᠷᠭᠤᠭ᠎ᠠ᠂ ᠬᠤᠪᠢᠯᠭᠠᠬᠤ ᠬᠤᠷᠢᠨ ᠬᠤᠶᠠᠷ ᠦᠰᠦᠭ ᠤᠨ ᠲᠦᠷᠢᠮ ᠢᠶᠠᠷ ᠪᠦᠳᠦᠭᠰᠡᠨ ᠦᠭᠡᠰ ᠢ ᠭᠡᠯᠡᠳᠡᠭ᠃ ᠬᠤᠪᠢᠯᠬᠤ ᠵᠢᠷᠭᠤᠭ᠎ᠠ ᠭᠡᠳᠡᠭ ᠨᠢ᠄ ᠨ᠊᠂ ᠪ᠊᠂ ‍ᠳ᠊᠂ ︵ᠳ᠋᠊︶᠂ ᠷ᠊᠂ ᠰ᠊᠂ ᠯ᠊ ᠤᠨ ᠵᠢᠷᠭᠤᠭᠠᠨ ᠳᠡᠪᠢᠰᠭᠡᠷ ᠦᠰᠦᠭ ᠢ ᠬᠡᠯᠡᠵᠣ ᠪᠠᠶᠢᠨ᠎ᠠ᠃ ᠡᠳᠡᠭᠡᠷ ᠬᠡᠵᠢᠶᠡᠳᠡ ᠮᠡᠷᠳᠡᠬᠤ ᠦᠭᠡᠢ ᠪᠠᠷ ᠴᠡᠭᠡᠵᠢᠯᠡᠬᠦ ᠶᠢᠨ ᠲᠦᠯᠦᠭᠡ ︽ᠨᠠᠪᠳᠠᠷᠰᠠᠯ︾ ᠭᠡᠳᠡᠭ ᠦᠭᠡ ᠪᠠᠷ ᠨᠡᠷᠡᠯᠡᠨ ᠴᠡᠭᠡᠵᠢᠯᠡᠳᠡᠭ ᠪᠢᠯᠡ᠃ ᠳᠡᠭᠦᠨ ᠵᠢᠱᠢᠶ᠎ᠠ ᠤ ᠣᠣᠯ ᠦᠭᠡ ᠪᠠᠷ ᠨᠢ ᠲᠦᠬᠦᠮ ᠵᠢᠱᠢᠶᠠᠯᠠᠪᠡᠯ ︽ᠬᠠᠨ᠂ ᠠᠪ᠂ ᠣᠳ᠂ ᠰᠣᠷ᠂ ᠪᠣᠰ᠂ ᠣᠯ︾ ᠭᠡᠭᠦ ᠮᠡᠳᠣ ᠶᠢᠨ ᠵᠠᠬᠢᠷᠬᠤ ᠦᠢᠯᠡ ᠦᠬᠡ  ᠨᠦᠭᠦᠳ ᠪᠣᠯᠣᠨ᠎ᠠ᠃ ᠵᠠᠯᠭᠠᠭᠠᠳ ᠬᠤᠪᠢᠯᠭᠠᠬᠤ ᠬᠤᠷᠢᠨ ᠬᠤᠶᠠᠷ ᠦᠰᠦᠭ ᠢ ᠳᠣᠰᠪᠦᠷᠢ ᠳᠣᠳᠣᠷᠬᠠᠶᠢᠯᠠᠪᠠᠯ᠄          1᠂ ᠶᠡᠷᠦ ᠶᠢᠨ ᠦᠶ᠎ᠡ ᠦᠰᠦᠭ ︵‍ᠨ᠎ᠠ᠂ ᠨᠠᠮ᠂ ‍ᠮ᠎ᠠ᠂ ‍ᠮᠠᠯ᠂ ‍ᠮᠠᠭᠴᠠ᠂ ‍ᠮᠡᠭᠴᠡ᠂ ‍ᠮᠣᠢ᠂ ᠯᠤᠭ᠎ᠠ᠂ ᠯᠦᠬᠡ᠂ ︵‍ᠯ᠎ᠠ︶᠂ ᠷᠷ᠎ᠠ᠂ ᠶᠷ᠎ᠠ᠂ ‍ᠶ᠎ᠠ᠂ ᠰᠢ︶ ᠵᠡᠷᠭᠡ ᠶᠢᠨ 13 ᠦᠰᠦᠭ ᠪᠠᠶᠢᠳᠠᠭ᠃          2. ᠤᠷᠳᠤᠳᠬᠠᠯ ᠭᠠ ᠶᠢᠨ ‍ᠭᠠ᠊᠂ ᠭᠡ᠊᠂ ‍ᠭᠤ᠋᠂ ‍ᠭᠤ᠋᠂ ᠭᠦ᠂ ᠭᠦ ᠶᠢᠨ ᠵᠢᠷᠭᠤᠭᠠᠨ ᠦᠭᠡ ᠦᠰᠦᠭ ᠪᠤᠢ᠃          3. ᠲᠡᠪᠢᠰᠭᠡᠷ ᠦᠰᠦᠭ ᠤᠨ ᠶᠠᠮᠠᠷ ᠨᠢᠭᠡᠨ ᠦᠭᠡᠨ ᠳᠤ ᠬᠤᠭᠤᠷᠤᠨᠳᠤ ᠪᠠᠨ ᠰᠢᠭᠤᠳ ᠤᠴᠠᠷᠠᠬᠤ ᠳᠤ ᠬᠦᠷᠪᠡᠯ ᠲᠡᠭᠡᠷᠡᠬᠢ ᠦᠭᠡᠰ ᠲᠠᠢ ᠠᠳᠠᠯᠢ ᠪᠠᠷ ᠵᠠᠪᠠᠯ ᠬᠡᠳᠡᠰᠦᠨ ︵‍ᠦ᠊︶ ᠡᠭᠡᠰᠢᠭ ᠢᠶᠠᠷ ᠬᠤᠯᠪᠤᠨ ᠠᠮᠢᠯᠠᠭᠤᠯᠳᠠᠭ ᠪᠤᠯᠬᠤᠷ ︽ᠨ᠊ ᠭ᠊ ︵ᠭ᠊︶ ᠯ᠊︾ ᠤᠨ ᠭᠤᠷᠪᠠᠨ ᠲᠡᠪᠢᠰᠭᠡᠷ ᠦᠰᠦᠭ ᠨᠡᠮᠡᠭᠳᠡᠭᠡᠳ ᠲᠤᠳᠤᠷ᠎ᠠ ᠪᠠᠨ ᠭᠤᠷᠪᠠᠨ ᠵᠦᠢᠯ  ᠤᠨ ᠢᠯᠭᠠᠭ᠎ᠠ ᠲᠠᠢ ᠬᠤᠪᠢᠯᠭᠠᠬᠤ ᠬᠤᠷᠢᠨ ᠬᠤᠶᠠᠷ ᠦᠰᠦᠭ ᠤᠨ ᠪᠦᠷᠢᠳᠬᠡᠯ ᠭᠠᠷᠴᠠᠢ᠃ ᠲᠡᠳᠡᠭᠡᠷ ᠨᠢ ᠲᠦᠭᠦᠮ  ᠢᠶᠠᠷ ᠵᠢᠱᠢᠶᠡᠯᠡᠪᠡᠯ᠄          ⑴ ᠬᠠᠨ — ᠬᠠᠨᠤᠨ᠎ᠠ ᠬᠠᠨᠤᠨᠠᠮ ᠬᠠᠨᠤᠨ ᠬᠠᠨᠤᠭᠠᠳ᠃          ⑵ ᠠᠪ — ᠠᠪᠤᠮ᠎ᠠ ᠠᠪᠤᠰᠢ ᠠᠪᠤᠯ ︵ᠦᠭᠡᠢ︶ ᠠᠪᠤᠮᠠᠯ ᠠᠪᠤᠭᠠᠳ ᠠᠪᠤᠭᠠᠳᠤᠢ ᠠᠪᠤᠨ ᠠᠪᠤᠭᠰᠠᠨ ᠠᠪᠤᠭᠤᠵᠠᠢ          ⑶ ᠤᠳ — ᠤᠳᠤᠮᠠᠭᠴᠠ ᠤᠳᠤᠯᠤᠭ᠎ᠠ ︵ᠤᠳᠤᠯ᠎ᠠ︶ ᠤᠳᠤᠮᠤᠢ ᠤᠳᠤᠭᠠᠰᠠᠢ ᠤᠳᠤᠨ ᠤᠳᠤᠭᠰᠠᠨ          ⑷ ᠰᠤᠷ᠂ ᠬᠦᠷ — ᠰᠤᠷᠤᠮᠠᠭᠴᠠ᠂ ᠰᠤᠷᠤᠭᠠᠳ᠂ ᠬᠦᠷᠦᠮᠡᠭᠴᠡ᠂ ᠬᠦᠷᠦᠭᠡᠳ᠂ ᠬᠦᠷᠦᠭᠡᠳᠦᠢ᠂ ᠬᠦᠷᠦᠭᠦᠵᠠᠢ᠂ ᠬᠦᠷᠦᠨ ᠬᠦᠷᠦᠭᠰᠡᠨ᠂ ᠬᠦᠷᠦᠰᠢ ᠬᠦᠷᠦᠯ ᠦᠭᠡᠢ᠃          ⑸ ᠪᠤᠰ — ᠪᠤᠰᠤᠶ᠎ᠠ ᠪᠤᠰᠤᠷ᠎ᠠ ᠪᠤᠰᠤᠯᠤᠭ᠎ᠠ ᠬᠦᠷᠦᠯᠦᠭᠡ ︵‍ᠯ᠎ᠡ︶ ᠪᠤᠰᠤᠭᠠᠳᠤᠢ᠂ ᠪᠤᠰᠤᠮᠠᠭᠴᠠ ᠂ ᠪᠤᠰᠤᠭᠰᠠᠨ ᠪᠤᠰᠤᠨ ᠪᠤᠰᠤᠯ ᠦᠭᠡᠢ ᠬᠡᠬᠦ ᠮᠡᠳᠦ ᠪᠠᠷ ᠮᠡᠳᠡᠭᠳᠡᠨ᠎ᠡ᠃           ⑹ ᠤᠯ — ᠤᠯᠤᠨ᠎ᠠ ᠤᠯᠤᠨᠠᠮ ᠤᠯᠤᠶ᠎ᠠ ᠤᠯᠤᠯ᠎ᠠ ᠤᠯᠤᠭᠰᠠᠨ ᠤᠯᠤᠭᠤᠵᠠᠢ ᠤᠯᠤᠰᠢ ᠤᠯᠤᠯ ᠦᠭᠡᠢ ᠤᠯᠤᠮ᠎ᠠ ᠦᠭᠡᠢ ᠁ ᠭᠡᠬᠦ ᠵᠡᠷᠭᠡ ᠪᠠᠷ ᠪᠢᠴᠢᠭᠳᠡᠨ᠎ᠡ᠃ ᠲᠡᠭᠡᠷᠡᠬᠢ ᠦᠰᠦᠭ ᠤᠳ ᠡᠨᠡ ᠮᠡᠳᠦ ᠪᠠᠷ ᠬᠤᠪᠢᠰᠴᠤ ᠪᠠᠶᠢᠪᠠᠴᠤ ᠤᠤᠯ ᠦᠭᠡ ᠶᠢᠨ ᠦᠨᠳᠦᠰᠦᠨ ᠠᠶᠠᠯᠭᠤ  ᠨᠢ ᠶᠡᠷᠦ ᠬᠤᠪᠢᠷᠠᠳᠠᠭ ᠦᠭᠡᠢ᠃ ᠰᠢᠳᠦᠨ ᠡᠭᠡᠰᠢᠭ ᠢᠶᠠᠷ ᠡᠭᠡᠰᠢᠭᠯᠡᠭᠰᠡᠨ ᠲᠡᠪᠢᠰᠭᠡᠷ ᠲᠠᠢ ᠦᠭᠡ ᠪᠤᠯ ᠲᠡᠭᠡᠷᠡᠬᠢ ᠦᠭᠡᠰ ᠤᠨ ᠲᠤᠭᠠᠨ ᠳᠤ ᠪᠠᠭᠳᠠᠬᠤ ᠦᠭᠡᠢ᠃ ᠵᠢᠱᠢᠶᠡᠯᠡᠪᠡᠯ᠂ ᠨᠠᠶᠢᠷ — ᠨᠠᠶᠢᠷᠠᠮ ᠨᠠᠶᠢᠷᠠᠯ ᠨᠠᠶᠢᠷᠠᠭᠤᠯᠬᠤ ᠬᠡᠵᠦ ᠰᠢᠳᠦ ᠪᠠᠷ ᠡᠭᠡᠰᠢᠭ ᠤᠷᠤᠭᠤᠯᠤᠨ ᠪᠢᠴᠢᠳᠡᠭ᠃ ᠬᠡᠪᠡᠴᠦ ᠡᠶᠢᠮᠦᠷᠬᠦ ᠦᠭᠡᠰ ᠨᠢ ᠴᠦᠬᠡᠨ᠂ ᠬᠡᠳᠡᠰᠦᠨ ᠡᠭᠡᠰᠢᠭ ᠲᠠᠢ  ᠨᠢ ᠤᠯᠠᠨ ᠪᠠᠶᠢᠳᠠᠭ ᠶᠤᠮ ᠪᠠᠶᠢᠨ᠎ᠠ᠃          ︵ᠲᠦᠷᠪᠡ︶ ᠠᠪᠢᠶ᠎ᠠ ᠶᠢᠨ ᠵᠦᠢ ᠶᠢ ᠪᠠᠷᠢᠮᠳᠠᠯᠠᠬᠤ ᠵᠠᠷᠴᠢᠮ ᠤᠨ ᠦᠭᠡᠰ ᠬᠡᠵᠦ ᠪᠠᠶᠢᠳᠠᠭ᠃ ᠲᠡᠷᠡ ᠨᠢ ᠤᠩᠰᠢᠯᠭ᠎ᠠ ᠪᠢᠴᠢᠯᠭᠡ ᠨᠢ ᠶᠠᠭ ᠠᠪ ᠠᠳᠠᠯᠢᠬᠠᠨ ᠪᠠᠶᠢᠳᠠᠭ ᠦᠭᠡᠰ ᠢ ᠬᠡᠯᠡᠨ᠎ᠡ᠃ ᠵᠢᠱᠢᠶ᠎ᠡ ᠨᠢ᠄ ᠨᠤᠮ ᠪᠢᠴᠢᠭ᠂ ᠲᠡᠪᠳᠡᠷ ᠬᠠᠷᠠᠨᠳᠠ᠂ ᠲᠦᠯ ᠮᠠᠯ᠂ ᠭᠠᠷ ᠬᠦᠯ ᠬᠡᠬᠦ ᠮᠡᠳᠦ ᠶᠢᠨ ᠤᠯᠠᠨ ᠨᠡᠷ᠎ᠡ ᠦᠭᠡ ᠪᠤᠶᠦ ᠵᠠᠬᠢᠷᠬᠤ ᠦᠢᠯᠡ  ᠨᠦᠭᠦᠳ ᠤᠯᠠᠨ ᠪᠤᠢ᠃          ᠲᠠᠭᠠᠯᠳᠤᠭᠤᠯᠤᠯ          ᠲᠠᠬᠢᠭᠠᠳ ᠨᠢᠭᠡ ᠬᠡᠯᠡᠪᠡᠯ ᠬᠤᠪᠢᠯᠳᠠᠭ ᠦᠭᠡᠰ ᠭᠠᠭᠴᠠ ᠡᠨᠠᠤᠬᠡᠨ ᠲᠡᠳᠦᠢ ᠪᠢᠰᠢ᠂ ᠤᠤᠯ ᠤᠨ ᠲᠡᠪᠢᠰᠭᠡᠷ ᠦᠰᠦᠭ ᠢ ᠨᠢ ᠦᠭᠡᠷ᠎ᠠ ᠶᠠᠩᠵᠤ ᠶᠢᠨ ᠲᠡᠪᠢᠰᠭᠡᠷ ᠪᠤᠯᠭᠠᠨ ᠰᠤᠯᠢᠵᠤ ᠪᠢᠴᠢᠳᠡᠭ ᠦᠭᠡᠰ ᠴᠦ ᠪᠠᠶᠢᠳᠠᠭ᠃ ᠵᠢᠱᠢᠶᠡᠯᠡᠪᠡᠯ᠄ ᠦᠭᠡ ᠶᠢᠨ ᠲᠤᠮᠳᠡ ᠤᠷᠤᠭᠰᠠᠨ ‍ᠨ᠋᠊ ‍ᠨ ᠲᠡᠪᠢᠰᠭᠡᠷ ᠲᠠᠢ ᠦᠰᠦᠭ ᠲᠤ ‍ᠨᠠ ᠬᠠ ᠭᠠ ᠶᠢᠨ ᠭᠤᠷᠪᠠᠨ ᠲᠦᠷᠦᠯ ᠤᠨ ᠦᠰᠦᠭ ᠤᠨ ᠠᠯᠢ ᠨᠢᠭᠡᠨ ᠢ ᠨᠢ ᠰᠢᠭᠤᠳ ᠵᠠᠯᠭᠠᠵᠤ ᠪᠢᠴᠢᠪᠡᠯ ᠢ ᠲᠡᠪᠢᠰᠭᠡᠷ ᠪᠤᠯᠭᠠᠨ ᠰᠤᠯᠢᠵᠤ ᠪᠢᠴᠢᠳᠡᠭ ᠪᠠᠶᠢᠨ᠎ᠠ᠃ ᠵᠢᠱᠢᠶ᠎ᠡ ᠨᠢ᠄ ᠲᠠᠶᠢᠰᠤᠨ᠂ ᠲᠠᠶᠢᠰᠦᠭᠨᠠᠬᠤ᠂ ᠲᠠᠷᠤᠨ᠂ ᠲᠠᠷᠤᠩᠭᠤᠶᠢᠯᠠᠬᠤ ᠬᠡᠬᠦ ᠪᠤᠶᠤ ᠬᠠᠨ — ᠬᠠᠨᠵᠤ ᠬᠡᠬᠦ ᠵᠡᠷᠭᠡ ᠦᠭᠡᠰ ᠢ ᠢᠩᠭᠢᠵᠤ ᠪᠢᠴᠢᠳᠡᠭ ᠪᠠᠶᠢᠳᠠᠯ᠎ᠠ ᠪᠠᠨ ᠬᠠᠶᠢᠨ᠂ ᠬᠠᠩᠬᠤ᠂ ᠬᠠᠩᠭᠠᠬᠤ ᠬᠡᠵᠦ ᠪᠢᠴᠢᠳᠡᠭ᠃ ᠲᠡᠭᠦᠨᠴᠢᠯᠡᠨ ᠪᠠᠳᠠᠷᠠᠨ — ᠪᠠᠳᠠᠷᠠᠩᠭᠤᠢ᠂ ᠤᠷᠤᠰᠢᠨ ᠤᠷᠤᠰᠢᠩᠭᠤᠢ᠂ ᠲᠡᠯᠭᠡᠷᠡᠨ ᠲᠡᠯᠭᠡᠷᠡᠩᠭᠦᠢ ᠬᠡᠬᠦ ᠮᠡᠳᠦ ᠶᠢᠨ ᠦᠭᠡᠰ ᠠᠷᠪᠢᠨ ᠪᠠᠶᠢᠳᠠᠭ᠃ ᠪᠠᠰᠠ ᠦᠢᠯᠡ ᠦᠭᠡ ᠶᠢᠨ ︵ᠪᠠ︶ ᠦᠶ᠎ᠡ ᠦᠰᠦᠭ᠂ ᠦᠭᠪᠡ᠂ ᠦᠭᠬᠦᠪᠡᠰᠦ ᠬᠡᠬᠦ ᠦᠭᠡᠰ ᠤᠨ ᠤᠤᠯ ᠤᠨ ᠲᠡᠪᠢᠰᠭᠡᠷ ᠦᠰᠦᠭ ᠢ ᠬᠤᠪᠢᠯᠭᠠᠬᠤ ᠦᠭᠡᠢ ᠠᠳᠠᠯ᠎ᠠ ᠪᠠᠨ ᠬᠠᠷᠢᠨ ᠦᠶ᠎ᠡ ᠪᠠ ᠨᠢ ᠤᠤᠯ ᠤᠨ ‍ᠪ ᠲᠡᠪᠢᠰᠭᠡᠷ ᠢᠶᠠᠨ ᠬᠤᠪᠢᠯᠭᠠᠵᠤ ᠠᠪ ᠬᠡᠰᠡᠨ ᠢᠵᠠᠭᠤᠷ ᠦᠭᠡ ᠶᠢ ᠠᠪᠤᠪᠠ ᠠᠪᠤᠪᠠᠢ ᠬᠡᠵᠦ ᠡᠭᠡᠰᠢᠭᠳᠡᠢ ᠪᠤᠯᠭᠠᠨ ᠪᠢᠴᠢᠳᠡᠭ ᠮᠦᠷᠳᠡᠭᠡᠨ ᠪᠠᠰᠠ ᠬᠦᠪᠬᠦ ᠵᠢᠪᠬᠦ ᠬᠡᠬᠦ ᠦᠭᠡᠰ ᠲᠤ ᠤᠷᠳᠤᠳᠬᠠᠯ ᠭᠠ ᠶᠢᠨ ᠦᠶ᠎ᠡ  ᠨᠦᠭᠦᠳ ᠠᠴᠠ ᠪᠤᠶᠤ ᠲᠡᠪᠢᠰᠭᠡᠷ ᠦᠰᠦᠭ ᠵᠠᠯᠭᠠᠨ ᠪᠢᠴᠢᠪᠡᠯ ᠬᠦᠪᠪᠦᠭᠡᠳ ᠵᠢᠪᠪᠦᠨ ᠵᠢᠪᠦᠭᠰᠡᠨ ᠦᠭᠬᠦᠨ ᠦᠭᠬᠦᠭᠰᠡᠨ ᠦᠭᠬᠦᠮᠤᠢ ᠦᠭᠬᠦᠭᠡᠳᠦᠢ ᠬᠡᠵᠦ ᠪᠦᠬᠦᠯᠢ ᠪᠦ᠋ ᠬᠦ᠋ ᠦᠶ᠎ᠡ ᠪᠠᠷ ᠬᠠᠯᠠᠭᠯᠠᠨ ᠪᠢᠴᠢᠵᠤ ᠪᠠᠶᠢᠨ᠎ᠠ᠃ ᠡᠨᠡ ᠮᠡᠳᠦ ᠶᠢᠨ ᠵᠢᠱᠢᠶ᠎ᠡ ᠶᠢ ᠠᠳᠡ ᠬᠦᠷᠳᠡᠯ᠎ᠡ ᠪᠢᠴᠢᠭᠡᠳ ᠤᠯᠠᠨ ᠲᠦᠮᠡᠨ ᠤ ᠲᠤᠳᠤᠷ᠎ᠠ ᠦᠩᠭᠡᠷᠡᠭᠰᠡᠨ ᠤ ᠦᠭᠡ ᠦᠰᠦᠭ ᠢ ᠲᠦᠭᠦᠮ ᠬᠢᠯᠪᠠᠷ ᠪᠤᠯᠭᠠᠨ ᠦᠭᠡᠷᠡᠴᠢᠯᠡᠨ᠎ᠡ ᠭᠡᠳᠡᠭ ᠦᠭᠡ ᠶᠠᠷᠢᠶ᠎ᠠ ᠪᠠᠶᠢᠳᠠᠭ ᠪᠤᠯᠪᠠᠴᠤ ᠮᠠᠤ ᠵᠦᠰᠢ ᠶᠢᠨ ᠵᠤᠬᠢᠶᠠᠯ ᠪᠤᠯᠤᠨ ᠲᠦᠪ ᠪᠠ ᠤᠷᠤᠨ ᠤ ᠬᠡᠪ ᠲᠠᠷᠤᠮᠠᠯᠠᠯ ᠪᠢᠴᠢᠭ ᠲᠤ ᠴᠦᠮ ᠤᠤᠯ ᠶᠤᠰᠤᠭᠠᠷ ᠨᠢ ᠬᠡᠪᠯᠡᠨ ᠲᠠᠷᠤᠮᠠᠯᠠᠭᠰᠠᠭᠠᠷ ᠪᠠᠶᠢᠬᠤ ᠪᠦᠭᠡᠳ ᠬᠦᠩᠴᠠᠨᠳᠡᠩ ᠨᠠᠮ ᠪᠤᠯᠤᠨ ᠮᠠᠤ ᠵᠦᠰᠢ ᠶᠢᠨ ᠬᠤᠪᠢᠰᠬᠠᠯᠳᠤ ᠲᠦᠷᠦ ᠶᠢᠨ ᠪᠤᠳᠤᠯᠭ᠎ᠠ ᠳᠤ ᠴᠦᠬᠡᠨ ᠲᠤᠭᠠᠲᠤ ᠦᠨᠳᠤᠰᠤᠳᠡᠨ ᠤ ᠦᠭᠡ ᠬᠡᠯᠡ ᠦᠰᠦᠭ ᠪᠢᠴᠢᠭ ᠢ ᠬᠦᠢᠳᠦᠳᠬᠡᠨ ᠬᠦᠭᠵᠢᠭᠦᠯᠦᠨ᠎ᠡ ᠬᠡᠵᠦ ᠪᠠᠶᠢᠬᠤ ᠪᠤᠯᠬᠤᠷ ᠤᠨᠴᠠᠭᠠᠢ ᠬᠤᠪᠢᠷᠠᠯᠳᠠ ᠲᠠᠢ ᠦᠭᠡᠰ ᠢ ᠪᠠᠭ᠎ᠠ ᠲᠦᠭᠦᠮ ᠢᠶᠠᠷ ᠡᠮᠬᠢᠳᠬᠡᠪᠡᠯ ᠤᠯᠠᠨ ᠪᠠᠭᠰᠢ ᠨᠠᠷ ᠤᠨ ᠵᠢᠭᠠᠬᠤ ᠪᠠ ᠰᠤᠷᠤᠭᠴᠢᠳ ᠤᠨ ᠪᠢᠴᠢᠭᠰᠡᠨ ᠢ ᠵᠠᠯᠠᠷᠠᠭᠤᠯᠤᠨ ᠵᠠᠰᠠᠬᠤ ᠳᠤ ᠲᠦᠭᠦᠮ ᠪᠤᠯᠬᠤ ᠪᠤᠯᠪᠠᠤ ᠬᠡᠵᠦ ᠮᠤᠩᠬᠠᠭᠳᠠᠨ ᠰᠠᠨᠠᠭᠰᠠᠨ ᠳᠠᠭᠠᠨ ᠲᠡᠭᠡᠷᠡᠬᠢ ᠬᠡᠳᠦᠨ ᠦᠭᠡᠰ ᠢ ᠡᠷᠢᠶᠡᠯ ᠦᠭᠡᠢ ᠪᠠᠷ ᠪᠢᠴᠢᠯ᠎ᠡ᠂ ᠬᠦᠰᠡᠬᠦ ᠨᠢ ᠤᠯᠠᠨ ᠪᠠᠭᠰᠢ ᠨᠠᠷ ᠠᠭᠤᠴᠢᠯᠠᠨ ᠵᠦᠪᠰᠢᠶᠡᠷᠡᠪᠡᠯ᠂ ᠪᠤᠷᠤᠭᠤ ᠶᠢ ᠨᠢ ᠵᠠᠯᠠᠷᠠᠭᠤᠯᠤᠨ᠂ ᠲᠤᠳᠠᠭᠤ ᠶᠢ ᠨᠢ ᠨᠡᠮᠡᠵᠤ ᠤᠯᠠᠮ ᠬᠦᠨᠵᠡᠬᠡᠢ ᠲᠡᠭᠦᠯᠳᠡᠷ ᠪᠤᠯᠭᠠᠵᠤ ᠬᠡᠷᠡᠭᠯᠡᠬᠦ ᠪᠤᠯᠪᠠᠤ︕          ᠵᠦᠪ ᠪᠢᠴᠢᠬᠦ ᠶᠢᠨ ᠲᠤᠬᠠᠢ ᠪᠤᠯ ᠨᠠᠳᠠ ᠳᠤ ᠬᠠᠭᠤᠴᠢᠨ ᠤ ᠮᠤᠳᠤᠨ ᠬᠡᠪ ᠲᠠᠷᠤᠮᠠᠯᠠᠯ ᠪᠢᠴᠢᠭ ᠠᠴᠠ ᠲᠡᠭᠦᠵᠤ ᠠᠪᠤᠭᠰᠠᠨ ᠪᠤᠶᠤ ᠵᠦᠪ ᠪᠢᠴᠢᠯᠭᠡ ᠳᠡᠭᠡᠨ ᠰᠠᠶᠢᠨ ᠬᠦᠮᠦᠰ ᠠᠴᠠ ᠬᠠᠭᠤᠯᠤᠨ ᠲᠡᠮᠳᠡᠭᠯᠡᠵᠤ ᠠᠪᠤᠭᠰᠠᠨ ᠬᠤᠪᠢᠯᠤᠭᠴᠢ ᠦᠰᠦᠭ ᠤᠳ ᠤᠨ ᠲᠤᠬᠠᠢ ᠪᠠᠭ᠎ᠠ ᠰᠠᠭ᠎ᠠ ᠲᠡᠮᠳᠡᠭᠯᠡᠭᠰᠡᠨ ᠨᠢᠭᠡᠨ ᠪᠠᠭ᠎ᠠ ᠲᠡᠪᠳᠡᠷ ᠪᠠᠶᠢᠭᠰᠠᠨ ᠶᠤᠮᠰᠠᠨ᠂ ᠬᠡᠳᠡᠯ᠎ᠡ ᠪᠢ ᠲᠡᠭᠦᠨ ᠢᠶᠠᠨ ᠲᠦᠴᠢᠨ ᠬᠡᠳᠦᠨ ᠤᠨ ᠳᠤ ᠬᠡᠬᠡᠬᠡᠳ ᠠᠯᠠᠭ᠎ᠠ ᠪᠤᠯᠴᠢᠬᠠᠪᠠ᠃ ᠤᠳᠤ ᠨᠠᠳᠠᠳᠤ ᠲᠡᠶᠢᠮᠦᠷᠬᠦ ᠲᠡᠮᠳᠡᠭᠯᠡᠯ ᠤᠨ ᠲᠡᠪᠳᠡᠷ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠶᠢᠭᠰᠠᠨ ᠢ ᠮᠡᠳᠡᠬᠦ ᠪᠤᠶᠤ ᠰᠤᠨᠤᠭᠰᠠᠨ ᠬᠦᠮᠦᠨ ᠵᠦᠪ ᠪᠢᠴᠢᠯᠭᠡ ᠶᠢᠨ ᠠᠭᠤᠯᠭ᠎ᠠ ᠶᠢᠨ ᠲᠤᠬᠠᠢ ᠶᠢ ᠨᠠᠮᠠᠢᠢ ᠭᠤᠯᠤᠬᠤ ᠦᠭᠡᠢ ᠪᠠᠷ ᠠᠰᠠᠭᠤᠳᠠᠭ ᠴᠦ ᠪᠠᠶᠢᠨ᠎ᠠ᠃ ᠢᠩᠭᠢᠬᠦ  ᠳᠤᠨᠢ ᠪᠢ ᠤᠤᠯ ᠲᠡᠮᠳᠡᠭᠯᠡᠯ ᠤᠨ ᠲᠡᠪᠳᠡᠷ ᠪᠠᠨ ᠦᠷᠡᠭᠳᠡᠬᠦᠯᠦᠭᠰᠡᠨ ᠪᠦᠬᠡᠳ ᠦᠪᠡᠷ ᠤᠨ ᠤᠬᠠᠭᠠᠨ ᠮᠡᠳᠡᠷᠡᠯ ᠬᠤᠤᠳᠤᠤ ᠪᠤᠯᠴᠢᠬᠠᠭᠰᠠᠨ ᠪᠤᠯᠬᠤᠷ ᠵᠠᠷᠢᠮ ᠵᠦᠢᠯ ᠢ ᠬᠡᠴᠢᠨᠡᠨ ᠪᠤᠳᠤᠭᠠᠳ ᠪᠤᠳᠤᠭᠠᠠᠳ ᠦᠢᠨ ᠳᠠᠭᠠᠨ ᠤᠯᠵᠤ ᠠᠪᠴᠦ ᠴᠢᠳᠠᠬᠤ ᠦᠭᠡᠢ᠂ ᠪᠠᠰᠠ ᠵᠠᠷᠢᠮ ᠢ ᠨᠢ ᠪᠠᠪᠠ ᠲᠠᠢ ᠯᠠᠪ ᠲᠡᠶᠢᠮᠦ ᠶᠤᠮ ᠳ᠋ᠠ ᠬᠡᠵᠦ ᠪᠠᠳᠤᠯᠠᠵᠤ ᠪᠠᠰᠠ ᠴᠢᠳᠠᠬᠤ ᠦᠭᠡᠢ ᠬᠡᠮᠵᠢᠶᠡᠨ ᠳᠤ ᠬᠦᠷᠴᠡᠢ᠃ ᠡᠶᠢᠮᠦ ᠲᠤᠬᠠᠢ ᠶᠢ ᠪᠤᠳᠠᠳᠠᠢ ᠪᠠᠷ ᠤᠯᠠᠮᠵᠢᠯᠠᠭᠰᠠᠨ ᠶᠠᠪᠤᠳᠠᠯ ᠤᠭᠳᠤ ᠪᠢᠰᠢ᠂ ᠬᠠᠷᠢᠨ ᠲᠡᠮᠡᠢ ᠪᠠᠯᠠᠢ ᠪᠠᠷ ᠵᠦᠨᠦᠭᠳᠡᠨ ᠰᠠᠮᠠᠷᠠᠭᠤᠯᠤᠭᠰᠠᠨ ᠬᠡᠷᠡᠭ ᠪᠤᠯᠬᠤ ᠨᠢ ᠵᠠᠶᠢᠯᠠᠰᠢ ᠦᠭᠡᠢ ᠪᠤᠯᠤᠨ᠎ᠠ ᠬᠡᠰᠡᠨ ᠲᠦᠷᠦᠭᠳᠡᠯ ᠨᠠᠳᠠᠳᠤ ᠪᠤᠢ ᠪᠤᠯᠪᠠ᠃ ᠡᠶᠢᠮᠦ ᠲᠦᠷᠦᠭᠳᠡᠯ ᠠᠴᠠ ᠪᠠᠨ ᠪᠤᠯᠵᠤ᠂ ᠪᠢ ᠤᠳᠤ ᠦᠪᠡᠷ ᠢᠶᠠᠨ ᠰᠠᠶᠢᠨ ᠪᠤᠳᠤᠵᠤ ᠰᠠᠨᠠᠭᠠᠯᠵᠠᠬᠤ ᠶᠢᠨ ᠵᠡᠷᠭᠡᠴᠡᠪᠡᠷ ᠪᠠᠭᠰᠢ ᠨᠠᠷ ᠠᠴᠠ ᠠᠰᠠᠭᠤᠵᠤ ᠯᠠᠪᠯᠠᠵᠤ ᠪᠠᠶᠢᠭᠠᠳ ᠨᠢᠭᠡ ᠪᠠᠭ᠎ᠠ ᠵᠦᠢᠯ ᠢ ᠡᠮᠬᠢᠳᠬᠡᠨ ᠪᠢᠴᠢᠭᠡᠳ ᠦᠭᠪᠡᠯ ᠲᠡᠳᠡ ᠨᠠᠷ ᠯᠠᠪᠳᠠᠶᠢᠶ᠎ᠠ ᠰᠤᠳᠤᠯᠵᠤ ᠶᠠᠷᠢᠯᠴᠠᠭᠠᠳ ᠡᠨᠡ ᠲᠤᠬᠠᠢ ᠶᠢ ᠨᠡᠩ ᠵᠦᠪ ᠨᠡᠩ ᠬᠦᠢᠴᠡᠳ ᠪᠤᠯᠭᠠᠵᠤ ᠭᠠᠷ ᠤᠨ ᠠᠪᠤᠯᠭ᠎ᠠ ᠳᠠᠭᠠᠨ ᠬᠡᠷᠡᠭᠯᠡᠬᠦ ᠮᠠᠭᠠᠳ ᠦᠭᠡᠢ ᠪᠤᠯᠪᠠᠤ ᠭᠤᠷᠢᠳᠠᠭᠰᠠᠨ  ᠳᠠᠭᠠᠨ ᠵᠦᠪ ᠪᠢᠴᠢᠯᠭᠡ ᠶᠢᠨ ᠲᠦᠷᠢᠮ ᠳᠤ ᠬᠤᠯᠪᠤᠭᠳᠠᠯ ᠲᠠᠢ ᠲᠦᠷᠪᠡᠨ ᠵᠦᠢᠯ ᠢᠶᠠᠷ ᠭᠤᠤᠯ ᠪᠤᠯᠭᠠᠭᠰᠠᠨ᠂ ᠪᠠᠰᠠᠴᠤ ᠦᠭᠡᠷ᠎ᠡ ᠶᠠᠩᠵᠤ ᠪᠠᠷ ᠬᠤᠪᠢᠯᠳᠠᠭ ᠴᠦᠬᠡᠨ ᠲᠤᠭᠠᠨ ᠤ ᠦᠭᠡᠰ ᠢ ᠲᠠᠭᠠᠯᠳᠤᠭᠤᠯᠤᠭᠰᠠᠨ ᠪᠠᠭ᠎ᠠ ᠪᠠᠯᠠᠷᠬᠠᠢ ᠵᠦᠢᠯ ᠢ ᠲᠡᠭᠡᠷ᠎ᠡ ᠲᠡᠮᠳᠡᠭᠯᠡᠨ ᠪᠢᠴᠢᠯ᠎ᠡ᠃                            ᠨᠧᠴᠢᠨ                        1973 ᠤᠨ ᠤ ᠨᠠᠶᠢᠮᠠᠳᠤᠭᠠᠷ ᠰᠠᠷ᠎ᠠ ᠶᠢᠨ ᠵᠢᠷᠭᠤᠭᠠᠨ ᠤ ᠡᠳᠦᠷ᠎ᠡ          ᠵᠡᠬᠦᠯᠳᠡ ᠲᠠᠶᠢᠯᠪᠦᠷᠢ           ① ᠨᠧᠴᠢᠨ ᠵᠠᠯᠠᠨ ᠤ ᠲᠤᠬᠠᠢ ᠠᠯᠢᠪᠠ ᠮᠡᠳᠡᠭᠡ ᠶᠢ ᠴᠤ᠋᠂ ᠪᠠᠯᠳᠠᠨ᠂ ᠭᠤ᠂ ᠵᠠᠮᠶᠠᠩ ᠨᠠᠷ ᠤᠨ ᠵᠤᠬᠢᠶᠠᠯ ᠠᠴᠠ ᠠᠪᠴᠦ ᠨᠠᠶᠢᠷᠠᠭᠤᠯᠪᠠ᠃ ᠴᠤ᠋᠂ ᠪᠠᠯᠾᠠ ᠶᠢᠨ ᠵᠤᠬᠢᠶᠠᠯ᠂ ︽ᠰᠢᠯᠢ ᠶᠢᠨ ᠬᠤᠳᠠ ᠶᠢᠨ ᠰᠤᠶᠤᠯ ᠲᠡᠤᠬᠡᠨ ᠮᠠᠲ᠋ᠧᠷᠢᠶᠠᠯ ︵ᠬᠤᠶᠠᠳᠤᠭᠠᠷ ᠡᠮᠬᠢᠳᠬᠡᠯ︶︾᠂ ᠭᠤ᠂ ᠵᠠᠮᠶᠠᠩ ᠤᠨ ︽ᠨᠤᠳᠤᠭ ᠤᠨ ᠴᠡᠩᠭᠡᠷ ᠪᠠᠷ᠎ᠠ︾ ᠳᠤ ᠦᠵᠡᠭᠡᠷᠡᠢ᠃          ② ᠨᠧᠴᠢᠨ ᠵᠠᠯᠠᠨ ᠤ ︽ᠦᠰᠦᠭ ᠨᠠᠶᠢᠷᠠᠭᠤᠯᠬᠤ ᠶᠢᠨ ᠢᠯᠡᠳᠬᠡᠯ︾᠂ ᠢᠷᠭᠡᠨ ᠤᠯᠤᠰ ᠤᠨ ᠦᠶ᠎ᠡ ᠶᠢᠨ ᠴᠢᠭᠤᠯᠭᠠᠳᠤ ᠬᠠᠭᠠᠯᠭ᠎ᠠ ᠳᠠᠬᠢ ᠲᠡᠷᠢᠭᠦᠨ ᠨᠤᠶᠠᠨ ᠤ ᠤᠷᠳᠤᠨ ᠤ ᠲᠠᠷᠤᠮᠠᠯ ᠤᠨ ᠭᠠᠵᠠᠷ ᠤᠨ ᠬᠤᠷᠭᠤᠯᠵᠢᠨ ᠪᠢᠷ᠂ 46 ᠨᠢᠭᠤᠷ ︵ᠲᠤᠭᠳᠤᠢ︶ 20.5 × 14.5cm ᠤᠨ ᠡᠩ ᠤᠨ ᠬᠠᠪᠳᠠᠰᠤᠳᠠᠢ ᠲᠡᠪᠳᠡᠷ ᠂ ᠲᠤᠮᠳᠠᠳᠤ ᠤᠯᠤᠰ  ᠤᠨ ᠤᠯᠤᠰ ᠤᠨ ᠨᠤᠮ ᠤ ᠰᠠᠩ᠂ ᠦᠪᠦᠷ ᠮᠤᠩᠭᠤᠯ ᠤᠨ ᠨᠡᠶᠢᠬᠡᠮ ᠤᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠬᠦᠷᠢᠶᠡᠯᠡᠩ ᠤᠨ ᠨᠤᠮ ᠪᠢᠴᠢᠭ ᠮᠡᠳᠡᠭᠡ ᠵᠠᠩᠭᠢ ᠶᠢᠨ ᠲᠦᠪ᠂ ᠦᠪᠦᠷ ᠮᠤᠩᠭᠤᠯ ᠤᠨ ᠲᠠᠩᠰᠠ ᠡᠪᠬᠡᠮᠡᠯ ᠤᠨ ᠰᠠᠩ᠂ ᠰᠢᠯᠢ ᠶᠢᠨ ᠭᠤᠤᠯ ᠠᠶᠢᠮᠠᠭ ᠤᠨ ᠲᠠᠩᠰᠠ ᠡᠪᠬᠡᠮᠡᠯ ᠤᠨ ᠰᠠᠩ ᠳᠤ ᠬᠠᠳᠠᠭᠠᠯᠠᠭᠳᠠᠵᠤ ᠪᠤᠢ᠃ ︽ᠲᠤᠮᠳᠠᠳᠤ ᠤᠯᠤᠰ ᠤᠨ ᠡᠷᠳᠡᠨ  ᠤ ᠮᠤᠩᠭᠤᠯ ᠨᠤᠮ ᠪᠢᠴᠢᠭ ᠤᠨ ᠶᠡᠷᠦᠩᠭᠡᠢ ᠭᠠᠷᠴᠠᠭ︾ ᠨᠤᠮ ᠤᠨ 1138 ᠨᠢᠭᠤᠷ ᠂ 06583 ᠵᠤᠷᠪᠤᠰ ᠢ ᠦᠵᠡᠬᠡᠷᠡᠢ᠃
  
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠠᠪᠠᠭ᠎ᠠ ᠬᠤᠰᠢᠭᠤ ᠪᠤᠳᠠᠰ ᠤᠨ ᠪᠤᠰᠤ ᠰᠤᠶᠤᠯ ᠤᠨ ᠥᠪ ᠢ ᠣᠯᠠᠮᠵᠢᠯᠠᠨ ᠵᠠᠯᠭᠠᠮᠵᠢᠯᠠᠬᠤ ᠰᠤᠶᠤᠯ ᠤᠨ ᠢᠲᠡᠭᠡᠯ ᠢᠶᠠᠨ ᠁
ᠲᠦᠮᠡᠨᠪᠠᠶᠠᠷ ᠤᠨ ᠤᠷᠴᠢᠭᠤᠯᠭ᠎ᠠ ᠶᠢᠨ ᠪᠦᠳᠦᠭᠡᠯ ᠱᠠᠩᠨᠠᠯ ᠲᠤᠰᠴᠠᠢ
︽ᠬᠦᠬᠡ ᠲᠦᠯᠬᠢᠭᠦᠷ︾ ᠨᠤᠮ ᠤᠨ ᠬᠤᠯᠪᠤᠭᠠᠨ ᠤ ᠨᠣᠮ ᠣᠩᠰᠢᠭᠰᠠᠨ ᠮᠡᠳᠡᠯᠭᠡ ᠶᠢᠨ ᠤᠷᠤᠯᠳᠤᠭᠠᠨ ᠠᠮᠵᠢᠯᠲᠠ ᠁
ᠬᠠᠶᠢᠷ᠎ᠠ ᠬᠠᠷᠢᠭᠤᠴᠠᠯᠭ᠎ᠠ ᠶᠢ ᠲᠡᠭᠡᠳᠦᠯᠡᠵᠦ ᠰᠢᠯᠢᠳᠡᠭ ᠵᠢᠭᠠᠨ ᠵᠢᠯᠤᠭᠤᠳᠤᠭᠴᠢ ᠪᠣᠯᠬᠤ ᠪᠠᠷ ᠰᠢᠭᠤᠷᠬᠠᠶᠢᠯᠠᠨ᠎ᠠ
ᠰᠢᠯᠢ ᠶᠢᠨ ᠭᠤᠣᠯ ᠠᠶᠢᠮᠠᠭ ᠠᠴᠠ ᠲᠤᠮᠤ ᠬᠡᠯᠪᠡᠷᠢ ᠶᠢᠨ ᠡᠷᠲᠡᠨ ᠤ ᠤᠩᠭᠤᠨ ᠤ ᠰᠦᠷᠦᠭᠵᠢᠯ ᠵᠢᠴᠢ ᠴᠢᠯᠠᠭᠤᠨ ᠁
ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠠᠴᠠ ᠭᠤᠤᠯᠴᠢᠯᠠᠨ ᠡᠷᠬᠢᠯᠡᠪᠡ ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠠᠯᠪᠠᠨ ᠲᠢᠩᠬᠢᠮ ᠠᠴᠠ ᠲᠠᠭᠠᠭᠠᠴᠢᠯᠠᠨ ᠡᠷᠬᠢᠯᠡᠪᠡ ᠃ ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠮᠡᠷᠭᠡᠵᠢᠯ ᠬᠠᠩᠭᠠᠪᠠ᠃ ᠰᠢᠤᠳᠠᠨ ᠳ᠋ᠤᠭᠠᠷ: 010098    蒙ICP备05000248号