ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠰᠣᠶᠣᠯ ᠡᠷᠳᠡᠨᠢ
ᠦᠢᠯᠡᠴᠢᠯᠡᠭᠡ
ᠠᠵᠠ ᠬᠡᠶᠢᠮᠣᠷᠢᠲᠦ ᠠᠪᠠᠭ᠎ᠠ
ᠪᠡᠶᠢᠯᠡ ᠪᠡᠯᠭᠦᠨᠰᠦ᠋ᠷᠥᠩ ᠤᠨ ᠳᠣᠪᠴᠢ ᠨᠠᠮᠳᠠᠷ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2017/6/10
                                               ᠴᠣ᠂ ᠪᠠᠯᠾᠠ                  ᠵᠡᠭᠦᠨ ᠠᠪᠠᠭ᠋ᠠᠨᠠᠷ ᠬᠤᠰᠢᠭᠤᠨ ᠤ ᠪᠡᠶᠢᠯᠡ ᠪᠡᠯᠭᠦᠨᠰᠦ᠋ᠷᠦᠩ᠂ ᠴᠢᠩ ᠣᠯᠣᠰ ᠤᠨ ᠪᠠᠳᠠᠷᠠᠭᠤᠯᠳᠣ ᠲᠦᠷᠦ ᠶᠢᠨ ᠬᠤᠷᠢᠨ ᠳᠠᠪᠣᠳᠣᠭᠠᠷ ᠣᠨ ᠤ ᠰᠢᠷᠠᠭᠴᠢᠨ ᠭᠠᠭ᠋ᠠᠢ ᠵᠢᠯ ︵1899 ᠣᠨ︶ ᠳᠤ᠂ ᠳᠠᠶᠢᠴᠢᠨ ᠳᠣᠰᠠᠯᠠᠭᠴᠢ ᠠᠭᠳᠣᠩᠭ᠎ᠠ ᠶᠢᠨ ᠠᠬᠠᠮᠠᠳ ᠬᠦᠪᠡᠭᠦᠨ ᠪᠣᠯᠵᠣ ᠲᠦᠷᠦᠵᠠᠢ᠃ ᠠᠷᠪᠠᠨ ᠨᠢᠭᠡ ᠠᠴᠠ ᠠᠷᠪᠠᠨ ᠳᠣᠯᠣᠭᠠᠨ ᠨᠠᠰᠣ ᠭᠦᠷᠳᠠᠯ᠎ᠠ ᠠᠪᠤ ᠨᠢ ᠳᠡᠭᠦᠨ ᠢ ᠯᠠᠮᠠ ᠪᠣᠯᠭᠠᠬᠤ ᠵᠣᠷᠢᠯᠭ᠎ᠠ ᠲᠠᠢ ᠪᠠᠨᠳᠢᠳᠠ ᠭᠡᠭᠡᠨ ᠳᠤ ᠰᠦᠮ᠎ᠡ ᠳᠤ ᠰᠠᠭᠤᠯᠭᠠᠵᠣ ᠲᠦᠪᠡᠳ ᠨᠣᠮ ᠰᠣᠷᠭᠠᠵᠠᠢ᠃ ᠠᠷᠪᠡᠨ ᠨᠠᠢᠮᠨᠨ ᠨᠠᠰᠣᠯᠠᠮᠠᠭᠴᠠ ᠬᠠᠷ᠎ᠠ ᠬᠦᠮᠨ ᠪᠣᠯᠭᠠᠵᠣ᠂ ᠳᠠᠶᠢᠵᠢ ᠵᠡᠷᠭᠡ ᠶᠢ ᠵᠠᠯᠭᠠᠮᠵᠢᠯᠠᠭᠤᠯᠬᠤ ᠪᠠᠷ ᠪᠣᠯᠵᠣ ᠭᠡᠷ ᠲᠡᠭᠡᠨ ᠠᠪᠴᠢᠷᠠᠵᠣ ᠪᠠᠭᠰᠢ ᠵᠠᠯᠠᠵᠣ ᠮᠣᠩᠭᠤᠯ ᠪᠢᠴᠢᠭ ᠦᠵᠡᠭᠦᠯᠵᠠᠢ ᠃ 1920 ᠣᠨ ᠳᠤ᠂ ᠬᠤᠷᠢᠨ ᠬᠤᠶᠠᠷ ᠨᠠᠰᠣᠨ ᠳᠠᠭᠠᠨ᠂ ᠵᠠᠩᠭᠢᠶ᠎ᠠ ᠬᠡᠬᠡᠠ ᠱᠠᠪᠢᠨᠠᠷ ᠤᠨ ᠶᠦᠯᠵᠢᠯ ᠵᠠᠶᠢᠰᠠᠩ ᠤᠨ ᠬᠡᠣᠭᠡᠨ ᠭᠠᠨᠳᠢᠮ᠎ᠠ ᠶᠢ ᠬᠠᠳᠣᠨ ᠪᠣᠯᠭᠠᠵᠣ ᠪᠠᠭᠤᠯᠭᠠᠵᠠᠢ᠃            1923 ᠣᠨ ᠳᠤ᠂ ᠬᠤᠷᠢᠨ ᠳᠠᠪᠣᠨ ᠨᠠᠰᠣᠳᠠᠢ ᠪᠠᠶᠢᠬᠤ ᠳᠤ᠂ ᠠᠪᠤ ᠠᠭᠳᠣᠩᠭ᠎ᠠ ᠨᠢ ᠳᠡᠭᠦᠨ ᠳᠤ ᠲᠦᠷᠦ ᠶᠢᠨ ᠪᠡᠶᠢᠯᠡ ᠶᠢᠨ ᠵᠡᠷᠭᠡ ᠶᠢ ᠵᠠᠯᠭᠠᠮᠵᠢᠯᠠᠭᠤᠯᠵᠣ ᠬᠤᠰᠢᠭᠤᠨ ᠤ ᠵᠠᠰᠠᠭ ᠰᠠᠭᠤᠯᠭᠠᠪᠠ᠃ 1926 ᠣᠨ ᠳᠤ᠂ ᠬᠤᠷᠢᠨ ᠨᠠᠢᠮᠡᠨ ᠨᠠᠰᠣᠳᠠᠢ ᠳᠠᠭᠠᠨ᠂ ᠪᠠᠷᠠᠭᠤᠨ ᠠᠪᠠᠭ᠋ᠠᠨᠠᠷ ᠬᠤᠰᠢᠭᠤᠨ ᠠᠴᠠ ᠴᠡᠳᠡᠩ ᠢ ᠪᠠᠭ᠎ᠠ ᠬᠠᠳᠣᠨ ᠪᠣᠯᠭᠠᠨ ᠪᠠᠭᠤᠯᠭᠠᠨᠵᠣ᠂ ᠳᠦᠷᠪᠡᠨ ᠵᠢᠯ ᠪᠣᠯᠣᠭᠠᠳ ᠪᠣᠴᠠᠭᠠᠪᠠ᠃ 1930 ᠣᠨ ᠤ ᠴᠠᠭᠠᠨ ᠮᠣᠷᠢᠨ ᠵᠢᠯ ᠭᠤᠴᠢᠨ ᠬᠤᠶᠠᠷ ᠨᠠᠰᠣᠨ ᠳᠠᠭᠠᠨ ᠠᠪᠤ ᠠᠭᠳᠣᠩᠭ᠎ᠠ ᠶᠢᠨ ᠵᠡᠷᠭᠡ ᠶᠢ ᠵᠠᠯᠭᠠᠮᠵᠢᠯᠠᠵᠣ᠂ ᠬᠤᠰᠢᠭᠤᠨ ᠤ ᠵᠠᠰᠠᠭ ᠲᠦᠷᠦ ᠶᠢᠨ ᠪᠡᠶᠢᠯᠡ ᠪᠣᠯᠪᠠ᠃ 1933 ᠣᠨ ᠳᠤ ᠬᠤᠴᠢᠨ ᠭᠤᠷᠪᠠᠨ ᠨᠠᠰᠣᠨ ᠳᠠᠭᠠᠨ ᠳᠣᠰ ᠬᠤᠰᠢᠭᠤᠨ ᠤ ᠨᠢᠩᠵᠢᠭ ᠢ ᠪᠠᠭ᠎ᠠ ᠬᠠᠳᠣᠨ ᠪᠣᠯᠭᠠᠨ ᠪᠠᠭᠤᠯᠭᠠᠵᠣ᠂ ᠪᠦᠬᠦᠯᠢ ᠭᠤᠷᠪᠠᠨ ᠵᠢᠯ ᠪᠣᠯᠣᠭᠠᠳᠣᠢ ᠪᠠᠷ ᠪᠣᠴᠠᠭᠠᠪᠠ᠃ 1935 ᠣᠨ ᠤ ᠭᠦᠭᠡᠭᠴᠢᠨ ᠭᠠᠭ᠋ᠠᠢ ᠵᠢᠯ᠂ ᠪᠠᠨᠳᠢᠳᠠ ᠭᠡᠭᠡᠡ ᠤ ᠠᠷᠪᠠᠨ ᠭᠤᠷᠪᠠᠨ ᠰᠡᠭᠦᠳᠡᠷ᠂ ᠪᠡᠶᠢᠯᠡ ᠪᠡᠯᠭᠦᠨᠰᠦ᠋ᠷᠦᠩ ᠤᠨ ᠭᠤᠴᠢᠨ ᠳᠣᠯᠣᠭᠠᠨ ᠨᠠᠰᠣᠨ ᠤ ᠵᠢᠯ ᠣᠷᠣᠭᠤᠯᠵᠣ᠂ ᠬᠤᠰᠢᠭᠤᠨ ᠤ ᠬᠡᠮᠵᠢᠶᠠᠨ ᠤ ᠶᠡᠭᠡ ᠨᠠᠶᠢᠷ ᠬᠢᠪᠡ᠃ ᠡᠨᠡ ᠵᠢᠯ ᠠᠩᠬᠠᠨ ᠤ ᠬᠠᠳᠣᠨ ᠭᠠᠨᠳᠢᠮ᠎ᠠ ᠨᠠᠰᠣ ᠪᠠᠷᠠᠪᠠ᠃ 1936 ᠣᠨ ᠳᠤ ᠭᠤᠴᠢᠨ ᠨᠠᠢᠮᠡᠨ ᠨᠠᠰᠣᠨ ᠳᠠᠭᠠᠨ᠂ ᠳ᠋ᠧ ᠸᠠᠩ ᠠᠴᠠ ᠡᠷᠳᠡᠮᠰᠣᠶᠣᠯᠳᠣ ᠬᠤᠳᠠ ︵ᠣᠳᠣ ᠶᠢᠨ ᠬᠤᠸᠠ ᠳ᠋ᠧ ᠰᠢᠶᠠᠨ︶ ᠳᠤ ᠪᠠᠶᠢᠭᠤᠯᠣᠭᠰᠠᠨ ᠴᠡᠷᠢᠭ ᠵᠠᠰᠠᠭ ᠤᠨ ᠣᠷᠳᠣᠨ  ᠤ ᠬᠠᠮᠢᠶᠠᠳᠠᠢ ᠴᠡᠷᠢᠭ ᠤᠨ ᠬᠤᠷᠢᠶᠠᠨ ᠳᠠᠷᠤᠭ᠎ᠠ ᠶᠢᠨ ᠠᠵᠢᠯ ᠢ ᠪᠦᠬᠦᠯᠢ ᠨᠢᠭᠡ ᠵᠢᠯ ᠬᠠᠷᠢᠭᠤᠴᠠᠵᠣ ᠦᠩᠭᠡᠷᠡᠪᠡ᠃ ᠡᠨᠡ ᠵᠢᠯ ᠵᠡᠭᠦᠨ ᠠᠪᠠᠭ᠎ᠠ ᠬᠤᠰᠢᠭᠤᠨ ᠠᠴᠠ ᠴᠢᠮᠡᠣᠬᠤᠰᠣᠷ ᠢ ᠬᠠᠳᠣᠨ ᠪᠣᠯᠭᠠᠨ ᠠᠪᠣᠪᠠ᠃ 1941 — 1945 ᠣᠨ ᠬᠦᠷᠳᠡᠯ᠎ᠠ ᠰᠢᠯᠢ ᠶᠢᠨ ᠭᠤᠣᠯ ᠤᠨ ᠴᠢᠭᠤᠯᠭᠠᠨ ᠶᠠᠮᠣᠨ ᠤ ᠢᠷᠭᠡᠨ ᠤ ᠵᠠᠰᠠᠯᠳᠠ ᠶᠢᠨ ᠭᠠᠵᠠᠷ ᠤᠨ ᠳᠠᠷᠤᠭ᠎ᠠ ᠪᠠᠶᠢᠵᠣ᠂ 1946 ᠣᠨ ᠤ ᠣᠯᠠᠭᠠᠨ ᠨᠣᠬᠠᠢ ᠵᠢᠯ ᠳᠤ ᠲᠦᠴᠢᠨ ᠨᠠᠢᠮᠠᠨ ᠨᠠᠰᠣᠨ ᠳᠠᠭᠠᠨ᠂ ᠠᠷᠠᠳᠴᠢᠯᠠᠭᠰᠠᠨ ᠰᠣᠩᠭᠤᠭᠤᠯᠢ ᠪᠠᠷ ᠬᠤᠰᠢᠭᠤᠨ ᠤ ᠰᠢᠨ᠎ᠠ ᠵᠠᠰᠠᠭ ᠤᠨ ᠣᠷᠳᠣᠨ ᠪᠠᠶᠢᠭᠤᠯᠣᠭᠳᠠᠭᠰᠠᠨ ᠢᠶᠠᠷ᠂ ᠵᠡᠭᠦᠨ ᠠᠪᠠᠭ᠋ᠠᠨᠠᠷ ᠬᠤᠰᠢᠭᠤᠨ ᠤ ᠵᠠᠰᠠᠭ ᠲᠦᠷᠦ ᠶᠢᠨ ᠪᠡᠶᠢᠯᠡ ᠶᠢᠨ ᠵᠡᠷᠭᠡ ᠳᠣᠰᠢᠶᠠᠯ — ᠹᠸᠣᠳᠠᠯ ᠤᠨ ᠣᠨᠴᠠ ᠡᠷᠭᠡ ᠪᠠᠨ ᠬᠠᠰᠣᠭᠳᠠᠵᠠᠢ᠃ ᠢᠩᠭᠢᠭᠡᠳ 1948 ᠣᠨ ᠳᠤ ᠳᠠᠪᠢᠨ ᠨᠠᠰᠣᠳᠠᠢ ᠳᠠᠭᠠᠨ ᠣᠯᠠᠭᠠᠨᠬᠤᠳᠠ ᠳᠤ ᠡᠪᠡᠳᠴᠢᠨ ᠢᠶᠠᠷ ᠨᠠᠰᠣ ᠪᠠᠷᠠᠪᠠ᠃                  ᠳᠠᠶᠢᠽᠣ ᠴᠢᠩᠭᠢᠰ ᠬᠠᠭᠠᠨ ᠤ ᠳᠡᠭᠦᠦ ᠪᠢᠯᠡᠭᠦᠳᠠᠢ ᠶᠢᠨ ᠢᠵᠠᠭᠠᠷ ᠢᠶᠠᠷ ᠦᠶ᠎ᠡ ᠵᠡᠷᠭᠡ ᠵᠠᠯᠭᠠᠮᠵᠢᠯᠠᠭᠰᠠᠨ ᠢ ᠭᠦᠭᠡᠭᠡᠵᠣ ᠪᠣᠳᠣᠪᠠᠯ᠂ ᠪᠢᠯᠡᠭᠦᠳᠡᠢ ᠠᠴᠠ ᠪᠡᠯᠭᠦᠨᠰᠦ᠋ᠷᠦᠩ ᠬᠦᠷᠳᠡᠯ᠎ᠠ ᠭᠤᠴᠢᠨ ᠦᠶ᠎ᠡ ᠪᠣᠯᠵᠣ᠂ ᠴᠢᠩ ᠣᠯᠣᠰ ᠤᠨ ᠬᠠᠭᠠᠨ ᠡᠩᠬᠡ ᠠᠮᠣᠭᠤᠯᠠᠩ ᠤᠨ ᠵᠢᠷᠭᠤᠳᠣᠭᠠᠷ ᠣᠨ ᠳᠤ ᠠᠪᠠᠭ᠋ᠠᠨᠠᠷ ᠵᠡᠬᠦᠨ ᠭᠠᠷ ᠤᠨ ᠬᠤᠰᠢᠭᠤ ᠪᠣᠯᠵᠣ᠂ ᠳ᠋ᠦᠩᠭᠢᠰᠧᠷᠠᠪ ᠢ ᠵᠠᠰᠠᠭ ᠪᠠᠶᠢᠰᠠ ᠰᠠᠭᠤᠯᠭᠠᠭᠰᠠᠨ ᠠᠴᠠ ᠪᠡᠯᠭᠦᠨᠰᠦ᠋ᠷᠦᠩ ᠭᠦᠷᠳᠡᠯ᠎ᠡ ᠠᠷᠪᠠᠨ ᠬᠤᠶᠠᠷ ᠦᠶ᠎ᠡ ᠪᠣᠯᠣᠭᠰᠠᠨ ᠳᠡᠣᠬᠡ ᠲᠠᠢ᠃ ᠪᠡᠯᠭᠦᠨᠰᠦ᠋ᠷᠦᠩ ᠤᠨ ᠳᠣᠰ ᠬᠦᠮᠥᠨ ᠤ ᠪᠠᠶᠢᠳᠠᠯ᠂ ᠪᠣᠷᠬᠠᠨ ᠤ ᠱᠠᠰᠢᠨ ᠢ ᠪᠢᠰᠢᠷᠡᠨ ᠰᠢᠳᠦᠳᠡᠭ᠃ ᠪᠠᠨᠳᠢᠳᠠ ᠭᠡᠭᠡᠨ ᠢ ᠣᠷᠳᠣᠨ ᠳᠠᠭᠠᠨ ᠵᠠᠯᠠᠵᠣ᠂ ᠡᠷᠭᠦᠯ ᠭᠦᠨᠳᠣᠯᠡᠯ ᠦᠢᠯᠡᠳᠬᠦ ᠪᠠ ᠣᠶᠢᠷ᠎ᠠ ᠵᠠᠭᠤᠷ᠎ᠠ ᠶᠢᠨ ᠰᠦᠮ᠎ᠡ ᠬᠡᠶᠢᠳ ᠲᠤ ᠬᠦᠷᠴᠦ ᠮᠦᠷᠭᠦᠯ ᠬᠢᠳᠡᠭ᠃ 1933 ᠣᠨ ᠤ ᠬᠠᠷᠠᠭᠴᠢᠨ ᠳᠠᠬᠢᠶ᠎ᠠ ᠵᠢᠯ᠂ ᠳᠣᠯᠣᠳᠣᠭᠠᠷ ᠲᠦᠷᠢ ᠶᠢᠨ ᠬᠡᠬᠡᠨ ᠠᠴᠠ ᠳ᠋ᠦᠢᠩᠭᠡᠷ ᠳ᠋ᠠᠽᠠᠩ ᠪᠠᠶᠢᠭᠤᠯᠬᠤ ᠳᠤ᠂ ᠦᠪᠡᠷ ᠤᠨ ᠡᠪᠦᠭᠡ ᠳᠡᠭᠡᠳᠦᠰ ᠤᠨ ᠣᠷᠳᠣᠨ ᠳᠠᠪᠣᠨ ᠳᠠᠰᠣᠯᠭ᠎ᠠ ᠸᠠᠭᠠᠷ ᠤᠨ ᠪᠠᠶᠢᠰᠢᠩ ᠢᠶᠠᠨ ᠬᠦᠷᠢᠶ᠎ᠡ ᠲᠠᠢ ᠪᠠᠨ ᠬᠠᠮᠳᠣ ᠡᠷᠭᠦᠵᠣ᠂ ᠳ᠋ᠦᠢᠩᠭᠡᠷ ᠤᠨ ᠰᠦᠮ᠎ᠡ ᠪᠣᠯᠭᠠᠭᠰᠠᠨ ᠪᠠ ᠬᠤᠷᠠᠯ ᠨᠣᠮ ᠤᠨ ᠦᠢᠯᠡᠰ ᠲᠤ ᠵᠣᠷᠢᠭᠤᠯᠣᠨ ᠪᠠᠶᠢᠩᠭᠤ ᠡᠷᠭᠦᠯ ᠬᠦᠨᠳᠣᠯᠠᠯ ᠦᠢᠯᠡᠳᠳᠡᠭ  ᠠᠴᠠ ᠳᠣᠳᠣᠭᠠᠳᠣ ᠦᠭᠯᠢᠭᠡ ᠶᠢᠨ ᠡᠵᠡᠨ ᠭᠢᠵᠣ ᠬᠦᠨᠳᠦᠳᠭᠡᠨ ᠳᠡᠭᠤᠳᠠᠭᠳᠠᠬᠤ ᠪᠣᠯᠣᠭᠰᠠᠨ ᠶᠤᠮ᠃                  ᠳᠡᠬᠦᠨ ᠳᠤ ᠬᠤᠰᠢᠭᠤᠨ ᠤ ᠵᠠᠰᠠᠭ ᠨᠣᠶᠠᠳ ᠤᠨ ᠣᠯᠠᠮᠵᠢᠯᠠᠯᠳᠣ ᠶᠠᠮᠪᠠ ᠯᠠᠷᠵᠠ ᠪᠠᠶᠢᠬᠤ ᠪᠣᠯᠪᠠᠴᠣ᠂ ᠰᠣᠶᠥᠯ ᠤᠨ ᠬᠡᠮᠵᠢᠶ᠎ᠡ ᠳᠣᠣᠷ᠎ᠠ᠂ ᠨᠣᠮ ᠪᠢᠴᠢᠭ ᠦᠵᠡᠭᠦ ᠳᠣᠷ᠎ᠡ ᠦᠭᠡᠢ᠂ ᠮᠠᠰᠢᠨ ᠳᠡᠷᠭᠡ ᠪᠠᠷ ᠴᠢᠨ᠋ᠸ᠎ᠠ ᠠᠯᠠᠬᠤ ᠳᠣᠷᠠᠳᠠᠢ᠂ ᠠᠪᠠᠯᠠᠭᠰᠠᠨ ᠴᠢᠨ᠋ᠸ᠎ᠠ ᠶᠢᠨ ᠠᠷᠠᠰᠣᠨ ᠤ ᠦᠨ᠎ᠠ ᠪᠠᠷ ᠨᠢᠭᠡ ᠮᠠᠰᠢᠨ ᠳᠡᠷᠭᠡ ᠠᠪᠣᠪᠠ ᠭᠡᠰᠡᠨ ᠦᠭᠡ ᠪᠠᠶᠢᠳᠠᠭ᠃ ᠣᠷᠠᠨ ᠳᠠᠷᠬᠠᠨ ᠤ ᠠᠪᠢᠶᠠᠰ ᠲᠠᠢ᠃ ᠠᠷᠢᠬᠢ ᠣᠣᠭᠤᠳᠠᠭ ᠦᠭᠡᠢ᠂ ᠳᠠᠮᠠᠬᠢ ᠳᠠᠳᠠᠳᠠᠭ ᠦᠭᠡᠢ᠂ ᠵᠣᠨ ᠨᠠᠮᠣᠷ ᠤᠨ ᠴᠠᠭ ᠲᠤ ᠦᠷᠭᠦᠯᠵᠢ ᠴᠡᠭᠡ ᠣᠣᠭᠤᠳᠠᠭ᠃ ᠮᠠᠯ ᠦᠰᠭᠡᠭᠦ ᠳᠤ ᠪᠠᠭ᠋ᠠᠳᠠᠢ᠂ ᠮᠠᠯ ᠢᠶᠠᠨ ᠰᠠᠶᠢᠨ ᠮᠠᠯᠵᠢᠵᠣ ᠦᠰᠦᠭᠡᠭᠰᠡᠨ ᠬᠦᠮᠥᠨ ᠢ ᠶᠡᠬᠡᠯ᠎ᠡ ᠳᠣᠳᠣᠨᠣ ᠦᠵᠡᠵᠣ᠂ ᠮᠠᠭᠤᠬᠠᠨ ᠮᠠᠯᠵᠢᠭᠰᠠᠨ ᠬᠦᠮᠥᠨ ᠳᠤ ᠶᠡᠷᠦ ᠳᠣᠷ᠎ᠠ ᠮᠠᠭᠤᠳᠠᠢ ᠪᠠᠶᠢᠳᠠᠭ᠃ ᠳᠣᠭᠰᠢᠨ ᠰᠢᠷᠦᠭᠦᠨ ᠬᠠᠷᠭᠢᠰ ᠦᠷᠡᠮᠡᠳᠡᠭᠡᠢ ᠵᠠᠩ ᠪᠠᠶᠢᠳᠠᠭ ᠦᠭᠡᠢ᠂ ᠶᠡᠬᠡᠯ᠎ᠡ ᠪᠦᠳᠦᠭᠦᠯᠢᠭ ᠮᠠᠶ᠋ᠢᠭ ᠤᠨ ᠬᠦᠮᠥᠨ ᠪᠠᠶᠢᠭᠰᠠᠨ᠃ ᠡᠯᠳᠡᠪ ᠤᠨ ᠮᠠᠶᠢᠮᠠᠢ ᠬᠢᠬᠦ ᠪᠣᠶᠣ ᠶᠡᠭᠡ ᠦᠨ᠎ᠡ ᠦᠷᠳᠡᠭ ᠲᠠᠢ ᠶᠠᠭᠤᠮ᠎ᠠ ᠶᠢ ᠬᠤᠳᠠᠯᠳᠣᠨ ᠠᠪᠴᠣ᠂ ᠦᠷᠢ ᠰᠢᠷᠢ ᠳᠠᠯᠪᠢᠨ ᠬᠤᠰᠢᠭᠤᠨ ᠤ ᠠᠷᠡᠳ ᠣᠯᠠᠨ ᠢ ᠳᠠᠳᠠᠪᠦᠷᠢ ᠳᠤ ᠴᠢᠷᠦᠭᠳᠡᠭᠦᠯᠳᠡᠭ ᠦᠭᠡᠢ᠂ ᠬᠠᠷᠢᠨ ᠮᠠᠯ ᠰᠦᠷᠦᠭ ᠨᠢ ᠦᠰᠴᠣ ᠠᠷᠪᠢᠳᠣᠭᠰᠠᠨ ᠠᠴᠠ ᠳᠡᠭᠦᠨ ᠢ ᠮᠠᠯᠵᠢᠬᠤ ᠨᠢ ᠠᠷᠠᠳ ᠣᠯᠠᠨ ᠳᠤ ᠬᠦᠨᠳᠣ ᠳᠠᠷᠣᠭᠠᠰᠣ ᠪᠣᠯᠵᠣ ᠪᠠᠶᠢᠭᠰᠠᠨ ᠶᠤᠮ᠃                  1937 ᠣᠨ ᠳᠤ ᠰᠣᠷᠬᠤ ᠨᠠᠰᠣᠨ ᠤ ᠭᠤᠴᠢᠭᠠᠳ ᠬᠡᠣᠬᠡᠳ ᠢ ᠴᠣᠬᠯᠠᠭᠤᠯᠣᠨ᠂ ᠪᠠᠨᠳᠢᠳᠠ ᠭᠡᠭᠡᠨ ᠬᠡᠶᠢᠳ ᠤᠨ ᠴᠣᠶᠢᠷ ᠤᠨ ᠴᠠᠭᠠᠨ ᠬᠦᠷᠢᠶᠡᠨ ᠳᠤ᠂ ᠵᠡᠭᠦᠨ ᠠᠪᠠᠭ᠋ᠠᠨᠠᠷ ᠬᠤᠰᠢᠭᠤᠨ ᠤ ᠬᠦᠪᠡᠭᠦᠳ ᠤᠨ ᠪᠠᠭ᠎ᠠ ᠰᠣᠷᠭᠠᠭᠤᠯᠢ ᠪᠠᠶᠢᠭᠤᠯᠵᠣ᠂ ᠵᠢᠭ᠍ᠮᠢᠳᠨᠠᠮᠵᠢᠯ᠂ ᠳᠠᠪᠢᠨᠢᠩᠪᠤ᠂ ᠴᠣᠭᠳᠣᠭᠡᠷᠡᠯ ᠨᠠᠷ ᠢᠶᠠᠷ ᠪᠠᠭᠰᠢᠯᠠᠭᠤᠯᠵᠣ ᠮᠣᠩᠭᠤᠯ ᠪᠢᠴᠢᠭ ᠦᠵᠡᠭᠦᠯᠵᠠᠢ᠃ ᠲᠡᠷᠡ ᠦᠶ᠎ᠡ ᠳᠤ ᠰᠣᠷᠭᠠᠭᠤᠯᠢ ᠪᠠᠶᠢᠭᠤᠯᠬᠤ ᠶᠣᠰᠣᠯᠠᠯ ᠢ ᠳᠣᠩ ᠳᠦᠬᠦᠮ ᠶᠠᠪᠣᠭᠤᠯᠵᠣ ᠪᠠᠶᠢᠭᠰᠠᠨ ᠢ ᠬᠡᠯᠡᠬᠦ ᠳᠤ᠂ ᠨᠢᠭᠡ ᠪᠦᠳᠦᠭᠦᠨ ᠫᠢᠯᠠᠠ ᠳᠤ ᠠᠷᠪᠢᠨ ᠶᠧᠪᠢᠩ ᠪᠣᠣᠪᠤ ᠦᠷᠦᠵᠣ ᠳᠠᠯᠪᠢᠭᠠᠳ᠂ ᠰᠣᠷᠭᠠᠭᠤᠯᠢ ᠶᠢᠨ ᠳᠠᠷᠤᠭ᠎ᠠ ᠪᠠᠭᠰᠢ ᠵᠢᠭ᠍ᠮᠢᠳᠨᠠᠮᠵᠢᠯ ᠠᠴᠠ ︽ᠮᠠᠨ ᠬᠤᠰᠢᠭᠤᠨ ᠤ ᠨᠣᠶᠠᠳ ᠲᠦᠰᠢᠮᠡᠳ ᠠᠴᠠ᠂ ᠭᠡᠣᠭᠡᠳ ᠲᠠ ᠨᠠᠷ ᠤᠨ ᠪᠢᠴᠢᠭ ᠰᠣᠶᠣᠯ ᠰᠠᠶᠢᠨ ᠰᠣᠷᠴᠣ ᠡᠷᠳᠡᠮ ᠴᠢᠳᠠᠯᠳᠠᠢ ᠬᠦᠮᠥᠰ ᠪᠣᠯᠬᠤ ᠶᠢ ᠵᠣᠷᠢᠵᠣ ᠡᠨᠡ ᠰᠣᠷᠭᠠᠭᠤᠯᠢ ᠶᠢ ᠪᠠᠶᠢᠭᠤᠯᠵᠣ ᠪᠠᠶᠢᠭ᠎ᠠ ᠶᠤᠮ᠃ ᠡᠶᠢᠮᠦ ᠳᠤ ᠰᠣᠷᠣᠭᠴᠢ ᠪᠣᠯᠣᠭᠰᠠᠨ ᠲᠠ ᠨᠠᠷ ᠬᠢᠴᠢᠶᠠᠨ ᠴᠢᠷᠮᠠᠶᠢᠵᠣ ᠰᠠᠶᠢᠨ ᠦᠢᠯᠡᠰ ᠪᠦᠳᠦᠭᠡᠬᠦ ᠶᠢ ᠢᠷᠦᠭᠡᠨ ᠬᠦᠰᠡᠵᠣ ᠪᠠᠶᠢᠨ᠎ᠠ︾ ᠭᠡᠵᠣ ᠬᠡᠯᠡᠭᠡᠳ ᠪᠠᠭᠰᠢ ᠰᠣᠷᠣᠭᠴᠢ ᠬᠠᠮᠳᠣ ᠪᠠᠷ ᠮᠣᠩᠭᠤᠯ ᠴᠠᠭᠠᠨ ᠳᠣᠯᠣᠭᠠᠢ ᠶᠢᠨ ᠡᠭᠡᠰᠢᠭ ᠳᠣᠯᠣᠭᠠᠨ ᠦᠰᠦᠭ ᠢ ᠭᠡᠳᠦᠨᠳᠡ ᠣᠩᠰᠢᠵᠣ ᠶᠣᠰᠣᠯᠠᠯ ᠳᠠᠭᠤᠰᠣᠭᠰᠠᠨ  ᠤ ᠳᠠᠷᠠᠭ᠎ᠠ᠂ ᠲᠡᠷᠡ ᠪᠣᠣᠪᠤ ᠶᠢ ᠰᠣᠷᠣᠭᠴᠢ ᠨᠠᠷ ᠲᠠᠭᠠᠨ ᠳᠦᠭᠡᠭᠡᠨ ᠦᠭᠴᠦ ᠳᠦᠭᠦᠮ ᠶᠣᠰᠣᠯᠠᠯ ᠳᠡᠭᠦᠰᠴᠦ ᠪᠢᠯᠡ᠃ ᠰᠣᠷᠣᠭᠴᠢ ᠶᠢᠨ ᠭᠡᠷ ᠨᠢ ᠵᠦᠪᠬᠡᠨ ᠡᠮᠥᠰᠭᠦ ᠶᠢ ᠪᠡᠯᠡᠳᠬᠡᠭᠦ ᠠᠴᠠ ᠭᠠᠳᠠᠨ᠎ᠠ ᠪᠣᠰᠣᠳ ᠭᠡᠷ ᠪᠠᠶᠢᠰᠢᠩ᠂ ᠰᠢᠷᠡᠭᠡ ᠰᠠᠨᠳᠠᠯᠢ ᠠᠮᠦ ᠪᠣᠳᠠᠭ᠎ᠠ᠂ ᠢᠳᠠᠬᠦ ᠮᠢᠬ᠎ᠠ᠂ ᠪᠢᠷ ᠴᠠᠭᠠᠰᠣ᠂ ᠠᠷᠭᠠᠯ ᠳᠦᠯᠡᠰᠢ ᠵᠡᠷᠭᠡ ᠶᠢ ᠴᠦᠮ ᠬᠤᠰᠢᠭᠤᠨ ᠠᠴᠠ ᠪᠡᠯᠡᠳᠭᠡᠵᠣ ᠪᠠᠶᠢᠭᠰᠠᠨ ᠶᠤᠮ᠃                  ᠡᠨᠡ ᠰᠣᠷᠭᠠᠭᠤᠯᠢ ᠶᠢ ᠴᠦᠢᠷ ᠤᠨ ᠴᠠᠭᠠᠨ ᠭᠦᠷᠢᠶᠡᠨ ᠳᠤ ᠪᠠᠶᠢᠭᠤᠯᠵᠣ᠂ ᠭᠡᠳᠦᠨ ᠵᠢᠯ ᠪᠣᠯᠣᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠳᠠᠬᠢᠳᠠᠭ ᠤᠨ ᠡᠩᠭᠡᠷ ᠤᠨ ᠮᠠᠶᠢᠮᠠᠢ ᠳᠤ ᠨᠡᠭᠦᠵᠣ ᠨᠢᠭᠡ ᠬᠤᠭᠤᠴᠠᠭ᠎ᠠ ᠰᠠᠭᠤᠵᠣ᠂ ᠳᠠᠬᠢᠨ ᠬᠡᠬᠡᠨ ᠬᠡᠶᠢᠳ  ᠤᠨ ᠰᠠᠩ ᠤᠨ ᠬᠤᠷᠠᠯᠳᠣᠭᠠᠨ ᠳᠤ ᠢᠷᠡᠵᠣ ᠰᠠᠭᠤᠭᠰᠠᠨ ᠶᠤᠮ᠂ ᠢᠩᠭᠢᠵᠣ ᠣᠷᠣᠨ ᠰᠠᠭᠤᠴᠠ ᠶᠢᠨ ᠠᠰᠠᠭᠤᠳᠠᠯ  ᠠᠴᠠ ᠪᠣᠯᠵᠣ ᠭᠡᠳᠦᠨ ᠣᠳᠠᠭ᠎ᠠ ᠨᠡᠭᠦᠭᠰᠡᠨ ᠪᠣᠯᠪᠠᠴᠣ ᠬᠢᠴᠢᠶᠡᠯ ᠰᠣᠷᠣᠯᠭ᠎ᠠ ᠪᠠᠨ ᠳᠠᠰᠣᠯᠳᠠᠭᠤᠯᠣᠭᠰᠠᠨ ᠦᠭᠡᠢ ᠶᠤᠮ ᠃                  ᠡᠨᠡ ᠰᠣᠷᠭᠠᠭᠤᠯᠢ ᠳᠤ ᠣᠳᠠᠭ᠎ᠠ ᠳᠠᠷᠠᠭ᠎ᠠ ᠪᠠᠭᠰᠢᠯᠠᠵᠣ ᠪᠠᠶᠢᠭᠰᠠᠨ ᠪᠠᠭᠰᠢ ᠨᠠᠷ ᠪᠣᠯ᠂ ᠵᠢᠭ᠍ᠮᠢᠳᠨᠠᠮᠵᠢᠯ ᠂ ᠳᠠᠪᠢᠨᠢᠩᠪᠤ᠂ ᠴᠣᠭᠳᠣᠭᠡᠷᠡᠯ᠂ ᠫᠧᠩᠱᠢᠩᠭᠡ᠂ ᠳᠠᠰᠢᠵᠠᠮᠰᠣ᠂ ᠪᠠᠯᠾᠠ᠂ ᠳᠣᠭᠠᠷᠨᠢᠮ᠎ᠠ᠂ ᠭᠤᠮᠪᠣᠰᠦᠷᠦᠩ ᠨᠠᠷ ᠪᠣᠯᠣᠨ᠎ᠠ᠃ ᠡᠳᠡᠭᠡᠷ ᠪᠠᠭᠰᠢ ᠨᠠᠷ ᠢ ᠪᠣᠯ ᠬᠤᠰᠢᠭᠤᠨ ᠤ ᠳᠣᠳᠣᠷᠠᠬᠢ ᠨᠠᠷ᠎ᠠ ᠠᠯᠳᠠᠷ ᠪᠦᠬᠦᠢ ᠡᠷᠳᠡᠮᠳᠠᠢ ᠬᠦᠮᠥᠰ  ᠠᠴᠠ ᠳᠣᠬᠢᠷᠠᠭᠤᠯᠵᠣ᠂ ᠭᠠᠳᠠᠨ᠎ᠠ ᠠᠴᠠ ᠪᠠᠰᠠ ᠪᠠᠭᠰᠢ ᠵᠠᠯᠠᠵᠣ ᠠᠪᠴᠢᠷᠠᠭᠰᠠᠨ ᠪᠠᠶᠢᠨ᠎ᠠ᠃ ᠡᠨᠡ ᠪᠣᠯ ᠪᠡᠯᠭᠦᠨᠰᠦ᠋ᠷᠦᠩ ᠠᠴᠠ ᠪᠢᠴᠢᠭ ᠡᠷᠳᠡᠮ ᠰᠣᠷᠬᠤ ᠶᠢ ᠬᠦᠨᠳᠣᠳᠭᠡᠨ ᠦᠵᠡᠵᠣ ᠪᠠᠶᠢᠭᠰᠠᠨ ᠤ ᠢᠯᠡᠷᠡᠯ ᠪᠣᠯᠣᠨ᠎ᠠ᠃ ᠡᠨᠡ ᠰᠣᠷᠭᠠᠭᠤᠯᠢ 1944 — 1945 ᠣᠨ ᠤ ᠦᠶ᠎ᠡ ᠳᠤ᠂ ᠳᠦᠪ ᠶᠣᠰᠣᠨ ᠤ ᠰᠣᠷᠭᠠᠭᠤᠯᠢ ᠪᠣᠯᠵᠣ᠂ ᠦᠨᠳᠦᠷ ᠳᠣᠮᠳᠠ ᠶᠢᠨ ᠬᠡᠮᠵᠢᠶᠡᠨ ᠳᠤ ᠭᠦᠷᠴᠦ ᠬᠡᠯᠡ ᠪᠢᠴᠢᠭ᠂ ᠳᠤᠭ᠎ᠠ ᠪᠣᠳᠣᠯᠭ᠎ᠠ᠂ ᠳᠡᠣᠬᠡ᠂ ᠭᠠᠵᠠᠷ ᠵᠦᠢ᠂ ᠵᠢᠷᠤᠭ᠂ ᠪᠡᠶ᠎ᠡ ᠶᠢᠨ ᠳᠠᠮᠢᠷ ᠤᠨ ᠬᠢᠴᠢᠶᠡᠯ ᠣᠷᠣᠬᠤ ᠪᠣᠯᠵᠣ᠂ ᠰᠣᠷᠣᠭᠴᠢ ᠶᠢᠨ ᠮᠠᠳᠡᠯᠭᠡ ᠴᠦ ᠶᠡᠭᠡ ᠳᠡᠭᠡᠭᠰᠢᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠪᠠᠭᠰᠢ ᠨᠠᠷ ᠤᠨ ᠪᠠᠶᠢᠳᠠᠯ ᠢ ᠬᠡᠯᠡᠪᠡᠯ᠂ ᠴᠠᠬᠠᠷ ᠪᠠᠭᠰᠢ ᠴᠣᠭᠳᠣᠭᠡᠷᠡᠯ ᠪᠣᠯ᠂ ᠮᠣᠩᠭᠤᠯ ᠮᠠᠨᠵᠣ ᠪᠢᠴᠢᠭ ᠮᠡᠳᠡᠬᠦ ᠪᠦᠭᠡᠳ ᠣᠳᠠᠭᠠᠨ ᠵᠢᠯ ᠪᠠᠭᠰᠢᠯᠠᠭᠰᠠᠨ ᠳᠣᠷᠰᠢᠯᠭ᠎ᠠ ᠲᠠᠢ ᠬᠦᠮᠥᠨ ᠶᠤᠮ᠃ ᠰᠣᠷᠣᠭᠴᠢ ᠶᠢ ᠶᠣᠰᠣ ᠲᠦᠷᠢᠮ  ᠲᠠᠢ ᠪᠠᠶᠢᠬᠤ ᠶᠢ ᠴᠢᠩᠭ᠎ᠠ ᠱᠠᠭᠠᠷᠳᠠᠳᠠᠭ᠃ ︽ᠬᠠᠭᠠᠨ ᠤ ᠬᠦᠦ ᠵᠠᠭᠠᠨ ᠣᠨᠣᠭᠠᠳ ᠢᠷᠡᠭᠰᠡᠨ ᠴᠦ ᠲᠡᠷᠡ᠂ ᠬᠠᠷᠠᠴᠣ  ᠶᠢᠨ ᠬᠦᠥ ᠶᠠᠪᠠᠭᠠᠨ ᠭᠦᠶᠦᠭᠡᠳ ᠢᠷᠡᠭᠰᠡᠨ ᠴᠦ ᠲᠡᠷᠡ᠂ ᠰᠣᠷᠭᠠᠭᠤᠯᠢ ᠶᠢᠨ ᠲᠦᠷᠢᠮ ᠢ ᠨᠢᠭᠡᠨ ᠠᠳᠠᠯᠢ ᠴᠢᠩᠭ᠎ᠠ ᠰᠠᠬᠢᠵᠣ ᠪᠠᠶᠢᠬᠤ ᠭᠡᠷᠡᠭᠳᠡᠢ︾ ᠭᠡᠵᠣ ᠰᠣᠷᠭᠠᠳᠠᠭ ᠪᠠᠶᠢᠭᠰᠠᠨ᠃ ᠰᠣᠷᠭᠠᠭᠤᠯᠢ ᠶᠢᠨ ᠳᠠᠷᠤᠭ᠎ᠠ ᠫᠧᠩᠱᠢᠩᠭᠡ ᠪᠣᠯ ᠳᠠᠭᠤᠣ ᠰᠢᠯᠥᠭ᠂ ᠵᠣᠭᠢᠶᠠᠯ ᠪᠢᠴᠢᠬᠦ ᠳᠤ ᠠᠪᠢᠶᠠᠰᠣᠯᠢᠭ ᠪᠠᠶᠢᠵᠣ᠂ ᠮᠣᠩᠭᠤᠯ ᠦᠰᠦᠭ ᠤᠨ ᠡᠬᠡᠰᠢᠭ ᠳᠣᠯᠣᠭᠠᠨ ᠢᠰᠦᠭ ᠤᠨ ᠳᠠᠷᠠᠭᠠᠯᠠᠯ ᠢᠶᠠᠷ ᠦᠭᠡ ᠬᠤᠯᠪᠣᠨ ︽ᠠᠷᠪᠠᠨ ᠡᠷᠳᠡᠮ ᠢᠯᠡᠷᠭᠡᠢ ᠣᠯᠪᠣᠰᠣ ᠣᠬᠠᠭᠠᠨ ᠦᠷᠭᠡᠵᠢᠬᠦ ᠦᠨᠡᠨ ︾ ᠭᠡᠬᠦ ᠮᠠᠳᠣ ᠣᠷᠠᠨ ᠬᠠᠪᠣᠯᠢᠭ ᠢᠶᠠᠷ ︽ᠠᠷᠪᠠᠨ ᠡᠷᠳᠡᠮ︾ ᠢ ᠰᠢᠯᠥᠭᠯᠡᠨ ᠵᠣᠭᠢᠶᠠᠵᠣ᠂ ᠣᠶᠠᠩᠭᠠᠯᠠᠨ ᠣᠩᠰᠢᠵᠣ᠂ ᠰᠣᠷᠣᠭᠴᠢᠳ ᠲᠠᠭᠠᠨ ᠠᠭᠤᠯᠭ᠎ᠠ ᠶᠢ ᠨᠢ ᠨᠢᠭᠡ ᠨᠢᠭᠡ ᠪᠠᠷ ᠳᠠᠶᠢᠯᠪᠣᠷᠢᠯᠠᠨ ᠦᠭᠴᠦ ᠡᠶᠢᠮᠦ ᠬᠦᠮᠥᠨ ᠪᠣᠯᠬᠤ ᠭᠡᠷᠡᠭᠳᠡᠢ ᠭᠡᠵᠣ ᠰᠣᠷᠭᠠᠳᠠᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠭᠡᠯᠡ ᠪᠢᠴᠢᠭ ᠤᠨ ᠪᠠᠭᠰᠢ ᠪᠠᠯᠾᠠ ᠠᠴᠠ ︽ᠠᠷᠪᠠᠨ ᠡᠷᠳᠡᠮ︾ ᠶᠠᠭᠤ ᠪᠣᠢ ᠬᠡᠮᠡᠪᠡᠰᠦ᠄       ᠨᠣᠮ ᠳᠤ ᠮᠡᠷᠭᠡᠨ       ᠨᠣᠶᠢᠷ ᠲᠤ ᠰᠡᠷᠭᠡᠭ       ᠦᠢᠯᠡ ᠳᠤ ᠣᠷᠠᠨ       ᠦᠭᠡᠨ ᠳᠤ ᠰᠡᠴᠡᠨ       ᠬᠠᠣᠯᠢ ᠳᠤ ᠰᠢᠳᠣᠷᠭᠤ       ᠬᠤᠷᠢᠮ ᠳᠤ ᠴᠣᠪᠣᠭᠤ       ᠳᠠᠶᠢᠨ ᠪᠠᠭᠠᠳᠣᠷ       ᠲᠠᠯᠠᠢ ᠳᠤ ᠣᠰᠣᠴᠢ       ᠳᠡᠭᠡᠳᠣ ᠳᠤ ᠵᠢᠰᠣᠷ ᠦᠭᠡᠢ       ᠳᠣᠣᠷᠠᠳᠣ ᠳᠤ ᠨᠠᠶᠢᠷᠠᠳᠠᠢ ᠭᠡᠵᠣ ᠠᠮᠢᠳᠣ ᠳᠦᠷᠰᠦᠯᠢᠭ ᠢᠶᠠᠷ ᠳᠠᠶᠢᠯᠪᠣᠷᠢᠯᠠᠳᠠᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠮᠣᠩᠭᠤᠯ ᠬᠡᠯᠡ ᠪᠢᠴᠢᠭ ᠤᠨ ᠦᠰᠦᠭ ᠬᠤᠯᠪᠣᠬᠤ᠂ ᠵᠦᠪ ᠪᠢᠴᠢᠯᠭᠡ᠂ ᠣᠷᠠᠨ ᠳᠣᠳᠣ ᠣᠩᠰᠢᠯᠭ᠎ᠠ᠂ ᠴᠠᠪᠡᠷ ᠪᠢᠴᠢᠯᠭᠡ ᠬᠢᠭᠡᠳ ᠪᠢᠴᠢᠯᠭᠡ ᠶᠢᠨ ᠳᠢᠭ ᠲᠤ ᠬᠦᠷᠳᠡᠯ᠎ᠠ ᠰᠣᠷᠣᠭᠴᠢᠳ ᠢ ᠨᠠᠷᠢᠨ ᠨᠢᠮᠪᠠᠢ ᠴᠢᠩᠭ᠎ᠠ ᠱᠠᠭᠠᠷᠳᠠᠳᠠᠭ ᠪᠠᠶᠢᠪᠠ᠃ ᠪᠣᠷᠢᠶᠡᠳ ᠪᠠᠭᠰᠢ ᠳᠣᠭᠠᠷᠨᠢᠮ᠎ᠠ ᠪᠣᠯ᠂ ᠭᠠᠵᠠᠷ ᠵᠦᠢ᠂ ᠵᠢᠷᠤᠭ᠂ ᠳᠤᠭ᠎ᠠ ᠪᠣᠳᠣᠯᠭ᠎ᠠ ᠶᠢ ᠰᠠᠶᠢᠬᠠᠨ ᠵᠢᠭᠠᠳᠠᠭ ᠪᠠᠶᠢᠭᠰᠠᠨ᠃ ᠭᠤᠮᠪᠣᠰᠦᠷᠦᠩ ᠪᠣᠯ ᠬᠡᠯᠡ ᠪᠢᠴᠢᠭ᠂ ᠪᠡᠶ᠎ᠡ ᠶᠢᠨ ᠳᠠᠮᠢᠷ ᠢ ᠰᠠᠶᠢᠬᠠᠨ ᠵᠢᠭᠠᠳᠠᠭ ᠪᠠᠭᠰᠢ ᠪᠠᠶᠢᠭᠰᠠᠨ᠃ ᠡᠶᠢᠮᠦ ᠡᠷᠳᠠᠮᠳᠠᠨ ᠮᠡᠷᠭᠡᠵᠢᠯᠳᠠᠨ ᠪᠠᠭᠰᠢ ᠨᠠᠷ ᠤᠨ ᠰᠣᠷᠭᠠᠵᠣ ᠬᠦᠮᠦᠵᠢᠭᠦᠯᠥᠭᠰᠠᠨ ᠤ ᠠᠴᠢ ᠪᠠᠷ ᠰᠣᠷᠭᠠᠭᠤᠯᠢ ᠠᠴᠠ ᠳᠡᠭᠦᠰᠴᠦ ᠭᠠᠷᠣᠭᠰᠠᠨ ᠰᠣᠷᠣᠭᠴᠢᠳ ᠳᠣᠬᠠᠢ ᠶᠢᠨ ᠦᠶ᠎ᠡ  ᠳᠡᠭᠡᠨ ᠡᠷᠳᠠᠮ ᠰᠣᠶᠣᠯ ᠲᠠᠢ ᠳᠤ ᠳᠣᠭᠠᠴᠢᠭᠳᠠᠵᠣ ᠪᠠᠶᠢᠭᠰᠠᠨ ᠢᠶᠠᠷ ᠪᠠᠷᠠᠬᠤ ᠦᠭᠡᠢ᠂ ᠴᠢᠯᠥᠭᠡᠯᠡᠭᠳᠡᠭᠰᠠᠨ ᠤ ᠳᠠᠷᠠᠭ᠎ᠠ ᠪᠠᠷᠤᠭ ᠪᠦᠷ ᠬᠤᠪᠢᠰᠬᠠᠯ ᠤᠨ ᠡᠬᠢᠨ ᠤ ᠦᠶ᠎ᠡ ᠶᠢᠨ ᠺᠡᠳᠠᠷ ᠪᠣᠯᠵᠣ ᠵᠣᠬᠢᠬᠤ ᠬᠡᠮᠵᠢᠶᠠᠨ ᠤ ᠦᠢᠯᠡᠳᠦᠯ ᠭᠠᠷᠭᠠᠵᠣ ᠪᠠᠶᠢᠭᠰᠠᠨ ᠢ ᠴᠦ ᠣᠨᠴᠠ ᠳᠡᠮᠳᠡᠭᠯᠡᠭᠦᠰᠢᠳᠠᠢ ᠶᠤᠮ᠃                  ᠳ᠋᠊᠂ ᠸᠠᠩ ᠭᠦᠦ ᠳᠣᠭᠠᠷᠰᠦᠷᠦᠩ ᠲᠠᠢ ᠪᠠᠨ᠂ ᠪᠡᠶᠢᠯᠡ ᠪᠡᠯᠭᠦᠨᠰᠦ᠋ᠷᠦᠩ ᠢ ᠳᠠᠭᠠᠭᠤᠯᠣᠨ ᠡᠨᠡ ᠰᠣᠷᠭᠠᠭᠤᠯᠢ ᠳᠤ ᠢᠷᠡᠵᠣ ᠬᠠᠷᠢᠭᠤ ᠮᠡᠳᠡᠭᠦᠯᠥᠯᠳᠡ ᠶᠢ ᠰᠣᠨᠣᠰᠣᠭᠰᠠᠨ ᠤ ᠳᠠᠷᠠᠭ᠎ᠠ ᠪᠠᠶᠢᠴᠠᠭᠠᠨ ᠦᠵᠡᠵᠣ ᠡᠨᠡ ᠰᠣᠷᠭᠠᠭᠤᠯᠢ ᠶᠢᠨ ᠰᠣᠷᠣᠯᠭ᠎ᠠ ᠶᠢᠨ ᠬᠢᠷᠢ ᠬᠡᠮᠵᠢᠶ᠎ᠠ ᠶᠢ ᠰᠠᠶᠢᠨ ᠭᠡᠵᠣ ᠦᠨᠡᠯᠡᠵᠣ ᠰᠠᠶᠢᠰᠢᠶᠠᠨ ᠮᠠᠭᠳᠠᠵᠣ ᠪᠠᠶᠢᠭᠰᠠᠨ ᠶᠤᠮ᠃ ᠪᠠᠰᠠ 1942 ᠣᠨ ᠳᠤ ᠳᠣᠰ ᠬᠤᠰᠢᠭᠤᠨ ᠳᠤ ᠦᠬᠢᠳ ᠤᠨ ᠪᠠᠭ᠎ᠠ ᠰᠣᠷᠭᠠᠭᠤᠯᠢ ᠪᠠᠶᠢᠭᠤᠯᠵᠣ᠂ ᠨᠧᠴᠢᠨ ᠢᠶᠠᠷ ᠳᠠᠷᠤᠭ᠎ᠠ ᠪᠠᠭᠰᠢ ᠪᠣᠯᠭᠠᠨ᠂ ᠸᠠᠴᠢᠷᠪᠠᠳᠣ᠂ ᠭᠤᠮᠪᠣᠰᠦᠷᠦᠩ ᠨᠠᠷ ᠪᠠᠭᠰᠢᠯᠠᠵᠣ ᠪᠠᠶᠢᠪᠠ᠃ ᠡᠬᠢᠯᠡᠬᠦ  ᠳᠡᠭᠡᠨ ᠬᠤᠷᠢᠨ ᠭᠡᠳᠦᠨ ᠰᠣᠷᠣᠭᠴᠢ ᠲᠠᠢ᠂ ᠮᠣᠩᠭᠤᠯ ᠬᠡᠯᠡ ᠪᠢᠴᠢᠭ᠂ ᠳᠤᠭ᠎ᠠ ᠪᠣᠳᠣᠯᠭ᠎ᠠ᠂ ᠭᠠᠵᠠᠷ ᠵᠦᠢ᠂ ᠪᠡᠶ᠎ᠡ  ᠶᠢᠨ ᠳᠠᠮᠢᠷ ᠵᠡᠷᠭᠡ ᠬᠢᠴᠢᠶᠠᠯ ᠣᠷᠣᠵᠣ ᠪᠠᠶᠢᠭᠰᠠᠨ ᠤ ᠬᠠᠮᠳᠣ ᠳᠣᠪᠤ᠂ ᠵᠢᠷᠭᠤᠭᠠᠨ ᠮᠣᠩᠭᠤᠯ ᠭᠡᠷ ᠢᠶᠠᠷ᠂ ᠪᠠᠷᠳᠡᠭ ᠰᠢᠷᠠᠳᠠᠯ᠎ᠠ ᠵᠡᠷᠭᠡ ᠭᠠᠵᠠᠷ ᠢᠶᠠᠷ , ᠣᠯᠠᠷᠢᠯ ᠢ ᠲᠠᠭᠠᠨ ᠰᠢᠯᠵᠢᠨ ᠨᠡᠭᠦᠵᠣ᠂ ᠨᠢᠭᠡᠨ ᠰᠦᠷᠦᠭ ᠬᠤᠨᠢ᠂ ᠨᠢᠭᠡᠨ ᠰᠦᠷᠦᠭ ᠦᠬᠡᠷ ᠮᠠᠯᠵᠢᠵᠣ᠂ ᠰᠣᠷᠣᠭᠴᠢᠳ ᠨᠢ ᠦᠨᠢᠶ᠎ᠡ᠂ ᠬᠤᠨᠢ ᠰᠠᠭᠠᠬᠤ᠂ ᠰᠦ ᠰᠠᠭᠠᠯᠢ ᠪᠣᠯᠪᠠᠰᠣᠷᠠᠭᠤᠯᠬᠤ᠂ ᠠᠷᠭᠠᠯ ᠳᠡᠭᠦᠭᠦ᠂ ᠬᠤᠪᠴᠠᠰᠣ ᠬᠤᠨᠠᠷ ᠣᠶᠣᠬᠤ ᠵᠡᠷᠭᠡ ᠮᠠᠯ ᠠᠵᠣ ᠠᠬᠤᠶᠢᠳᠠᠨ ᠤ ᠪᠠᠶᠢᠳᠠᠯ ᠳᠤ ᠳᠣᠭᠢᠷᠠᠭᠰᠠᠨ ᠰᠣᠷᠣᠯᠭ᠎ᠠ᠂ ᠭᠦᠳᠡᠯᠮᠦᠷᠢ ᠶᠢ ᠣᠶᠠᠯᠳᠣᠭᠤᠯᠭᠰᠠᠨ ᠰᠣᠷᠭᠠᠭᠤᠯᠢ ᠶᠢ ᠪᠠᠶᠢᠭᠤᠯᠵᠣ᠂ ᠵᠠᠯᠠᠭᠤ ᠬᠤᠶᠢᠴᠢ ᠦᠶ᠎ᠡ ᠶᠢᠨ  ᠬᠢᠨ ᠢ ᠪᠢᠴᠢᠭ ᠡᠷᠳᠡᠮ ᠰᠣᠷᠭᠠᠬᠤ ᠳᠤ ᠶᠡᠭᠡ ᠠᠩᠬᠠᠷᠴᠣ ᠪᠠᠶᠢᠭᠰᠠᠨ ᠢ ᠡᠭᠦᠨ ᠠᠴᠠ ᠮᠠᠳᠠᠵᠣ ᠪᠣᠯᠣᠨ᠎ᠠ᠃                  ᠡᠨᠡ ᠰᠣᠷᠭᠠᠭᠤᠯᠢ ᠶᠢᠨ ᠳᠠᠷᠤᠭ᠎ᠠ ᠨᠧᠴᠢᠨ ᠪᠣᠯ ︽ᠦᠰᠦᠭ ᠨᠠᠶᠢᠷᠠᠭᠤᠯᠬᠤ ᠢᠯᠡᠳᠬᠡᠯ︾ ᠭᠡᠰᠡᠨ ᠵᠣᠬᠢᠶᠠᠯ ᠪᠢᠴᠢᠵᠣ᠂ ᠵᠦᠪ ᠪᠢᠴᠢᠯᠭᠡ ᠶᠢᠨ ᠳᠦᠷᠢᠮ ᠢ ᠳᠦᠬᠦᠮ ᠢᠶᠠᠷ ᠣᠶᠢᠯᠠᠭᠠᠬᠤ ᠳᠤ ᠳᠣᠰᠠᠯᠠᠮᠵᠢ ᠪᠣᠯᠭᠠᠵᠣ ᠪᠠᠶᠢᠭᠰᠠᠨ ᠪᠠ ︽ᠠᠳᠣᠭᠤᠯᠬᠤ ᠬᠦᠷᠦᠩᠭᠡ ᠶᠢᠨ ᠶᠡᠷᠦ ᠶᠢᠨ ᠮᠠᠳᠡᠯᠭᠡ︾ ᠭᠡᠰᠡᠨ ᠵᠣᠬᠢᠶᠠᠯ ᠪᠢᠴᠢᠵᠣ᠂ ᠮᠠᠯ ᠦᠰᠭᠡᠬᠦ ᠠᠷᠭ᠎ᠠ ᠶᠢ ᠰᠣᠷᠣᠭᠴᠢ ᠨᠠᠷ ᠲᠠᠭᠠᠨ ᠳᠦᠭᠦᠮ ᠳᠠᠨᠢᠭᠤᠯᠵᠣ ᠪᠠᠶᠢᠭᠰᠠᠨ ᠵᠡᠷᠭᠡ ᠰᠣᠷᠬᠤ ᠳᠤ ᠳᠦᠭᠦᠮ ᠠᠴᠢ ᠳᠣᠰᠠ  ᠲᠠᠢ ᠠᠵᠢᠯ ᠤᠳ ᠢ ᠭᠢᠵᠣ ᠪᠠᠶᠢᠵᠠᠢ᠃ ᠁ ᠬᠤᠰᠢᠭᠤᠨ ᠠᠴᠠ ᠬᠦᠪᠡᠭᠦᠳ᠂ ᠦᠬᠢᠳ ᠬᠤᠶᠠᠷ ᠰᠣᠷᠭᠠᠭᠤᠯᠢ  ᠶᠢᠨ ᠰᠣᠷᠣᠭᠴᠢ ᠪᠦᠬᠦᠨ ᠳᠤ ᠨᠢᠭᠡᠨ ᠠᠳᠠᠯᠢ ᠰᠢᠨ᠎ᠡ ᠬᠤᠪᠴᠠᠰᠣ ᠬᠢᠯᠭᠡᠵᠣ᠂ ᠰᠦᠮ᠎ᠡ ᠶᠢᠨ ᠴᠠᠭ ᠤᠨ ᠬᠤᠷᠠᠯ ᠢ ᠳᠣᠬᠢᠶᠠᠯᠳᠣᠭᠤᠯᠣᠨ ᠳᠣᠭᠤᠷᠢᠭᠤᠯᠣᠨ ᠦᠵᠡᠭᠦᠯᠵᠣ᠂ ᠰᠣᠷᠣᠭᠴᠢᠳ ᠤᠨ ᠣᠷᠮ᠎ᠠ ᠵᠣᠷᠢᠭ ᠢ ᠭᠦᠭᠵᠢᠭᠡᠵᠣ ᠪᠠᠶᠢᠭᠰᠠᠨ ᠣᠳᠠᠭ᠎ᠠ ᠴᠦ ᠪᠣᠢ᠃                  1941 ᠣᠨ ᠤ ᠦᠶ᠎ᠡ ᠳᠤ ᠵᠡᠭᠦᠨ ᠠᠪᠠᠭ᠋ᠠᠨᠠᠷ ᠬᠤᠰᠢᠭᠤᠨ ᠤ ᠬᠤᠷᠰᠢᠶ᠎ᠠ ︵ᠬᠠᠩᠭᠠᠯᠭ᠎ᠠ ᠶᠢᠨ︶ ᠭᠡᠵᠤ ᠪᠠᠨᠳᠢᠳᠠ ᠬᠡᠬᠡᠨ ᠬᠡᠶᠢᠳ ᠲᠤ ᠠᠩᠬ᠎ᠠ ᠣᠳᠠᠭ᠎ᠠ ᠪᠠᠶᠢᠭᠤᠯᠵᠣ᠂ ᠳᠠᠷᠤᠭ᠎ᠠ ᠨᠢ ᠫᠧᠩᠱᠢᠩᠭᠡ᠂ ᠯᠾᠠᠰᠦ᠋ᠷᠦᠩ᠂ ᠠᠵᠢᠯᠳᠡᠨ ᠳᠠᠪᠤ ᠠᠴᠠ ᠳᠣᠯᠣᠭᠠᠨ ᠬᠦᠮᠥᠨ ᠪᠠᠶᠢᠭᠰᠠᠨ ᠶᠤᠮ᠃ ᠡᠬᠡ ᠪᠡᠯ᠎ᠡ ᠶᠢ ᠬᠤᠰᠢᠭᠤ᠂ ᠰᠣᠮᠣᠨ ᠤ ᠠᠷᠠᠳ ᠣᠯᠠᠨ ᠠᠴᠠ ᠶᠡᠭᠡ ᠪᠠᠭ᠎ᠠ ᠠᠳᠠᠯᠢ ᠦᠭᠡᠢ ᠭᠡᠮᠵᠢᠶ᠎ᠡ ᠪᠠᠷ ᠠᠯᠪᠠᠨ ᠵᠢᠷᠦᠮ ᠢᠶᠠᠷ ᠳᠠᠳᠠᠪᠣᠷᠢᠯᠠᠨ ᠠᠪᠴᠣ ᠡᠨᠡ ᠬᠤᠷᠰᠢᠶ᠎ᠠ ᠶᠢ ᠪᠠᠶᠢᠭᠤᠯᠣᠭᠰᠠᠨ ᠶᠤᠮ᠃ ᠳᠣᠬᠠᠢ ᠶᠢᠨ ᠦᠶ᠎ᠡ ᠳᠤ ᠶᠠᠫᠣᠨ ᠡᠵᠡᠷᠭᠡᠭᠯᠡᠵᠣ᠂ ᠦᠷᠭᠡᠨ ᠭᠡᠷᠡᠭᠴᠡᠭᠡᠨ ᠤ ᠡᠳ᠋ ᠪᠣᠳᠠᠰ ᠢᠶᠠᠷ ᠪᠠᠶᠢᠭᠰᠠᠨ ᠦᠶ᠎ᠡ ᠳᠤ᠂ ᠣᠯᠠᠨ ᠲᠦᠮᠡᠨ ᠤ ᠠᠮᠢᠳᠣᠷᠠᠯ ᠤᠨ ᠬᠠᠩᠭᠠᠯᠭ᠎ᠠ ᠳᠤ ᠶᠠᠬᠡᠬᠡᠨ ᠳᠣᠰᠠ ᠳᠦᠭᠦᠮ ᠦᠵᠡᠭᠦᠯᠵᠣ ᠪᠠᠶᠢᠭᠰᠠᠨ ᠶᠤᠮ᠃ ᠪᠡᠯᠭᠦᠨᠰᠦ᠋ᠷᠦᠩ ᠳᠤ ᠦᠪᠡᠷ ᠤᠨ ᠲᠦᠷᠦᠭᠰᠡᠨ ᠭᠡᠣᠭᠡᠳ ᠦᠭᠡᠢ᠂ ᠪᠣᠰᠣᠳ ᠠᠴᠠ ᠦᠷᠡᠴᠢᠯᠡᠵᠣ ᠠᠪᠣᠭᠰᠠᠨ ᠬᠤᠶᠠᠷ ᠬᠦᠥ᠂ ᠨᠢᠭᠡ ᠬᠡᠣᠭᠡᠨ᠂ ᠠᠪᠠᠭ᠎ᠠ ᠡᠭᠡᠴᠢ ᠲᠠᠢ ᠪᠠᠨ ᠭᠡᠷ ᠲᠡᠭᠡᠨ ᠵᠢᠷᠭᠤᠭᠠᠨ ᠠᠮᠠ ᠬᠦᠮᠥᠨ ᠲᠠᠢ ᠪᠠᠶᠢᠭᠰᠠᠨ ᠶᠤᠮ᠃ ᠡᠭᠦᠨ ᠢ ᠨᠠᠷᠢᠪᠴᠢᠯᠠᠪᠠᠯ ᠨᠢᠭᠡ ᠬᠦᠥ ᠶᠢ ᠣᠶᠢᠷ᠎ᠠ ᠲᠦᠷᠦᠯ ᠤᠨ ᠳᠠᠶᠢᠵᠢ ᠳᠣᠰᠢᠶᠠᠯᠳᠣ ᠳᠣᠰᠠᠯᠠᠭᠴᠢ ᠵᠠᠭᠠᠷᠰᠠᠮᠪᠠᠷᠠ ᠶᠢᠨ ᠬᠢ ᠠᠴᠠ ᠦᠷᠡᠴᠢᠯᠡᠵᠣ ᠠᠯᠣᠰ ᠲᠠᠭᠠᠨ ᠦᠪᠡᠷ ᠤᠨ ᠵᠡᠷᠭᠡ ᠳᠣᠰᠢᠶᠠᠯ ᠢ ᠵᠠᠯᠭᠠᠮᠵᠢᠯᠠᠭᠤᠯᠵᠣ ᠬᠤᠰᠢᠭᠤᠨ ᠤ ᠵᠠᠰᠠᠭ ᠰᠠᠭᠤᠯᠭᠠᠬᠤ ᠪᠠᠷ ᠪᠠᠶᠢᠭᠰᠠᠨ ᠶᠤᠮ᠃ ᠡᠨᠡ ᠬᠦᠥ ᠶᠢᠨ ᠵᠢᠩᠬᠢᠨᠢ ᠨᠡᠷ᠎ᠡ ᠨᠢ ᠳᠠᠯᠠᠾᠠᠵᠠᠪ ᠭᠡᠳᠡᠭ᠃ ᠰᠣᠶᠣᠯ ᠤᠨ ᠬᠡᠮᠵᠢᠶ᠎ᠠ ᠦᠨᠳᠦᠷ᠂ ᠳᠤᠭ᠎ᠠ ᠪᠣᠳᠣᠯᠭ᠎ᠠ ᠳᠤ ᠰᠠᠶᠢᠨ᠃ ᠴᠢᠯᠥᠭᠡᠯᠡᠭᠳᠡᠭᠰᠡᠨ ᠤ ᠳᠠᠷᠠᠭ᠎ᠠ 1951 ᠣᠨ ᠠᠴᠠ ᠬᠤᠰᠢᠭᠤᠨ ᠤ ᠬᠤᠷᠰᠢᠶᠠᠨ ᠤ ᠨᠠᠷᠢᠨ ᠪᠢᠴᠢᠭ ᠤᠨ ᠠᠵᠢᠯ ᠢ ᠬᠢᠵᠣ᠂ ᠳᠠᠷᠠᠭ᠎ᠠ ᠨᠢ 1955 ᠣᠨ ᠳᠤ ᠵᠠᠷᠠᠭ᠎ᠠ ᠰᠦᠮ᠎ᠡ ᠳᠠᠬᠢ ᠰᠣᠮᠣᠨ ᠤ ᠬᠠᠩᠭᠠᠯᠭ᠎ᠠ ᠶᠢᠨ ᠬᠤᠷᠰᠢᠶᠠᠨ ᠤ ᠡᠷᠬᠢᠯᠡᠭᠴᠢ ᠶᠢᠨ ᠠᠵᠢᠯ ᠢ ᠬᠢᠵᠣ ᠪᠠᠶᠢᠭᠠᠳ 1961 ᠣᠨ ᠳᠤ ᠬᠡᠬᠡᠯ ᠬᠠᠶᠠᠬᠤ ᠡᠪᠡᠳᠴᠢᠨ ᠢᠶᠠᠷ ᠨᠠᠰᠣ ᠪᠠᠷᠠᠪᠠ᠃ ᠨᠦᠬᠦᠭᠡ ᠨᠢᠭᠡ ᠬᠦᠥ ᠶᠢ ᠪᠣᠯ ᠳᠣᠳᠬᠦᠶᠢᠶᠠᠩᠵᠠᠪ ᠤᠨ ᠬᠡᠷ ᠠᠴᠠ ᠦᠷᠡᠴᠢᠯᠠᠵᠣ ᠠᠪᠣᠭᠠᠳ ᠳᠠᠮᠡᠢ ᠭᠡᠳᠦᠨ ᠵᠢᠯ ᠪᠣᠯᠣᠭᠰᠠᠨ ᠦᠭᠡᠢ ᠨᠠᠰᠣ ᠪᠠᠷᠠᠵᠠᠢ᠃ ᠨᠢᠬᠡ ᠬᠡᠣᠭᠡᠨ ᠢ ᠪᠣᠯ ᠨᠠᠮᠰᠠᠷᠠᠢ ᠳᠡᠷᠢᠭᠦᠨ ᠤ ᠬᠢ ᠠᠴᠠ ᠦᠷᠡᠴᠢᠯᠡᠵᠣ ᠠᠪᠣᠭᠠᠳ᠂ ᠴᠢᠯᠥᠭᠡᠯᠥᠭᠳᠡᠭᠰᠡᠨ ᠤ ᠳᠠᠷᠠᠭ᠎ᠠ ᠡᠨᠡ ᠬᠡᠣᠭᠡᠨ ᠠᠶᠢᠮᠠᠭ ᠤᠨ ᠣᠷᠠᠨ ᠰᠠᠶᠢᠬᠠᠨ ᠳᠤ ᠬᠡᠳᠦᠨ ᠵᠢᠯ ᠳᠠᠭᠤᠴᠢᠨ ᠬᠦᠭᠵᠢᠮᠴᠢᠨ ᠤ ᠠᠵᠢᠯ ᠢ ᠬᠢᠵᠣ ᠪᠠᠶᠢᠭᠠᠳ ᠳᠠᠷᠠᠭ᠎ᠠ ᠨᠢ ᠭᠦᠳᠡᠭᠡ ᠶᠢᠨ ᠮᠠᠯᠴᠢᠨ ᠪᠣᠯᠵᠣ 1948 ᠣᠨ  ᠳᠤ ᠮᠥᠨ ᠡᠪᠡᠳᠴᠢᠨ ᠢᠶᠠᠷ ᠨᠠᠰᠣ ᠪᠠᠷᠠᠪᠠ᠃       ᠭᠡᠷ ᠣᠷᠳᠣᠨ ᠮᠠᠯ ᠬᠦᠷᠦᠩᠭᠡ ᠶᠢᠨ ᠪᠠᠶᠢᠳᠠᠯ ᠪᠢ ᠪᠠᠨᠳᠢᠳᠠ ᠭᠡᠭᠡᠨ ᠤ ᠬᠡᠶᠢᠳ ᠲᠤ ᠠᠷᠪᠠᠭᠠᠳ ᠳᠠᠰᠣᠯᠭ᠎ᠠ ᠪᠠᠶᠢᠰᠢᠩ ᠭᠡᠷ ᠲᠠᠢ᠂ ᠦᠭᠡᠷ᠎ᠡ ᠭᠠᠵᠠᠷ ᠰᠠᠭᠤᠷᠢᠰᠢᠨ ᠰᠠᠭᠤᠭᠰᠠᠨ ᠪᠠᠶᠢᠰᠢᠩ ᠭᠡᠷ ᠭᠡᠵᠤ ᠪᠠᠶᠢᠭᠰᠠᠨ ᠦᠭᠡᠢ᠃ ᠪᠣᠷᠬᠠᠨ ᠰᠢᠳᠦᠬᠡᠨ ᠤ ᠭᠡᠷ᠂ ᠳᠠᠮᠠᠭᠠᠨ ᠤ ᠣᠷᠳᠣᠨ᠂ ᠨᠣᠶᠠᠳ ᠠᠪᠠᠭ᠋ᠠᠢ ᠨᠠᠷ ᠤᠨ ᠰᠠᠭᠤᠬᠤ ᠣᠷᠳᠣᠨ᠂ ᠵᠣᠴᠢᠳ ᠪᠠᠭᠤᠯᠭᠠᠬᠤ ᠭᠡᠷ᠂ ᠨᠣᠶᠠᠨ ᠰᠠᠩ ᠤᠨ ᠬᠠᠮᠢᠶᠠᠳᠠᠢ ᠭᠡᠳᠦᠨ ᠭᠡᠷ᠂ ᠰᠦ ᠰᠠᠭᠠᠯᠢ ᠶᠢᠨ ᠭᠡᠷ ᠵᠡᠷᠭᠡ ᠠᠷᠪᠠᠨ ᠳᠦᠷᠪᠡ ᠳᠠᠪᠣᠨ ᠮᠣᠩᠭᠤᠯ ᠭᠡᠷ ᠲᠠᠢ᠂ ᠵᠢᠯ ᠤᠨ ᠳᠦᠷᠪᠡᠨ ᠣᠯᠠᠷᠢᠯ ᠳᠤ ᠬᠤᠶᠠᠷ — ᠭᠤᠷᠪᠠᠨ ᠣᠳᠠᠭ᠎ᠠ ᠨᠣᠳᠤᠭ ᠰᠢᠯᠵᠢᠨ ᠨᠡᠭᠦᠳᠡᠭ᠃ ᠦᠪᠡᠷ ᠲᠡᠭᠡᠨ ᠭᠤᠴᠢᠭᠠᠳ ᠦᠭᠡᠷ ᠳᠡᠷᠭᠡ ᠲᠠᠢ᠂ ᠰᠣᠯᠠ  ᠶᠢᠨ ᠵᠢᠩᠰᠡᠳᠠᠨ᠂ ᠰᠣᠮᠣᠨ ᠤ ᠬᠤᠶᠠᠭ ᠨᠠᠷ ᠢᠷᠡᠵᠣ ᠨᠡᠭᠦᠯᠭᠡᠳᠡᠭ᠃ ᠪᠠᠰᠠ ᠶᠡᠭᠡ ᠪᠠᠭ᠎ᠠ ᠬᠤᠶᠠᠷ ᠮᠠᠰᠢᠨ ᠳᠡᠷᠭᠡ  ᠲᠠᠢ ᠪᠠᠶᠢᠭᠰᠠᠨ ᠶᠤᠮ᠃                  ᠮᠠᠯ ᠰᠦᠷᠦᠭ ᠢ ᠪᠠᠷᠣᠭᠯᠠᠪᠠᠯ᠄ ᠰᠠᠷᠠᠯ᠂ ᠪᠠᠷᠠᠭᠠᠨ᠂ ᠬᠤᠸᠠ ᠵᠢᠰᠣ ᠢᠯᠭᠠᠬᠰᠠᠨ ᠭᠤᠷᠪᠠᠨ ᠰᠦᠷᠦᠭ ᠠᠳᠣᠭᠤ ᠶᠢ 2000᠂ ᠨᠢᠭᠡ ᠰᠦᠷᠦᠭ ᠦᠬᠡᠷ ᠢ 150᠂ ᠨᠢᠭᠡ ᠰᠦᠷᠦᠭ ᠳᠡᠮᠡᠭᠡ ᠶᠢ 100᠂ ᠠᠷᠪᠠᠨ ᠰᠦᠷᠦᠭ ᠬᠤᠨᠢ ᠨᠢ 8000 ᠪᠠᠷ ᠪᠣᠳᠣᠬᠤ ᠳᠤ ᠲᠦᠮᠡᠨ ᠮᠠᠯ ᠲᠠᠢ ᠪᠠᠶᠢᠵᠠᠢ᠃ ᠡᠨᠡ ᠠᠷᠪᠠᠨ ᠳᠠᠪᠣᠨ ᠰᠦᠷᠦᠭ ᠮᠠᠯ ᠠᠴᠠ ᠭᠤᠷᠪᠠᠨ ᠰᠦᠷᠦᠭ ᠠᠳᠣᠭᠤ᠂ ᠨᠢᠭᠡ ᠰᠦᠷᠦᠭ ᠦᠬᠡᠷ᠂ ᠨᠢᠭᠡ ᠰᠦᠷᠦᠭ ᠳᠡᠮᠡᠭᠡ᠂ ᠭᠤᠷᠪᠠᠨ ᠰᠦᠷᠦᠭ ᠬᠤᠨᠢ ᠶᠢ ᠨᠣᠶᠠᠨ ᠤ ᠰᠠᠩ ᠠᠴᠠ ᠰᠢᠭᠤᠳ ᠬᠠᠮᠢᠶᠠᠷᠣᠨ᠂ ᠣᠰᠣ ᠪᠡᠯᠴᠢᠭᠡᠷ ᠢ ᠳᠣᠬᠢᠷᠠᠭᠤᠯᠵᠣ᠂ ᠨᠣᠶᠠᠨ ᠤ ᠣᠷᠳᠣᠨ ᠣᠶᠢᠷᠠᠯᠴᠠᠭ᠎ᠠ ᠮᠠᠯᠵᠢᠳᠠᠭ᠃ ᠮᠠᠯᠵᠢᠭᠰᠠᠨ ᠬᠦᠮᠥᠨ ᠳᠤ ᠰᠠᠷ᠎ᠠ᠂ ᠵᠢᠯ ᠢᠶᠠᠷ ᠪᠣᠳᠣᠵᠣ ᠦᠭᠬᠦ ᠭᠦᠯᠥᠰᠣ ᠭᠦᠴᠦ ᠭᠡᠵᠤ ᠪᠠᠶᠢᠳᠠᠭ ᠦᠭᠡᠢ᠂ ᠵᠦᠪᠬᠡᠨ ᠵᠣᠨ᠂ ᠡᠪᠦᠯ ᠤᠨ ᠬᠤᠪᠴᠠᠰᠣᠨ ᠳᠤ ᠪᠠᠭ᠎ᠠ ᠰᠠᠭ᠎ᠠ ᠨᠡᠮᠡᠷᠢᠯᠡᠵᠣ᠂ ᠵᠢᠯ ᠤᠨ ᠢᠳᠡᠬᠦ ᠠᠮᠣ ᠪᠣᠳᠠᠭ᠎ᠠ᠂ ᠣᠯᠠᠭᠠᠨ ᠬᠦᠨᠡᠰᠦᠨ ᠤ ᠬᠠᠭᠠᠰ ᠣᠷᠴᠢᠮ ᠢ ᠯᠠ ᠳᠠᠰᠣᠯᠠᠵᠣ ᠪᠠᠶᠢᠭᠰᠠᠨ ᠶᠤᠮ᠂᠃ ᠨᠡᠭᠦᠵᠣ ᠵᠦᠭᠡᠭᠡᠬᠦ ᠳᠤ ᠭᠡᠷᠡᠭᠯᠡᠬᠦ ᠳᠡᠷᠭᠡ ᠬᠦᠰᠭᠡ᠂ ᠮᠠᠯ ᠳᠤ ᠣᠨᠣᠬᠤ ᠣᠨᠣᠭᠠᠷᠢ ᠮᠣᠷᠢ᠂ ᠬᠤᠷᠤᠭ᠎ᠠ ᠬᠠᠰᠢᠶ᠎ᠠ ᠵᠡᠷᠭᠡ ᠶᠢ ᠨᠣᠶᠠᠨ ᠤ ᠰᠠᠩ ᠠᠴᠠ ᠬᠠᠷᠢᠭᠤᠴᠠᠳᠠᠭ᠃                  ᠪᠣᠰᠣᠳ ᠳᠣᠯᠣᠭᠠᠨ ᠰᠦᠷᠦᠭ ᠪᠣᠭ ᠮᠠᠯ ᠢ ᠠᠯᠪᠠᠳᠣ ᠬᠠᠷᠢᠶᠠᠳᠣ ᠶᠢᠨ ᠠᠶᠢᠯ ᠡᠷᠦᠬᠡ ᠳᠤ ᠰᠦᠷᠦᠭ ᠳᠠᠯᠪᠢᠨ ᠮᠠᠯᠵᠢᠭᠤᠯᠳᠠᠭ᠃ ᠰᠦᠷᠦᠭ ᠮᠠᠯᠵᠢᠭᠤᠯᠬᠤ ᠳᠦᠷᠢᠮ ᠨᠢ᠄ ᠨᠡᠭᠦᠵᠣ ᠵᠦᠭᠡᠭᠡᠭᠦ ᠳᠤ ᠭᠡᠷᠡᠭᠯᠡᠬᠦ ᠳᠡᠷᠭᠡ ᠬᠦᠰᠭᠡ ᠂ ᠮᠠᠯ ᠬᠠᠷᠠᠬᠤ ᠬᠦᠮᠥᠨ ᠤ ᠣᠨᠣᠭᠠᠷᠢ ᠮᠣᠷᠢ᠂ ᠬᠤᠨᠢᠨ ᠤ ᠬᠤᠷᠤᠭ᠎ᠠ ᠬᠠᠰᠢᠶ᠎ᠠ ᠵᠡᠷᠭᠡ ᠶᠢ ᠨᠣᠶᠠᠨ ᠤ ᠰᠠᠩ ᠠᠴᠠ ᠦᠭᠳᠡᠭ ᠦᠭᠡᠢ᠂ ᠰᠦᠷᠦᠭ ᠮᠠᠯᠵᠢᠭᠰᠠᠨ ᠠᠶᠢᠯ ᠦᠪᠡᠷᠳᠡᠭᠡᠨ ᠬᠠᠷᠢᠭᠤᠴᠠᠨ᠎ᠠ᠂ ᠬᠠᠷᠢᠨ ᠬᠤᠨᠢ ᠬᠤᠷᠠᠭᠠᠨ ᠤ ᠣᠩᠭᠠᠰᠣ᠂ ᠢᠮᠠᠭᠠᠨ ᠤ ᠨᠣᠣᠰᠣ᠂ ᠬᠤᠨᠢᠨ ᠤ ᠬᠦᠷᠵᠡᠩ᠂ ᠰᠦ ᠰᠠᠭᠠᠯᠢ᠂ ᠢᠭᠡᠷ᠎ᠡ ᠶᠢᠨ ᠦᠷᠦᠭᠡᠰᠦᠨ᠂ ᠵᠣᠬᠢᠰ ᠦᠭᠡᠢ ᠲᠦᠯ ᠵᠡᠷᠭᠡ ᠶᠢ ᠪᠣᠯ ᠰᠦᠷᠦᠭ ᠮᠠᠯᠵᠢᠭᠰᠠᠨ ᠠᠶᠢᠯ ᠳᠤ ᠦᠭᠳᠡᠭ ᠶᠤᠮ᠃ ᠨᠢᠭᠡ ᠵᠢᠯ ᠳᠤ ᠶᠡᠭᠡ ᠢᠰᠡᠭᠡᠢ ᠳᠠᠪᠤ᠂ ᠦᠬᠦᠵᠣ ᠬᠤᠷᠣᠭᠳᠠᠭᠰᠠᠨ ᠬᠤᠨᠢ ᠢᠮᠠᠭ᠎ᠠ᠂ ᠬᠤᠷᠠᠭ᠎ᠠ ᠢᠰᠢᠭᠡᠨ ᠤ ᠠᠷᠠᠰᠣ ᠪᠣᠯᠣᠨ ᠳᠣᠰ ᠵᠢᠯ ᠳᠤ ᠡᠷ᠎ᠡ ᠰᠢᠳᠣᠯᠠᠩ ᠬᠤᠨᠢ᠂ ᠢᠮᠠᠭ᠎ᠠ᠂ ᠭᠡᠳᠦᠢ ᠪᠠᠶᠢᠪᠠᠯ ᠪᠦᠬᠦᠨ ᠢ ᠨᠣᠶᠠᠨ ᠤ ᠰᠠᠩ ᠳᠤ ᠳᠣᠰᠢᠶᠠᠳᠠᠭ ᠢᠩᠭᠢᠭᠡᠳ ᠵᠢᠯ ᠤᠨ ᠡᠴᠦᠰ ᠤᠨ ᠳᠣᠭᠠᠨ ᠳᠡᠭᠡᠷ᠎ᠡ ᠬᠤᠷᠢᠨ ᠮᠠᠯ ᠴᠡᠪᠡᠷ ᠦᠰᠦᠭᠰᠡᠨ ᠪᠠᠶᠢᠪᠠᠯ᠂ ᠨᠢᠭᠡ ᠮᠠᠯ ᠢᠶᠠᠷ ᠱᠠᠩᠨᠠᠳᠠᠭ ᠪᠠᠶᠢᠭᠰᠠᠨ ᠪᠣᠯᠪᠠᠴᠣ ᠰᠦᠷᠦᠭ ᠮᠠᠯᠵᠢᠳᠠᠭ ᠬᠦᠮᠥᠰ ᠱᠠᠩᠨᠠᠯ ᠣᠯᠬᠤ ᠨᠢ ᠳᠣᠩ ᠴᠦᠬᠡᠨ ᠪᠠᠶᠢᠳᠠᠭ ᠶᠤᠮ᠃ ᠪᠡᠯᠭᠦᠨᠰᠦ᠋ᠷᠦᠩ ᠤᠨ ᠵᠠᠰᠠᠭ ᠲᠦᠷᠦ ᠪᠠᠷᠢᠭᠰᠠᠨ ᠠᠷᠪᠡᠨ ᠳᠣᠯᠣᠭᠠᠨ ᠵᠢᠯ ᠤᠨ ᠳᠣᠳᠣᠷ᠎ᠠ ᠡᠬᠢᠨ ᠤ ᠦᠶ᠎ᠡ ᠳᠤ ᠬᠤᠰᠢᠭᠤᠨ ᠤ ᠮᠠᠯ ᠤᠨ ᠳᠤᠭ᠎ᠠ ᠳᠣᠯᠣᠭᠠᠢ ᠰᠦᠷᠡᠬᠡᠢ ᠨᠡᠮᠡᠭᠳᠡᠵᠣ ᠪᠠᠶᠢᠭᠰᠠᠨ ᠪᠣᠯ᠂ ᠰᠡᠭᠦᠯ ᠤᠨ ᠦᠶ᠎ᠡ ᠳᠤ ᠶᠠᠫᠣᠨ ᠡᠵᠡᠯᠡᠭᠰᠡᠨ ᠠᠴᠠ ᠬᠤᠶᠢᠰᠢ ᠪᠠᠭᠤᠷᠠᠵᠣ ᠡᠬᠢᠯᠡᠭᠡᠳ᠂ ᠳᠡᠯᠡᠬᠡᠢ ᠶᠢᠨ ᠬᠤᠶᠠᠳᠣᠭᠠᠷ ᠳᠠᠶᠢᠨ ᠤ ᠴᠡᠷᠢᠭ ᠤᠨ ᠬᠦᠯ ᠳᠤ ᠪᠦᠷᠢᠮᠥᠰᠦᠨ ᠰᠦᠢᠳᠴᠦ᠂ ᠴᠢᠯᠥᠭᠡᠯᠡᠭᠳᠡᠬᠦ ᠦᠶ᠎ᠡ ᠳᠤ ᠬᠡᠳᠣᠬᠡᠨ ᠲᠦᠮᠡᠨ ᠮᠠᠯ ᠲᠠᠢ ᠪᠣᠯᠣᠭᠰᠠᠨ ᠪᠢᠯᠡ᠃ ᠰᠡᠭᠦᠯ ᠤᠨ ᠦᠶ᠎ᠡ ᠳᠤ ᠰᠣᠷᠭᠠᠭᠤᠯᠢ ᠪᠠᠶᠢᠭᠤᠯᠵᠣ ᠰᠠᠶᠢᠨ ᠡᠷᠬᠢᠯᠡᠭᠰᠡᠨ ᠠᠴᠠ ᠬᠡᠣᠭᠡᠳ ᠵᠠᠯᠭᠤᠴᠣᠳ ᠲᠤ ᠪᠢᠴᠢᠭ ᠰᠣᠶᠣᠯ ᠲᠠᠢ ᠬᠦᠮᠥᠨ ᠨᠡᠯᠢᠶᠡᠳ ᠨᠡᠮᠡᠭᠳᠡᠭᠰᠡᠨ᠃ ᠴᠢᠯᠥᠬᠡᠯᠡᠭᠳᠡᠭᠦ ᠠᠴᠠ ᠡᠮᠦᠨ᠎ᠠ ᠮᠠᠨ ᠤ ᠬᠤᠰᠢᠭᠤᠨ ᠤ ᠨᠣᠳᠤᠭ ᠳᠡᠪᠢᠰᠭᠡᠷ ᠳᠡᠭᠡᠷ᠎ᠡ ᠳᠡᠭᠡᠷᠡᠮ ᠬᠤᠯᠠᠭᠠᠢ ᠶᠡᠷᠦ ᠭᠠᠷᠣᠭᠰᠠᠨ ᠦᠭᠡᠢ᠃ ᠭᠠᠮᠰᠢᠭ ᠵᠣᠳ ᠭᠠᠷᠴᠣ ᠪᠠᠶᠢᠭᠰᠠᠨ ᠪᠣᠯᠪᠠᠴᠣ᠂ ᠮᠠᠯ ᠶᠡᠭᠡ ᠬᠡᠮᠵᠢᠶ᠎ᠡ ᠪᠠᠷ ᠬᠤᠭᠢᠷᠠᠵᠤ ᠰᠦᠢᠳᠦᠭᠰᠡᠨ ᠣᠳᠠᠭ᠎ᠠ ᠦᠭᠡᠢ᠃       ᠬᠤᠰᠢᠭᠤᠨ ᠠᠴᠠ ᠪᠠᠶᠢᠭᠤᠯᠣᠭᠰᠠᠨ ᠶᠡᠬᠡᠬᠡᠨ ᠦᠢᠯᠡᠳᠪᠦᠷᠢ ᠭᠡᠵᠤ ᠪᠠᠶᠢᠭᠰᠠᠨ ᠦᠭᠡᠢ ᠪᠣᠯᠪᠠᠴᠣ᠂ ᠬᠤᠪᠢ ᠶᠢᠨ ᠬᠤᠳᠠᠯᠳᠣᠭᠠᠴᠢᠨ᠂ ᠵᠢᠵᠢᠭ ᠦᠢᠯᠡᠳᠪᠦᠷᠢᠴᠢᠳ ᠪᠠᠨᠳᠢᠳᠠ ᠭᠡᠭᠡᠨ ᠬᠡᠶᠢᠳ ᠤᠨ ᠣᠷᠴᠢᠨ ᠳᠣᠭᠤᠷᠢᠨ ᠳᠤ ᠴᠦᠭᠡᠨ ᠦᠭᠡᠢ ᠪᠠᠶᠢᠭᠰᠠᠨ ᠶᠤᠮ᠃ ᠡᠭᠦᠨ ᠳᠤ ᠳᠣᠷᠭ᠎ᠠ ᠳᠣᠷᠳᠣᠩ᠂ ᠱᠢᠷᠦ ᠰᠣᠪᠣᠳ᠂ ᠮᠥᠩᠬᠦᠨ ᠡᠳ᠋ᠯᠡᠯ᠂ ᠨᠠᠷᠢᠯᠢᠭ ᠡᠳ᠋ ᠪᠠᠷᠠᠭ᠎ᠠ ᠶᠢ ᠬᠤᠳᠠᠯᠳᠣᠳᠠᠭ᠂ ᠪᠡᠭᠡᠵᠢᠩ᠂ ᠵᠠᠩ ᠵᠢᠶᠠ ᠺᠧᠦ ᠶᠢᠨ ᠮᠠᠶᠢᠮᠠᠢ᠂ ᠪᠣᠳᠠᠭ᠎ᠠ ᠭᠤᠯᠢᠷ᠂ ᠴᠠᠢ ᠪᠣᠣᠪᠤ ᠳᠡᠮᠡᠬᠢ ᠪᠦᠰ ᠪᠠᠷᠠᠭ᠎ᠠ ᠬᠤᠳᠠᠯᠳᠣᠳᠠᠭ᠂ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠮᠥᠩᠭᠦᠨ ᠤ᠂ ᠭᠠᠣᠯᠢ ᠵᠠᠰ ᠤᠨ᠂ ᠮᠣᠳᠣᠨ ᠤ ᠳᠡᠮᠦᠷ ᠤᠨ ᠳᠠᠷᠬᠠᠨ ᠪᠣᠯᠣᠨ ᠵᠢᠷᠤᠭ᠂ ᠪᠣᠳᠤᠭ ᠤᠨ ᠣᠷᠠᠨ ᠳᠠᠷᠬᠠᠨᠴᠣᠳ ᠴᠦ ᠵᠦᠩᠳᠡᠭᠡᠨ ᠪᠠᠶᠢᠭᠰᠠᠨ᠃ ᠠᠷᠠᠰᠣ ᠡᠯᠳᠡᠭᠦ᠂ ᠢᠰᠡᠭᠡᠢ ᠬᠢᠬᠦ ᠬᠤᠪᠢ ᠶᠢᠨ ᠡᠷᠦᠬᠡ ᠴᠦ ᠪᠠᠰᠠ ᠪᠠᠶᠢᠭᠰᠠᠨ ᠶᠤᠮ᠃                                                                                                               1986 ᠣᠨ ᠤ 8 ᠳ᠋ᠣᠭᠠᠷ ᠰᠠᠷ᠎ᠠ
  
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠠᠪᠠᠭ᠎ᠠ ᠬᠤᠰᠢᠭᠤ ᠪᠤᠳᠠᠰ ᠤᠨ ᠪᠤᠰᠤ ᠰᠤᠶᠤᠯ ᠤᠨ ᠥᠪ ᠢ ᠣᠯᠠᠮᠵᠢᠯᠠᠨ ᠵᠠᠯᠭᠠᠮᠵᠢᠯᠠᠬᠤ ᠰᠤᠶᠤᠯ ᠤᠨ ᠢᠲᠡᠭᠡᠯ ᠢᠶᠠᠨ ᠁
ᠲᠦᠮᠡᠨᠪᠠᠶᠠᠷ ᠤᠨ ᠤᠷᠴᠢᠭᠤᠯᠭ᠎ᠠ ᠶᠢᠨ ᠪᠦᠳᠦᠭᠡᠯ ᠱᠠᠩᠨᠠᠯ ᠲᠤᠰᠴᠠᠢ
︽ᠬᠦᠬᠡ ᠲᠦᠯᠬᠢᠭᠦᠷ︾ ᠨᠤᠮ ᠤᠨ ᠬᠤᠯᠪᠤᠭᠠᠨ ᠤ ᠨᠣᠮ ᠣᠩᠰᠢᠭᠰᠠᠨ ᠮᠡᠳᠡᠯᠭᠡ ᠶᠢᠨ ᠤᠷᠤᠯᠳᠤᠭᠠᠨ ᠠᠮᠵᠢᠯᠲᠠ ᠁
ᠬᠠᠶᠢᠷ᠎ᠠ ᠬᠠᠷᠢᠭᠤᠴᠠᠯᠭ᠎ᠠ ᠶᠢ ᠲᠡᠭᠡᠳᠦᠯᠡᠵᠦ ᠰᠢᠯᠢᠳᠡᠭ ᠵᠢᠭᠠᠨ ᠵᠢᠯᠤᠭᠤᠳᠤᠭᠴᠢ ᠪᠣᠯᠬᠤ ᠪᠠᠷ ᠰᠢᠭᠤᠷᠬᠠᠶᠢᠯᠠᠨ᠎ᠠ
ᠰᠢᠯᠢ ᠶᠢᠨ ᠭᠤᠣᠯ ᠠᠶᠢᠮᠠᠭ ᠠᠴᠠ ᠲᠤᠮᠤ ᠬᠡᠯᠪᠡᠷᠢ ᠶᠢᠨ ᠡᠷᠲᠡᠨ ᠤ ᠤᠩᠭᠤᠨ ᠤ ᠰᠦᠷᠦᠭᠵᠢᠯ ᠵᠢᠴᠢ ᠴᠢᠯᠠᠭᠤᠨ ᠁
ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠠᠴᠠ ᠭᠤᠤᠯᠴᠢᠯᠠᠨ ᠡᠷᠬᠢᠯᠡᠪᠡ ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠠᠯᠪᠠᠨ ᠲᠢᠩᠬᠢᠮ ᠠᠴᠠ ᠲᠠᠭᠠᠭᠠᠴᠢᠯᠠᠨ ᠡᠷᠬᠢᠯᠡᠪᠡ ᠃ ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠮᠡᠷᠭᠡᠵᠢᠯ ᠬᠠᠩᠭᠠᠪᠠ᠃ ᠰᠢᠤᠳᠠᠨ ᠳ᠋ᠤᠭᠠᠷ: 010098    蒙ICP备05000248号