| ᠤᠷᠭᠤᠮᠠᠯ ᠪᠦᠬᠦᠨ ᠦᠨᠳᠦᠰᠦ ᠪᠦᠲᠦᠨ ᠴᠡᠯᠭᠡᠷᠡᠭᠰᠡᠨ ᠡᠨᠡ ᠰᠠᠶᠢᠬᠠᠨ ᠨᠤᠲᠤᠭ ᠬᠤᠷᠢᠨ ᠬᠡᠳᠦᠨ ᠵᠢᠯ ᠤᠨ | ᠡᠮᠦᠨᠡ ᠬᠦᠯᠢᠶᠡᠨ ᠮᠠᠩᠬᠠ ᠪᠠᠶᠢᠯᠠ ᠭᠡᠵᠦ ᠬᠡᠨ ᠰᠠᠨᠠᠨᠠ︕ ︽ᠲᠡᠷᠡ ᠦᠶᠡ ᠶᠢᠨ ᠨᠤᠲᠤᠭ ᠤᠨ ᠪᠠᠶᠢᠳᠠᠯ ᠢ | ᠣᠳᠤ ᠶᠢᠨ ᠬᠢ ᠲᠠᠢ ᠬᠠᠷᠢᠴᠠᠭᠤᠯᠬᠤ ᠶᠢᠨ ᠠᠷᠭᠠ ᠦᠭᠡᠢ᠂ ᠡᠯᠡᠰᠦᠷᠬᠡᠭᠵᠢᠯ ᠶᠡᠭᠡ ᠪᠠᠶᠢᠭᠰᠠᠨ ᠡ︾ ᠭᠡᠵᠦ | ᠬᠡᠯᠡᠬᠦ ᠶᠢᠨ ᠳᠠᠭᠠᠤ ᠭᠡᠷᠡᠯᠪᠠᠭᠠᠲᠤᠷ ᠪᠢᠳᠡᠨ ᠳᠤ ᠵᠢᠷᠤᠭ ᠤᠨ ᠳᠡᠪᠲᠡᠷ ᠠᠪᠴᠢᠷᠠᠵᠤ ᠦᠵᠡᠭᠦᠯᠦᠯᠡ᠃ ᠲᠤᠬᠠᠢ ᠶᠢᠨ | ᠦᠶᠡ ᠶᠢᠨ ᠭᠦᠯᠢᠶᠡᠨ ᠮᠠᠩᠬᠠᠨ ᠤ ᠵᠢᠷᠤᠭ ᠵᠢᠴᠢ ᠵᠢᠯ ᠳᠠᠷᠠᠭᠠᠯᠠᠨ ᠨᠤᠭᠤᠭᠠᠷᠠᠭᠤᠯᠵᠤ ᠢᠷᠡᠭᠰᠡᠨ ᠵᠢᠷᠤᠭ ᠤᠳ ᠢ | ᠨᠢᠭᠡᠳ ᠨᠢᠭᠡ ᠪᠠᠷ ᠣᠷᠬᠢᠭᠳᠠᠭᠤᠯᠤᠯ ᠦᠭᠡᠢ ᠳᠡᠪᠲᠡᠷᠯᠡᠭᠰᠡᠨ ᠵᠢᠷᠤᠭ ᠤᠨ ᠲᠤᠪᠬᠢᠮᠠᠯ ᠶᠠᠮᠠᠷᠴᠦ ᠦᠭᠡ | ᠶᠠᠷᠢᠭᠰᠠᠨ ᠠᠴᠠ ᠢᠯᠡᠭᠦᠦ ᠪᠠᠲᠤᠲᠠᠢ ᠭᠡᠷᠡᠴᠢ ᠪᠣᠯᠵᠤ᠂ ᠬᠢᠵᠦ ᠪᠦᠲᠦᠭᠡᠭᠰᠡᠨ ᠬᠦᠮᠦᠨ ᠤ ᠦᠯᠢᠭᠡᠷ ᠲᠡᠦᠬᠡ ᠶᠢ | ᠬᠠᠳᠠᠭᠠᠯᠠᠨᠠ᠃ ᠬᠤᠯᠠᠨ ᠰᠢᠷᠭᠠ ᠳᠠᠭᠠ ᠶᠢᠨ ᠡᠯᠡᠰᠦᠨ ᠤ ᠬᠤᠶᠢᠲᠤ ᠬᠥᠪᠡᠬᠡᠨ ᠳᠤ ᠨᠤᠲᠤᠭᠯᠠᠳᠠᠭ | ᠭᠡᠷᠡᠯᠪᠠᠭᠠᠲᠤᠷ ᠤᠨ ᠬᠢ ᠪᠣᠯ ᠠᠪᠠᠭᠠ ᠬᠤᠰᠢᠭᠤᠨ ᠤ ᠴᠠᠭᠠᠨᠨᠠᠭᠤᠷ ᠪᠠᠯᠭᠠᠰᠤᠨ ᠤ ᠪᠠᠶᠠᠨᠨᠠᠭᠤᠷ ᠭᠠᠴᠠᠭᠠᠨ ᠤ ᠠᠶᠢᠯ᠃ | ᠲᠡᠳᠡᠨ ᠤ ᠨᠤᠲᠤᠭ ᠲᠤ ᠣᠳᠤ ᠬᠠᠷᠭᠠᠨᠠ ᠪᠤᠲᠠ ᠬᠠᠯᠢᠭᠤᠷᠠᠵᠤ᠂ ᠬᠠᠮᠢᠭᠠ ᠠᠴᠠ ᠨᠢ ᠶᠠᠭᠠᠬᠢᠵᠤ ᠬᠠᠷᠠᠭᠠᠳ ᠴᠦ | ᠭᠦᠯᠢᠶᠡᠨ ᠮᠠᠩᠬᠠ ᠪᠠᠶᠢᠭᠰᠠᠨ ᠭᠡᠳᠡᠭ ᠨᠢ ᠢᠲᠡᠭᠡᠭᠳᠡᠰᠢ ᠦᠭᠡᠢ ᠪᠣᠯᠵᠡᠢ᠃ | ᠡᠬᠡ ᠪᠠᠶᠢᠭᠠᠯᠢ ᠪᠠᠨ ᠬᠠᠶᠢᠷᠠᠯᠠᠵᠤ ᠬᠠᠮᠠᠭᠠᠯᠠᠵᠤ ᠯᠡ ᠪᠠᠶᠢᠪᠠᠯ ᠥᠭᠭᠦᠭᠡᠵᠢ ᠪᠤᠶᠠᠨ ᠨᠢ ᠤᠨᠳᠤᠷᠤᠭᠠᠳ ᠪᠠᠷᠠᠰᠢ | ᠦᠭᠡᠢ ᠪᠣᠶᠠ᠃ ᠭᠡᠷᠡᠯᠪᠠᠭᠠᠲᠤᠷ ᠡᠷᠲᠡ ᠠᠴᠠ ᠮᠤᠳᠤ ᠪᠤᠷᠭᠠᠰᠤ ᠲᠠᠷᠢᠵᠤ ᠨᠤᠲᠤᠭ ᠤᠰᠤ ᠪᠠᠨ ᠨᠤᠭᠤᠭᠠᠷᠠᠭᠤᠯᠬᠤ | ᠠᠵᠢᠯ ᠢ ᠬᠢᠭᠰᠡᠨ ᠬᠦᠮᠦᠨ᠃ ᠬᠤᠷᠢᠨ ᠬᠡᠳᠦᠨ ᠵᠢᠯ ᠤᠨ ᠡᠮᠦᠨᠡ ᠨᠤᠲᠤᠭ ᠤᠰᠤᠨ ᠤ ᠬᠢᠨᠢ ᠥᠩᠭᠡ ᠲᠦᠷᠬᠦ | ᠳᠠᠴᠢᠷᠰᠢᠨ ᠮᠠᠭᠤᠳᠠᠵᠤ ᠪᠠᠶᠢᠭᠠ ᠶᠢ ᠬᠠᠷᠠᠭᠠᠳ ᠲᠡᠷᠡ ᠰᠡᠳᠬᠢᠯ ᠡᠮᠵᠡᠭᠯᠡᠨ ᠡᠯᠡᠰᠦ ᠵᠠᠰᠠᠬᠤ ᠠᠵᠢᠯ ᠳᠤ ᠭᠤᠶᠢᠪᠢᠰᠢ | ᠦᠭᠡᠢ ᠵᠣᠷᠢᠭ ᠢ ᠪᠠᠷᠢᠨ ᠤᠷᠤᠵᠡᠢ᠃ ᠬᠠᠪᠤᠷ ᠨᠠᠮᠤᠷ ᠤᠨ ᠡᠪᠡᠰᠦ ᠮᠤᠳᠤ ᠲᠠᠷᠢᠬᠤ ᠬᠠᠮᠤᠭ ᠤᠨ ᠳᠤᠬᠢᠷᠠᠮᠵᠢᠲᠠᠢ ᠴᠠᠭ | ᠲᠤᠨᠢ ᠲᠥᠯ ᠲᠣᠰᠬᠤ᠂ ᠡᠪᠡᠰᠦ ᠬᠠᠳᠤᠬᠤ ᠠᠵᠢᠯ ᠳᠠᠪᠬᠤᠴᠠᠳᠠᠭ ᠪᠤᠯᠬᠤᠷ ᠮᠠᠯᠴᠢᠨ ᠬᠦᠮᠦᠨ ᠤ ᠬᠤᠪᠢ ᠳᠤ ᠴᠠᠭ | ᠭᠠᠷᠭᠠᠨᠠ ᠭᠡᠳᠡᠭ ᠦᠨᠡᠭᠡᠷ ᠬᠡᠴᠡᠭᠦᠦ ᠪᠠᠶᠢᠯᠠ᠃ ᠭᠡᠰᠡᠨ ᠴᠦ ᠭᠡᠷᠡᠯᠪᠠᠭᠠᠲᠤᠷ ᠨᠤᠲᠤᠭ ᠤᠰᠤ ᠪᠠᠨ ᠶᠠᠭᠠᠬᠢᠭᠰᠠᠨ ᠴᠦ | ᠰᠢᠷᠠ ᠡᠯᠡᠰᠦᠨ ᠤ ᠠᠮᠠᠨ ᠳᠤ ᠵᠠᠯᠬᠢᠭᠤᠯᠬᠤ ᠦᠭᠡᠢ ᠭᠡᠮᠡᠨ ᠪᠠᠷᠠᠭᠳᠠᠬᠤ ᠦᠭᠡᠢ ᠠᠵᠢᠯ ᠠᠴᠠ ᠴᠠᠭ ᠵᠠᠶᠢᠴᠢᠯᠠᠨ᠂ | ᠮᠤᠳᠤ ᠪᠤᠷᠭᠠᠰᠤ ᠲᠠᠷᠢᠬᠤ ᠠᠵᠢᠯ ᠢᠶᠠᠨ ᠡᠬᠢᠯᠡᠭᠦᠯᠦᠭᠰᠡᠨ ᠨᠢ 1997 ᠣᠨ ᠶᠤᠮ᠃ ᠰᠠᠶ᠋ᠢ ᠭᠤᠴᠢ ᠭᠠᠷᠴᠤ | ᠪᠠᠶᠢᠭᠰᠠᠨ ᠭᠡᠷᠡᠯᠪᠠᠭᠠᠲᠤᠷ ᠨᠤᠲᠤᠭ ᠢᠶᠠᠨ ᠰᠡᠷᠭᠦᠭᠡᠬᠦ ᠪᠠᠷ ᠡᠬᠡᠨᠡᠷ ᠬᠡᠦᠬᠡᠳ ᠢᠶᠠᠨ ᠳᠠᠭᠠᠭᠤᠯᠤᠨ᠂ ᠡᠯᠡᠰᠦᠨ | ᠰᠢᠭᠤᠷᠭᠠ ᠶᠢ ᠰᠥᠷᠴᠦ᠂ ᠬᠦᠷᠵᠡ ᠪᠠᠷ ᠨᠦᠬᠡ ᠮᠠᠯᠲᠠᠵᠤ ᠲᠠᠷᠢᠳᠠᠭ ᠪᠠᠶᠢᠪᠠ᠃ ᠠᠮᠢ ᠠᠬᠤᠢ ᠪᠠᠨ ᠲᠤᠶᠢᠯᠪᠤᠷᠢᠲᠠᠢ | ᠰᠡᠷᠭᠦᠭᠡᠬᠦ ᠶᠢᠨ ᠲᠥᠯᠦᠭᠡ 2002 ᠣᠨ ᠠᠴᠠ ᠪᠤᠭ ᠮᠠᠯ ᠢᠶᠠᠨ ᠰᠢᠢᠳᠪᠦᠷᠢᠯᠡᠨ᠂ ᠦᠬᠡᠷ ᠮᠠᠯᠵᠢᠬᠤ ᠪᠤᠯᠪᠠ᠃ | ᠭᠡᠷᠡᠯᠪᠠᠭᠠᠲᠤᠷ ᠤᠨ ᠡᠶᠢᠮᠦ ᠯᠡ ᠵᠤᠷᠢᠭᠲᠠᠢ ᠪᠠᠷᠢᠮᠳᠠᠯᠠᠯ ᠰᠢᠭᠤᠷᠬᠠᠢ ᠬᠢᠳᠡᠯ ᠬᠤᠶᠠᠷ ᠢᠶᠠᠷ ᠨᠢᠴᠦᠭᠦᠨ ᠮᠠᠩᠬᠠ | ᠬᠠᠯᠴᠠᠭᠠᠢ ᠭᠠᠵᠠᠷ ᠤᠳ ᠡᠪᠡᠰᠦ ᠤᠷᠭᠤᠮᠠᠯ ᠳᠤ ᠨᠤᠭᠳᠤᠯᠤᠭᠳᠠᠵᠤ ᠡᠬᠢᠯᠡᠭᠰᠡᠨ ᠠᠵᠢ᠃ | ᠠᠩᠬᠠ ᠡᠬᠢᠯᠡᠭᠡᠳ ᠲᠡᠷᠡ ᠨᠤᠲᠤᠭ ᠲᠠᠭᠠᠨ ᠮᠤᠳᠤ ᠪᠤᠷᠭᠠᠰᠤ ᠲᠠᠷᠢᠵᠤ ᠡᠯᠡᠰᠦ ᠶᠢ ᠲᠤᠭᠲᠠᠪᠤᠷᠢᠵᠢᠭᠤᠯᠤᠭᠰᠠᠨ | ᠪᠣᠯ 2006 ᠣᠨ ᠪᠣᠯᠬᠤ ᠳᠤ ᠭᠠᠩ ᠳᠤ ᠣᠨᠴᠠ ᠳᠠᠭᠠᠭᠠᠴᠠᠲᠠᠢ᠂ ᠬᠦᠢᠲᠡᠨ ᠳᠤ ᠳᠡᠰᠪᠦᠷᠢᠲᠡᠢ᠂ ᠵᠤᠬᠢᠴᠠᠬᠤ | ᠴᠢᠳᠠᠪᠤᠷᠢ ᠪᠠᠷ ᠰᠠᠶᠢᠨ᠂ ᠠᠮᠢ ᠠᠬᠤᠢ ᠶᠢᠨ ᠵᠠᠰᠠᠯᠲᠠ ᠰᠡᠷᠭᠦᠯᠲᠡ ᠳᠤ ᠮᠠᠰᠢ ᠥᠷᠭᠡᠨ ᠢᠶᠠᠷ ᠬᠡᠷᠡᠭᠯᠡᠭᠳᠡᠵᠦ ᠪᠠᠶᠢᠭᠠ | ᠲᠡᠵᠢᠭᠡᠯ ᠡᠪᠡᠰᠦᠨ ᠤ ᠨᠢᠭᠡ ᠪᠣᠯᠬᠤ ᠬᠠᠷᠭᠠᠨᠠ ᠶᠢ ᠲᠠᠷᠢᠵᠤ ᠨᠡᠭᠦᠳᠡᠯ ᠡᠯᠡᠰᠦ ᠶᠢ ᠨᠤᠭᠲᠤᠯᠬᠤ ᠪᠤᠯᠤᠭᠰᠠᠨ ᠶᠤᠮ᠃ | ᠲᠡᠷᠡ ᠠᠩᠬᠠ ᠡᠬᠢᠯᠡᠭᠡᠳ ᠬᠤᠰᠢᠭᠤᠨ ᠤ ᠪᠠᠨ ᠣᠢ ᠰᠢᠭᠤᠢ ᠶᠢᠨ ᠲᠤᠪᠴᠢᠶᠡ ᠠᠴᠠ ᠨᠢᠭᠡ ᠪᠤᠭᠤᠯᠲᠠ ᠬᠤᠶᠠᠷ | ᠪᠤᠭᠤᠯᠲᠠ ᠪᠠᠷ ᠬᠠᠷᠭᠠᠨᠠ ᠶᠢᠨ ᠴᠢᠬᠢ ᠮᠤᠳᠤ ᠠᠪᠴᠢᠷᠠᠵᠤ᠂ ᠵᠢᠯ ᠵᠢᠯ ᠨᠡᠮᠡᠵᠦ ᠲᠠᠷᠢᠳᠠᠭ ᠪᠠᠶᠢᠪᠠ᠃ 2013 | ᠣᠨ ᠳᠤ ᠬᠡᠪᠴᠢᠶᠡ ᠪᠠᠨ ᠥᠷᠭᠡᠳᠬᠡᠬᠦ ᠪᠠᠷ ᠬᠤᠰᠢᠭᠤᠨ ᠤ ᠪᠠᠨ ᠣᠢ ᠰᠢᠭᠤᠢ ᠶᠢᠨ ᠲᠤᠪᠴᠢᠶᠠᠨ ᠠᠴᠠ 2 ᠲᠦᠮᠡᠨ | ᠰᠢᠷᠬᠡᠭ ᠬᠠᠷᠭᠠᠨᠠ ᠶᠢᠨ ᠴᠢᠬᠢ ᠮᠤᠳᠤ ᠠᠪᠴᠢᠷᠠᠵᠤ ᠲᠠᠷᠢᠭᠰᠠᠨ ᠪᠤᠯᠪᠠᠴᠤ ᠳᠡᠮᠡᠢ ᠤᠷᠭᠤᠭᠰᠠᠨ ᠦᠭᠡᠢ᠃ | ᠭᠡᠷᠡᠯᠪᠠᠭᠠᠲᠤᠷ ᠡᠭᠦᠨ ᠠᠴᠠ ᠪᠤᠯᠵᠤ ᠵᠣᠷᠢᠭ ᠮᠤᠬᠤᠷᠠᠭᠰᠠᠨ ᠦᠭᠡᠢ ᠬᠠᠷᠢᠨ ᠳᠤᠷᠰᠢᠯᠭᠠ ᠬᠤᠷᠠᠮᠳᠤᠭᠤᠯᠤᠨ ᠤᠯᠠᠮ | ᠰᠠᠶᠢᠨ ᠠᠷᠭᠠ ᠰᠦᠪᠡᠭᠴᠢᠯᠡᠪᠡ᠃ ︽ᠬᠠᠷᠭᠠᠨᠠ ᠭᠠᠩ ᠳᠤ ᠳᠡᠰᠪᠦᠷᠢᠲᠡᠢ ᠤᠷᠭᠤᠬᠤ ᠨᠢ ᠠᠮᠠᠷᠬᠠᠨ ᠪᠤᠯᠪᠠᠴᠤ | ᠬᠠᠷᠢᠨ ᠲᠠᠷᠢᠬᠤ ᠳᠤ ᠪᠠᠨ ᠭᠠᠵᠠᠷ ᠢᠶᠠᠨ ᠵᠥᠪ ᠰᠤᠩᠭᠤᠬᠤ ᠴᠢᠬᠤᠯᠠᠲᠠᠢ᠂ ᠰᠡᠪᠡᠷᠬᠡᠭ ᠵᠦᠭᠡᠯᠡᠨ ᠭᠠᠵᠠᠷ ᠲᠤ | ᠤᠷᠭᠤᠬᠤ ᠨᠢ ᠰᠠᠶᠢᠨ ᠪᠦᠭᠡᠳ ᠠᠭᠠᠷ ᠤᠨ ᠳᠤᠯᠠᠭᠠᠨ ᠴᠢᠬᠢᠭ ᠤᠨ ᠬᠡᠮᠵᠢᠶᠡ ᠵᠡᠷᠭᠡ ᠨᠥᠬᠦᠴᠡᠯ ᠢ ᠴᠦ ᠠᠩᠬᠠᠷᠬᠤ | ᠬᠡᠷᠡᠭᠲᠡᠢ ᠪᠠᠶᠢᠳᠠᠭ︾ ᠭᠡᠵᠦ ᠭᠡᠷᠡᠯᠪᠠᠭᠠᠲᠤᠷ ᠶᠠᠷᠢᠨᠠ᠃ ᠲᠡᠷᠡ 2016 ᠣᠨ ᠳᠤ ᠰᠢᠯᠤᠭᠤᠨ ᠬᠥᠬᠡ ᠠᠴᠠ 4 | ᠲᠦᠮᠡᠨ ᠰᠢᠷᠬᠡᠭ ᠬᠠᠷᠭᠠᠨᠠ ᠶᠢᠨ ᠴᠢᠬᠢ ᠮᠤᠳᠤ ᠠᠪᠴᠢᠷᠠᠵᠤ᠂ ᠬᠦᠮᠦᠨ ᠬᠦᠯᠦᠰᠦᠯᠡᠨ ᠨᠡᠶᠢᠳᠡᠮ ᠲᠠᠷᠢᠭᠠᠳ ᠶᠡᠭᠡ | ᠰᠠᠶᠢᠨ ᠤᠷᠭᠤᠭᠰᠠᠨ ᠢᠶᠠᠷ ᠵᠤᠷᠢᠭᠵᠢᠨ᠂ ᠵᠢᠯ ᠠᠴᠠ ᠵᠢᠯ ᠨᠡᠮᠡᠵᠦ ᠲᠠᠷᠢᠭᠰᠠᠨ ᠢᠶᠠᠷ ᠣᠳᠤ 5 ᠲᠦᠮᠡᠨ ᠪᠤᠲᠠ | ᠬᠠᠷᠭᠠᠨᠠ ᠠᠮᠢ ᠠᠬᠤᠢ ᠶᠢᠨ ᠬᠢᠨᠢ ᠬᠠᠯᠬᠠᠪᠴᠢ ᠪᠤᠯᠵᠤ ᠬᠠᠳᠠᠨ ᠵᠤᠷᠢᠭᠳᠠᠨ ᠮᠡᠳᠦ ᠬᠠᠨᠠᠶᠢᠨᠠ᠃ ᠨᠤᠲᠤᠭ ᠤᠨ ᠬᠢᠨᠢ | ᠬᠦᠷᠦᠰᠦ ᠴᠢᠩᠭᠠᠷᠠᠭᠰᠠᠨ ᠢᠶᠠᠷ ᠪᠤᠰᠤᠳ ᠤᠷᠭᠤᠮᠠᠯ ᠴᠦ ᠳᠠᠭᠠᠯᠳᠤᠨ ᠤᠷᠭᠤᠵᠤ᠂ ᠤᠷᠭᠤᠮᠠᠯ ᠤᠨ ᠲᠦᠷᠦᠯ ᠵᠦᠢᠯ | ᠤᠯᠠᠮ ᠪᠠᠷ ᠤᠯᠠᠰᠢᠷᠠᠭᠰᠠᠨ ᠨᠢ ᠪᠠᠶᠠᠷᠯᠠᠭᠤᠰᠢᠲᠠᠢ ᠤᠴᠢᠷ ᠪᠠᠶᠢᠯᠠ᠃ | ᠬᠠᠷᠭᠠᠨᠠ ᠪᠣᠯ ᠣᠯᠠᠨ ᠨᠠᠰᠤᠲᠤ᠂ ᠣᠯᠠᠨ ᠬᠡᠷᠡᠭᠴᠡᠭᠡᠲᠦ ᠪᠤᠳᠠᠷᠬᠠᠭ ᠤᠷᠭᠤᠮᠠᠯ᠃ ᠪᠦᠬᠦ ᠥᠪᠦᠷ ᠮᠤᠩᠭᠤᠯ | ᠤᠷᠤᠨ ᠳᠤ ᠨᠡᠶᠢᠳᠡᠮ ᠲᠠᠷᠬᠠᠨ ᠤᠷᠭᠤᠳᠠᠭ ᠲᠠᠷᠬᠠᠴᠠ ᠦᠷᠭᠡᠨ᠂ ᠭᠠᠩ ᠳᠤ ᠣᠨᠴᠠ ᠳᠠᠭᠠᠭᠠᠴᠠᠲᠠᠢ᠂ ᠬᠦᠢᠲᠡᠨ ᠳᠤ | ᠳᠡᠰᠪᠦᠷᠢᠲᠡᠢ᠂ ᠵᠤᠬᠢᠴᠠᠬᠤ ᠴᠢᠳᠠᠪᠤᠷᠢ ᠨᠢ ᠲᠤᠶᠢᠯ ᠤᠨ ᠰᠠᠶᠢᠨ᠂ ᠡᠯᠡᠰᠦᠨ ᠤ ᠵᠠᠰᠠᠯᠲᠠ ᠳᠤ ᠮᠠᠰᠢ ᠦᠷᠭᠡᠨ ᠢᠶᠠᠷ | ᠬᠡᠷᠡᠭᠯᠡᠵᠦ ᠪᠠᠶᠢᠭᠠ ᠡᠪᠡᠰᠦᠨ ᠤ ᠲᠦᠷᠦᠯ᠂ ᠬᠠᠷᠭᠠᠨᠠ ᠶᠢᠨ ᠦᠷᠡ ᠶᠢᠨ ᠰᠤᠶᠤᠭᠠᠯᠠᠯᠲᠠ ᠨᠢ ᠲᠦᠷᠭᠡᠨ᠂ ᠴᠢᠬᠢᠭ | ᠪᠤᠯᠤᠨ ᠳᠤᠯᠠᠭᠠᠨ ᠤ ᠬᠡᠮᠵᠢᠶᠡ ᠬᠦᠷᠦᠭᠡᠳ ᠯᠡ ᠦᠭᠳᠡᠭ ᠪᠣᠯ ᠦᠷᠡ ᠨᠢ ᠮᠠᠰᠢ ᠤᠬᠤᠷᠬᠠᠨ ᠬᠤᠭᠤᠴᠠᠭᠠᠨ ᠳᠤ | ᠰᠤᠶᠤᠭᠠᠯᠠᠳᠠᠭ᠃ ᠬᠠᠷᠭᠠᠨᠠ ᠶᠢ ᠬᠠᠳᠤᠯᠠᠩ ᠤᠨ ᠭᠠᠵᠠᠷ ᠲᠠᠭᠠᠨ ᠲᠠᠷᠢᠳᠠᠭ ᠦᠭᠡᠢ᠃ ᠭᠤᠣᠯ ᠨᠢ ᠭᠤᠤ | ᠭᠠᠩᠭᠠ ᠶᠢ ᠵᠠᠰᠠᠬᠤ᠂ ᠰᠠᠯᠬᠢᠨ ᠤ ᠬᠠᠯᠬᠠᠪᠴᠢ ᠤᠢ ᠪᠤᠯᠭᠠᠬᠤ᠂ ᠬᠦᠷᠦᠰᠦ ᠰᠢᠷᠦᠢ ᠶᠢ ᠰᠠᠶᠢᠵᠢᠷᠠᠭᠤᠯᠬᠤ ᠳᠤ | ᠣᠨᠴᠠ ᠳᠤᠬᠢᠷᠠᠳᠠᠭ ᠠᠵᠢ᠃ | ᠬᠠᠷᠭᠠᠨᠠ ᠲᠠᠷᠢᠬᠤ ᠨᠢ ᠡᠯᠡᠰᠦᠨ ᠤ ᠵᠠᠰᠠᠯᠲᠠ ᠳᠤ ᠮᠠᠰᠢ ᠴᠢᠬᠤᠯᠠ᠂ ᠬᠠᠮᠠᠭᠠᠯᠠᠬᠤ ᠨᠢ ᠨᠡᠩ ᠴᠢᠬᠤᠯᠠ ᠭᠡᠵᠦ | ᠭᠡᠷᠡᠯᠪᠠᠭᠠᠲᠤᠷ ᠦᠵᠡᠳᠡᠭ᠃ ︽ ᠮᠠᠨ ᠤ ᠬᠢ ᠵᠢᠯ ᠪᠦᠷᠢ ᠳᠦᠷᠪᠡᠨ ᠰᠠᠷᠠ ᠶᠢᠨ ᠰᠡᠭᠦᠯᠴᠢ ᠲᠠᠪᠤᠨ ᠰᠠᠷᠠ ᠶᠢᠨ ᠡᠬᠢ | ᠪᠠᠷ ᠬᠠᠷᠭᠠᠨᠠ ᠲᠠᠷᠢᠳᠠᠭ᠃ ᠲᠠᠷᠢᠭᠰᠠᠨ ᠤ ᠳᠠᠷᠠᠭᠠ ᠬᠠᠮᠠᠭᠠᠯᠠᠬᠤ ᠶᠢ ᠭᠤᠣᠯ ᠠᠩᠬᠠᠷᠳᠠᠭ᠃ ᠬᠦᠷᠢᠶᠡᠯᠡᠭᠡᠳ ᠮᠠᠯ | ᠤᠷᠤᠭᠤᠯᠬᠤ ᠦᠭᠡᠢ ᠬᠤᠶᠠᠷ ᠠᠴᠠ ᠭᠤᠷᠪᠠᠨ ᠵᠢᠯ ᠪᠤᠯᠪᠠᠯ ᠭᠦᠢᠴᠡᠳ ᠤᠷᠭᠤᠴᠢᠬᠠᠨᠠ᠃ ᠲᠡᠭᠡᠪᠡᠯ ᠰᠠᠶ᠋ᠢ ᠮᠠᠯ | ᠤᠷᠤᠭᠤᠯᠵᠤ ᠪᠤᠯᠤᠨᠠ᠃ ᠦᠭᠡᠢ ᠪᠣᠯ ᠪᠦᠷ ᠬᠤᠭᠤᠯᠤᠭᠠᠳ ᠬᠠᠶᠠᠴᠢᠬᠠᠳᠠᠭ ᠶᠤᠮ᠃ ᠭᠦᠢᠴᠡᠳ ᠤᠷᠭᠤᠭᠰᠠᠨ ᠤ | ᠳᠠᠷᠠᠭᠠ ᠮᠠᠯ ᠤᠷᠤᠭᠤᠯᠪᠠᠯ ᠬᠠᠷᠢᠨ ᠮᠠᠯ ᠳᠤ ᠲᠡᠵᠢᠭᠡᠯ ᠪᠤᠯᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠳᠠᠷᠠᠭᠠ ᠵᠢᠯ ᠨᠢ ᠨᠡᠩ ᠢᠭᠴᠤ | ᠰᠠᠬᠤᠯᠢᠭ ᠵᠦᠭᠡᠯᠡᠨ ᠪᠤᠯᠪᠠᠷᠠᠢ ᠰᠢᠨᠡ ᠮᠦᠴᠢᠷ ᠤᠷᠭᠤᠨᠠ᠃ ᠦᠨᠳᠦᠰᠦᠨ ᠳᠡᠭᠡᠨ ᠭᠤᠷᠪᠠᠨ ᠵᠢᠯ ᠳᠤ ᠨᠢᠭᠡ | ᠤᠳᠠᠭᠠ ᠬᠠᠳᠤᠵᠤ ᠰᠢᠨᠡᠳᠬᠡᠵᠦ ᠥᠭᠬᠦ ᠬᠡᠷᠡᠭᠲᠡᠢ᠃ ᠬᠠᠳᠤᠬᠤ ᠨᠢ ᠤᠷᠭᠤᠯᠲᠠ ᠳᠤ ᠰᠠᠶᠢᠨ᠂ ᠰᠢᠨᠡ ᠮᠦᠴᠢᠷ | ᠰᠢᠨᠡ ᠰᠤᠶᠤᠭᠠ ᠭᠠᠷᠴᠤ᠂ ᠮᠠᠯ ᠢᠳᠡᠬᠦ ᠳᠤ ᠰᠢᠮᠡ ᠲᠡᠵᠢᠭᠡᠯ ᠢᠶᠠᠷ ᠰᠠᠶᠢᠨ ᠪᠤᠯᠠᠳᠠᠭ᠃ ᠬᠠᠳᠤᠭᠠᠳ ᠮᠠᠯ ᠤᠨ | ᠲᠡᠵᠢᠭᠡᠯ ᠪᠤᠷᠳᠤᠭᠠ ᠪᠤᠯᠭᠠᠵᠤ ᠪᠤᠯᠤᠨᠠ᠃ ᠣᠨᠤᠭᠠ ᠬᠦᠷᠪᠡᠯ ᠬᠤᠶᠢᠰᠢᠳᠠ ᠡᠨᠡ ᠲᠠᠯᠠ ᠪᠠᠷ ᠰᠡᠳᠬᠢᠵᠦ ᠠᠵᠢᠯᠯᠠᠬᠤ | ᠰᠠᠨᠠᠭᠠ ᠲᠠᠢ︾ ᠭᠡᠵᠦ ᠭᠡᠷᠡᠯᠪᠠᠭᠠᠲᠤᠷ ᠤᠴᠢᠷᠯᠠᠨᠠ᠃ | ︽ᠠᠮᠢ ᠠᠬᠤᠢ ᠶᠢ ᠬᠠᠮᠠᠭᠠᠯᠠᠬᠤ ᠭᠡᠳᠡᠭ ᠪᠣᠯ ᠨᠢᠭᠡ ᠬᠦᠮᠦᠨ᠂ ᠨᠢᠭᠡ ᠦᠶᠡ ᠶᠢᠨ ᠬᠦᠮᠦᠨ ᠤ ᠠᠵᠢᠯ ᠪᠢᠰᠢ᠂ | ᠬᠠᠷᠢᠨ ᠪᠦᠬᠦ ᠠᠷᠠᠳ ᠢᠶᠠᠷ ᠢᠶᠠᠨ ᠦᠶᠡ ᠶᠢᠨ ᠦᠶᠡ ᠳᠤ ᠬᠢᠳᠡᠭ ᠠᠵᠢᠯ ᠶᠤᠮ ᠰᠢᠦ︾ ᠭᠡᠵᠦ ᠭᠡᠷᠡᠯᠪᠠᠭᠠᠲᠤᠷ | ᠰᠤᠷᠪᠤᠯᠵᠢᠯᠠᠭᠴᠢ ᠳᠤ ᠶᠠᠷᠢᠵᠤ ᠪᠢᠯᠡ᠃ ᠡᠨᠡ ᠪᠣᠯ ᠮᠠᠯᠴᠢᠨ ᠬᠦᠮᠦᠨ ᠤ ᠨᠤᠲᠤᠭ ᠤᠰᠤ ᠪᠠᠨ ᠨᠤᠮᠢᠨ | ᠨᠤᠭᠤᠭᠠᠨ ᠢᠶᠠᠷ ᠨᠢ ᠪᠠᠶᠢᠯᠭᠠᠬᠤ ᠠᠮᠢ ᠠᠬᠤᠢ ᠪᠠᠨ ᠬᠠᠮᠠᠭᠠᠯᠠᠬᠤ ᠡᠭᠦᠷᠢᠳᠡ ᠶᠢᠨ ᠬᠠᠷᠢᠭᠤᠴᠠᠯᠭᠠ ᠪᠣᠯᠬᠤ ᠶᠤᠰᠤᠲᠠᠢ᠃ | ᠡᠨᠡ ᠪᠣᠯ ᠭᠡᠷᠡᠯᠪᠠᠭᠠᠲᠤᠷ ᠤᠨ ᠨᠤᠭᠤᠭᠠᠨ ᠬᠦᠰᠡᠯ᠂ ᠮᠦᠩᠭᠡ ᠶᠢᠨ ᠬᠦᠰᠡᠯ ᠪᠠᠶᠢᠬᠤ ᠤᠴᠢᠷᠲᠠᠢ᠃ | |